Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 37

Jehovha anovereketa na Samueri

Jehovha anovereketa na Samueri

Mupiri Mukuru Eri wainga no vana vaviri vaishanda inga vapiri mu tabherinake. Mazina avo ainga Hofini na Finiasi. Ivona avacaizwira mutemo ja Jehovha zve ivona vaitaja vandhu va Jehovha mu njira yakashata. VaIziraeri povaita mupiro kuna Jehovha, Hofini na Finiasi vaitora zvakanakisisa kuitira ivona pacavo. Eri wakazwa ngo pamusoro po zviro zvaita vana vake, asi aazivi kuita ciri cese. Kureva kuti Jehovha waizoregera kuti izvo zviitike?

Pikija Samueri wainga mudoko maningi kupinda Hofini na Finiasi, iyena aazivi kuvatevejera. Jehovha waidakajihwa ndi Samueri. Pa usiku umweni paainga acivata, Samueri wakazwa izwi recimudana ngo zina rake. Iyena wakamuka, wogogoma kwenda kuna Eri zve wakati: ‘Ndiri pano!’ Asi Eri wakati: ‘Andizivi kukudanija. Endanyi koovata.’ Samueri wakaenda kovata. Perepo zvakaitikazve. Samueri paakazwa izwi pa bvaza yo citatu, Eri wakavona kuti wainga Jehovha waidanija Samueri. Iyena wakati kuna Samueri kudari ukazwazve izwi, unodikana kunanga kudari: ‘Vereketanyi, Jehovha. Muranda wenyu ari kuzwa.’

Samueri wakahwirirazve koovata. Perepo iyena wakazwa izwi reciti: ‘Samueri! Samueri!’ Iyena wakadavira kuti: ‘Vereketanyi, muranda wenyu arikuzwa.’ Jehovha wakamubvuja kudari: ‘Bvunjai Eri kuti ndinozomupanica iyena no mbhuri yake. Iyena anozviziva kuti vana vake vari kuita zvakashata  mu tabherinake yangu, asi aazivi kuita ciri cese ngo pamusoro pazvo.’ Mangwanani akatevera Samueri wakafunungura musuvo jo tabherinake, inga zvaaita mazuva ese. Iyena wainga ecithya kubvunja mupiri mukuru zvaainga wabvunjwa ndi Jehovha kuti anange. Asi Eri wakamudanija zve wakamubvunjisa kudari: ‘Mwanangu, Jehovha wakakubvunjeyi? Ndibvunjeyei zvese.’ Ngokudaro Samueri wakabvunja Eri zvese.

Samueri paainga ecikura, Jehovha wakaramba ecibhuya naye. Kutenderera nyika yese, ku mativi ese, vaIziraeri vese vaiziva kuti Jehovha wainga wasana Samueri kuti ave muporofita zve mutongi.

“Cerecejai Marure wako mu mazuva o ujaha hwako.”—Mucumaeri 12:1