Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 26

Vafei Gumi no Vaviri

Vafei Gumi no Vaviri

VaIziraeri vakabuda pa Dundhu ro Sinai voita hwendo ngo mucipare co Parani mbhera voguma ndau yaizwi Kadheshi. Kondhoyo Jehovha wakati kuna Mosi: ‘Tumai 12 o vanarume, umwe wo jinja rimwe, kuti vafee nyika yo Kanani, nyika yandinozopa vaIziraeri.’ Ngo kudaro Mosi wakasana 12 o vanarume wovabvunja kuti: ‘Endanyi Kanani zve vonanyi dangani nyikeyo yakanaka kuti irimwe zvokuha. Vonanyi dangani vandhu vo kondhoyo vakaremba kana vakavanga dangani vanogara mu matende kana mu madhorobha.’ Vafei 12, kubatanijavo Joshuwa na Karebhi, vakaenda Kanani.

No papera 40 o njiku, vafei vakahwirira, vakatora mafigu, maromaa no uvha. Vafei vakaviya no masoko aya: ‘Nyika yakanaka, asi vandhu vokondhoyo vakavanga zve madhorobha ano mufimbiji jakakura.’ Asi Karebhi wakati: ‘Tingavanyisa. Ngatende koovahwisa wari!’ Unozviziva kuti ngenyi Karebhi wakananga izvo? Ngokuti iyena na Joshuwa vaithemba Jehovha. Asi vafei 10 vamweni vakati: ‘Haiwa! Vandhu vokondhoyo vakakura kudari inga magakanyara! Takadari inga matoto kwavari.’

VaIziraeri vakapejwa simba. Vakatanga kungun’gta zve vacibvunjana ngocavo: ‘Ngatende tisane mutungamiriri umweni tihwirire Ejipita. Ngenyi tinodikana kuenda kourawa ku nyika iyo?’ Joshuwa na Karebhi vakati:  ‘Mucapandukira Jehovha zve mucathya. Jehovha anozotijivirira.’ Asi vaIziraeri vakaramba kuzwa. Ivona vakatoda kuuraya Joshuwa na Karebhi!

Jehovha wakaitenyi? Iyena wakati kuna Mosi: ‘Pasure po zvese zvondakaitira vaIziraeri, ivona avadi kundizwira basi. Ngokudaro vanozogara mu zvipare muno mbhera 40 o makore zve vanozofira muno. Basi vana vavo na Joshuwa na Karebhi vanozorarama mu nyika yondakavapikira.’

“Munothya ngenyi, vandhu vokutenda padoko?”—Mateu 8:26