Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 29

Jehovha Wakasana Joshuwa

Jehovha Wakasana Joshuwa

Pasure po kutungamirira jinja ro vaIziraeri pa makore mazinji, upenyu hwa Mosi wainga waguma ku magumo. Jehovha wakati: ‘Andiwepi unozotora vaIziraeri kuti vanghwine mu Nyika yo Cipikihwa. Asi ndinokutendera kuti uvone nyikeyo.’ Perapo Mosi wakabvunja Jehovha kuti asane mutungamiriri mupsa kuti angwarire vandhu ava. Jehovha wakamubvunja kudari: ‘Endai kuna Joshuwa zve mubvunjei kuti ndiena anozova mutungamiriri.’

Mosi wakabvunja vaIziraeri kuti wainga phedo no kufa zve Jehovha wainga wasana Joshuwa inga mutungamiriri wavo kuti vanghwine mu Nyika yo Cipikihwa. Perapo Mosi wakati kuna Joshuwa: ‘Ucathya. Jehovha acazokubesera.’ No papera nguva shomani, Mosi wakaguma pa Dundhu Nebo, apo Jehovha wakamutatija nyika yaainga wakagondesa kuna Abhirahama, Izaki na Jakobe. Mosi wainga waano 120 o makore paakafa.

Jehovha wakabvunja Joshuwa kudari: ‘Ambukanyi murambo wa Jorodhani zve munghwine mu Kanani. Ndinozokubesera inga zvatakabesera Mosi. Ivai no cokwadi cokuti uri kuverenga Mutemo jangu njiku jese. Ucathya. Ivai wakacunga. Endai zve itai zvese zvondakakubvunja kuti uite.’

 Joshuwa wakatuma vafei vaviri kuti vaende ku dhorobha ro Jeriko. Mu ndhorondho inotevera, tinozojija zvizinji ngo pamusoro po zvakaitika kondhoyo.povakaviya, ivona vakananga kuti yainga nguva yakanaka kuti vaende Kanani. Pa njiku yakatevera, Joshuwa wakabvunja vaIziraeri vese kuti vabvise akampamento kana mucaca javo. Perepo wakatuma vapiri kuti vathware bhokiso ro citenderano vacienda ku Murambo wo Jorodhani. Murambo wainga wakazara. Asi, vapiri povakanghwinisa mureje javo mu kumwa, kumwa yakaima kupopoma, kumwa yakaima! Vapiri vakafamba mbhera pakati po murambo voima vamweni povainga vacifamba ngo divi rimweni. Unorangarira kuti mushamaiso uu wakavaceuja zvakavaitira Jehovha pa Jombe ro Kupsuka here?

Pakupejisira, pasure po makore ese aya, vaIziraeri vakanghwina mu Nyika yo Cipikihwa. Ivona vakavaka nyumba no madhorobha. Ivona vaikwanisa kusima zvavaida, muvhinyu no zvimwenivo. Yainga nyika yaipopoma mukaka no uci.

‘Jehovha anozokuseseja njiku jese, anozokugutisa, nokunyati uri pa mabvu akaoma.’ —Isaia 58:11