Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 32

Mutungamiriri Mupsa no Vanakaji Vaviri Vakacunga

Mutungamiriri Mupsa no Vanakaji Vaviri Vakacunga

Pasure po kutungamirira vandhu va Jehovha pa makore mazinji, Joshuwa wakafa painga no makore anokwana kuita 110. Pa mukuvo wese waakararama, vaIziraeri vainamata Jehovha. Asi pasure po kufa ka Joshuwa, ivona vakatanga kunamata zvidhori, inga zvaaita vaKanani. Ngokuti vaIziraeri avazivi kukwanisa kuramba vacimuteverera, Jehovha wakatendera kuti mambo wo vaKanani waizwi Jhabhini aite kuti upenyu hwavo unese. Vandhu vakatanga kupsaka Jehovha kuitira besero. Ngokudaro Jehovha wakavapa mutungamiriri mupsa, Bharaki. Ndiyena waizobesera kuti vahwirire kuna Jehovha.

Dhebhora inga muporofita, wakadanija Bharaki. Wainga no masoko kuitira iyena akabva ka Jehovha okuti: ‘Torai 10.000 zvo vanarume zve endai koosongana no cikwata co masoca a Jhabhini pa murambo wa Kishoni. Kondhoyo unozonyisa Sizera nduna yo masoko a Jhabhini.’ Bharaki wakati kuna Dhebhora: ‘Inini ndinoenda, asi basi iwewe ungaenda neni.’ Iyena wakati: ‘ndinozoenda newe. Asi zivai kuti andiwepi unozouraya Sizera. Jehovha wakananga kuti mwanakaji ndiyena anozomuuraya.’

Dhebhora wakaenda na Bharaki no masoca ake mbhera ku dhundu ro Tabhori kuitira kunasirira hondo. Sizera paakazviziva, wakaunganija karu jake jo hondo no masoca ake pasi po murambo. Dhebhora wakati kuna  Bharaki: ‘Nyamasi i njiku yo kuti Jehovha anozokupa unyisi.’ Bharaki no 10.000 o vanarume vake, vakaphwanya dundhu kuti vaende koosongana no nduna jinosimba jo masoca a Sizera.

Jehovha wakaita kuti murambo wo Kishoni uzare ngo kumwa. Karu jo hondo ja Sizera jakandondomera mu matope. Sizera wakasia karu jake zve wotanga kugogoma. Bharaki no masoca ake akanyisa masoca a Sizera, asi Sizera wakakwanisa kutiza! Iyena wakatiza zve wakaenda koofindara mu nyumba yo mwanakaji waidanwa Jhaeri. Iyena wakamupa mukaka kuti amwe perapo wakamupekeja cokufuka kuti avate. Ngo kukasika muhwi uwu wakavata. Ngo cinyararire Jhaeri wakatora mbhingu yo tende woikohomera pa musoro pake. Iyena wofa.

Bharaki wakaenda koopsaka Sizera. Jhaeri wakabuda mu tende yake zve wakati: ‘Nghwinai. Ndinozokukhombija mwanarume waaurikupsakaro.’ Bharaki wakanghwina zve wakavona Sizera wakawa zve wainga afa. Bharaki na Dhebhora vakakuja Jehovha ngo ndumbo kuitira kupa vaIziraeri unyisi ngo pamusoro po vavengi vavo. Pa 40 o makore akazotevera, vaIziraeri vakava no runyararo.

‘Vanakaji vanozivisa masoko akanaka iuto guru.ʼ—Nduyo 68:11, Shanduro yeNyika Itsva.”