Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJOJO 28

Mbongoyo ya Bharama inovereketa

Mbongoyo ya Bharama inovereketa

VaIziraeri vakaramba vari muzvipare ko 40 o makore. Ivona vainga vanyisa madhorobha mazinji akavanga. Wari, pavainga vaciri mu mapani o Moabhi ngo kumavira zuva ko Murambo wa Jordhani, yainga nguva yokuti vanghwine mu Nyika Yakagondiswa. Bharaki, mambo wo ku Moabhi, wainga ecithya kuruza nyika yake ngondava yavo. Ngokudaro wakakoka mwanarume umweni waizwi Bharama kuti aviye Moabhi kootuka vaIziraeri.

Asi Jehovha wakati kuna Bharama: ‘Audikani kutuka vaIziraeri.’ Ngokudaro Bharama wakaramba kuzviita. Mambo Bharaki wakamukoka kocipiri zve wakamugondisa kumupa ciro ciri cese caaida. Pikija zvakadaro, Bharama wakaramba. Perepo Mwari wakati: ‘Endai, asi unozonanga basi zvandinozokubvunja kuti unange.’

Bharama wakapakira pa mbongoyo yake oenda Moabhi. Wainga wakaronga kutuka vaIziraeri, pikija Jehovha wainga wakamubvunja kuti aadikani kuzviita. Ngirozi ya Jehovha yakamubudira katatu mu gwanja. Bharama aazivi kukwanisa kuvona ngirozi, asi mbongoyo ya Bharama yakakwanisa kuivona. Pakutanga, mbongoyo yakabuda mu gwanja yoenda mu sora. Perepo mbongoyo yakaenda pa mufimbiji wo buwe, yokhwesa soka ya Bharama pabuwepo. Pakupejisira mbongoyo yakawa pakati po citaka. Pa nguva imwe nga imwe, Bharama waitaka mbongoyo.

No papera nguva ndhatu, Jehovha wakaita kuti mbongoyo iverekete. Mbongoyo yakati kuna Bharama: ‘Ngenyi uri kuramba wecinditaka?’ Bharama wakati: ‘Ngenyi uri kundiitisa rethe? No ndainga ndinobanga ndaizokuuraya nyamasi.’ Mbongoyo yakati: ‘Wakabvira kare wecindipakira. Ndakambozviitazve izvi?’

Perapo Jehovha wakaita kuti Bharama avone ngirozi iya. Ngirozi yakati: ‘Jehovha aadi kuti wende kootuka vaIziraeri.’ Bharama wakati: ‘Ndashaisha. Ndinohwirira kanyi.’ Asi ngirozi yakati: ‘Ungaenda hako ku  Moabhi, asi endai koonanga basi zvaanozokubvunja Jehovha kuti unange.’

Bharama wakajija ngo ciitiko ici here? Haiwa. Kundobva apa Bharama wakaenda kootuka vaIziraeri katatu, asi vhaza imwe nga imwe, Jehovha wakaita kuti Bharama akomborere vaIziraeri kunja ko kuvatuka. Pakupejisira, vaIziraeri vakataka Moabhi, zve Bharama wakaurawa. Kudari Bharama naakazwira Jehovha pa vhaza yo kutanga, zvaizova zvakadini?

‘Basopanyi muemuro yese! Ngokuti, pikija muve no bzizinji, apana anopona ngo ndava yo upfumi.’—Luka 12:15.