Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 34

Gidhioni Wakanyisa vaMidhiani

Gidhioni Wakanyisa vaMidhiani

Mu kufamba ko nguva, vaIziraeri vakasiazve kushandira Jehovha zve vakatanga kunamata zvimwari zvo manyepo. Mukati mo makore masere, vaMidhiani vakaba zvinyama zvo vaIziraeri zve vakaparaja zvirimwa zvavo. Kuti vatize vaMidhiani, vaIziraeri vakavanda mu mabambha no mu matundhu. Vakatanga kukumbira kuti Jehovha avaponese. Ngokudaro, Jehovha wakatuma ngirozi kuno mujaha waizwi Gidhioni. Ngirozi yakati: ‘Jehovha wasana iwewe kuti uve muhwi wakavanga.’ Gidhioni wakabvunjisa kudari: ‘Ndingaponesa kudini Iziraeri? Ndiri ani inini.’

Gidhioni waizozivisa kudini kuti Jehovha wakamusana? Iyena wakadira dimbu ro dovo pasi zve wakati kuna Jehovha: ‘Mangwana comangwanani, kudari dovo iri rikabira ngo cando, asi pasi pakaoma, ndinozoziva kuti ndimwi munoda kuti ndiponese Iziraeri.’ Co mangwanani dimbu ro dovo riya rainga rakabira asi pasi painga pakaoma! Asi Gidhioni wakakumbira kuti mu mangwanani anotevera dovo riya raidikana kuoma asi pasi paidikana kubira. Pozvakaitika zvondhozvo, Gidhioni wakaguma pa mbhejiso yo kuti wainga Jehovha wakamusana. Wakaunganija masoca ake kuti aende korhwa no vaMidhiani.

 Jehovha wakati kuna Gidhioni: ‘VaIziraeri vanozowina. Asi ngokuti imwimwi muno masoca akawanda, munozorangarira kuti mawina mwega. Bvunjai vese vaya vari kuthya kuti vanodikana kuhwirira ku muzi.’ Ngo kudaro 22.000 vakahwirira ku muzi zve vakasara 10.000. Perapo Jehovha wakati: ‘Pacino masoca akawanda maningi. Endai navo ku jombe zve vabvunjei vamwe kumwa. Basi vaya vanomwa kumwa vakangwaririra vanozosara newe.’ Basi 300 ndivona vakamwa kumwa vakangwaririra vavengi vavo. Jehovha wakamugondisa kuti vanarume vashoma avo ndivona vanozonyisa 135.000 zvo masoca o vaMidhiani.

Mukati mo usiku wondhoo, Jehovha wakati kuna Gidhioni: ‘Wari yaanguva yo kuhwisa vaMidhiani!’ Gidhioni wakapa vanarume vake mbayapaya no zvijuvi zvavo votanga kukhuwa. Iyena wakavabvunja kudari: ‘Ndisotenyi zve itanyi kamare zvandiri kuitari.’ Gidhioni wakabata mbayapaya, wophwanya cijuvi ciya, wobatisisa mbayapaya zve wokhuwa eciti: ‘Banga ra Jehovha no ra Gidhioni!’. Vese vanokwana kuita 300 o vanarume vakaitavo kudaro. VaMidhiani vakatanga kuthya zve vakagogoma vacikazivi kovarikwenda. Mu kutama kuzwanana, vakatanga kuurayana ngo cavo. Pa bvaza iyi, Jehovha wakabesera vaIziraeri kuti vanyise vavengi vavo.

“Bzizivike kudaro kuti simba rakakura kudaro, rinobva ka Mwari, asi kotiri.” —2 VaKorinto 4:7