Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 35

Ana Wakaita Mukumbiro Kuitira Mwana

Ana Wakaita Mukumbiro Kuitira Mwana

Umwe muIziraei waidanwa Erikana wainga no vakaji vaviri, Ana na Penina, asi waida maningi Ana. Penina waishora Ana nguva jese ngokuti Ana acaingepi no mwana zve Penina wainga no vana vazinji. Gore ngo gore, Erikana waitora mbhuri yake kuti iende ku tabherinaki ku Siro. Nguva imweni pavainga vari kondhoyo, wakavona kuti mudiwa wake Ana wainga wakasuruvara maningi. Iyena wakati: ‘Ndapota ucacema Ana. Inini ndinewe. Ndinokuda.’

No papera mukuvo, Ana wakaenda ega kuti aite Mukumbiro. Iyena waindocema paikumbira kuti Jehovha amubesere. Iyena wakamugondesa kuti: ‘Jehovha, kudari mukandipa mwana, ndinozomupa kwamuri zve anozomushandira mu upenyu hwake hwese.’

Mupiri mukuru Eri wakavona Ana acifikoira zve iyena wakarangarira kuti wainga wakarejera. Ana wakadavira kudari: ‘Haiwa, tenji wangu, andizivi kurejera. Ndino cineso cikuru maningi zve ndiri kubhuya na Jehovha ngo pamusoro paco.’ Eri wakazvivona kuti wainga wakaposa zve wakamubvunja kudari: ‘Mwari ngaakupe zvaunoda.’ Ana wakajizwa ushoni zve wakaenderera mberi. Ricito rapera gore rimwe, iyena wakava no mwana zve wakamudanija kuti Samueri. Mungakwanisa kuvona mudakaro wakava na Ana?

 Ana aazivi kukanganwa cigondiso cake kuna Jehovha. Paakapera kumwisa Samueri, iyena wakamutora kuti aende kooshanda ku tabherinaki. Iyena wakati kuna Eri: ‘Uwu ndiyena mwana wandaitiraya mukumbiro. Mu njiku jake jese, ndinomupa Jehovha.’ Pa gore rimwe nga rimwe Erikana na Ana vanoenda koovona Samueri zve vaiviisa cibhaci cicina mukono. Jehovha wakapa Ana vana vatutu vorume no vaviri vokaji.

“Kumbiranyi, munozopuwa. Psakanyi, munozowana.”—Mateu 7:7