Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 43

Cishaishi ca Mambo Dhavhidhi

Cishaishi ca Mambo Dhavhidhi

Pakandopera kufa Sauri, Dhavhidhi wakava mambo. Wainga no 30 o makore. Painga no makore akawanda ecitonga, usiku umweni wakavona mwanakaji wakaseja. Dhavhidhi wakakwanisa kuziva zina rake kuti wainga Bhati-sebha, wainga wakacadha no umwe musoca waizwi Uria. Dhavhidhi wakaita kuti Bhati-sebha aviye kunyumba kwake. Vovaviri vakaita vatano, zve Bhati-sebha wakava no mimba. Dhavhidhi wakaeja kuviga zvaainga aita. Iyena wakabvunja mutungamiriri wake wo masoca kuti adire Uria kumbeji ko masoca zve ivona vaviye sure kwake. Uria paakaurawa ku hondo, Dhavhidhi wakacadha na Bhati-sebha.

Jehovha wakazvivona zvese zvakashata zvainga zvaitikaro. Waizoitenyi? Jehovha wakatumira muprofita Natani kuna Dhavhidhi. Natani wakati: ‘Mwanarume umwe wainga wakakhupuka wainga no mabvuta akawanda, zve mwanarume umwe murombo wainga no cibvuta cimwe cidoko haco caidisisa maningi. Asi mwanarume wakakhupukaya wakatorera mwanarume wiya waingaya murombo cibvuta cake.’ Dhavhidhi wakanyangajwa maningi ndizvona woti: ‘Mwanarume mukhupuki uu waifanera kuurawa!’ Natani wakati kuna Dhavhidhi: ‘Mwanarume wakakhupuka wandanangaya ndiwe!’ Dhavhidhi wakava no mwoyo wakasuruvara, woti kuna Natani: ‘Ndashaishira Jehovha.’ Cishaishi ici cakavisa zvineso zvakawanda kuna Dhavhidhi no mbhuri yake. Jehovha wakapanica Dhavhidhi, asi wakamutendera kuti apone ngokuti wainga wakagondeka no anozvidodokesa.

Dhavhidhi waida kuvaka temberi kuna Jehovha, asi Jehovha wakasana mwana wake Soromona kuti avake. Dhavhidhi wakatanga kunasirira zviro  kuna Soromona nokumubvunja kuti: ‘Nyumba ya Jehovha ngaive inomukuja. Soromona wainga aciri cimujaha, asi Dhavhidhi wakamubesa pa kuronga zviro.’ Dhavhidhi wakapa mare yake kuitira basa rokuvaka. Iyena wakawana vabati vanokwanisa kamare. Iyena wakakwengweneja ndarama no siriva, no matabwa aibva tiro no sidhoni. Upenyu hwake pawainga hwecikwedera kumagumo, Dhavhidhi wakapa Soromona mazano okuvaka temberi. Womubvunja kuti: ‘Jehovha wandituma kuti ndikutarire zviro izvi kuna iwewe. Jehovha anozokubesa. Ucathya. Iva wakavanga batai basa.’

“Ndiani ano viga bzokuposa bzake, aazogarisiki; ndiani anobzidekeca no kubzisia, anozoitihwa unyaxa.”—Mazwi Akangwara 28:13