Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 24

Ivona Vakaphwanya Cigondiso Cavo

Ivona Vakaphwanya Cigondiso Cavo

Jehovha wakati kuna Mosi: ‘Viyai kuno, pa dundhu. Ndinozotara mutemo jangu pa mapuwe akaita cipande perapo ndokupekeja.’ Mosi wakakhwira pa dundhu wopeja 40 o njiku, masikati no usiku. Paainga ari kondhoyo, Jehovha wakatara gumi ro Mutemo pa mapuwe maviri akaita cipande zve wakapekeja Mosi mapande aya.

Pasure po nguva nganani, vaIziraeri vakarangarira kuti Mosi wavasia. Vakabvunja Aroni kuti: ‘Tiri kuda mundhu umweni kuti atitungamirire. Tiitirei mwari!’ Aroni wakati: ‘Ndipekejenyi goridhe renyu.’ Iyena wakanyungurusa goridhe zve voita cithombe co thoyo. Vandhu vakati: ‘Thoyo iri ndiyena Mwari wedu wakatitungamirira kubva mu Ejipita!’ Vakatanga kunamata thoyo ro goridhe, zve vakatoritambira. Zvainga zvakanaka here? Haiwa! Ngo kuti vandhu vainga vakagondesa kuti vaizonamata Jehovha basi. Asi wari vainga veciphwanya cigondiso ici.

 Jehovha waizvivona zvaingari zveciitika, zve wakabvunja Mosi kuti: ‘Bzukai. Vandhu vari kundishaishira zve vari kunamata zvimwari zvomanyepo.’ Mosi wakabzuka pa dundhu, no zvipande zviviri.

Paakakhwedera ku akampamento kana mucaca, Mosi wakazwa vandhu veciimba. Zve wakavavona vecitamba vecigwadamira thoyo. Mosi wakanyangajwa maningi. Iyena wakakhandira pasi zvipande zviviri zviyani, zve zvakapera kuphwanyika. Iyena wakaenda koophwanya cithombe ciya ngo kukasika. Perapo wakabvunjisa Aroni kuti: ‘Zvaitisa kudini kuti vandhu vakukhohwese kuti uite ciro cinonyangajisa kudari?’ Aroni wakati: ‘Ucanyangajwa. Unouziva mushovo wo vandhu ava. Ivona vaida cimwari, ngo kudaro ndakakhandira goridhe ravo pa muriro robuda thoyo iri!’ Aroni aacaidikanepi kuita kudaro. Mosi wakahwirirazve ku dundhu zve wodeketerera Jehovha kuti aregerere vandhu.

Jehovha wakaregerera vayani vainga vecida kumuzwira. Zvaisisira maningi kuno vaIziraeri kuzwira matungamirire a Mosi, andizvopi?

“Bziri nane kutama kugondesa ciro, kupinda kugondesa no kutama kubziita.”—Mucumaeri 5:4