Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 18

Pfiba Riri Kubwaka

Pfiba Riri Kubwaka

Mosi wakagara ku Midhiani ku 40 o makore. Iyena wakarovora zve wakava no vana. Pa njiku imweni paainga ecihavisa mabvuta ake phedo no Dundhu ro Sinai, wakavona ciro cinothyisa maningi. Pfiba rainga recibwaka, asi aricaingepi recipsa! Mosi paakanghwedera kuti avone ngenyi zviri kuitika, iyena wakazwa izwi ricibva pa pfiba riya reciti: ‘Mosi! Ucaguma phedo maningi. Bvurai magwada ako ngo kuti wakaima pa ndau yakacena.’ Wainga Jehovha waivereketa ecishandisa ngirozi.

Mosi wainga ecithya maningi, ngokudaro wakafukija mu meso make. Izwi rakatizve: ‘Ndavona kutambujika ko vandhu vangu mu Ejipita. Ndicavaponesa kubva muEjipita zve vanghwine mu nyika yakanyara. Iwewe ndiwe unozotungamirira vandhu vangu kuti vabude mu Ejipita.’ Amurangariri kuti Mosi wakakahamara ndizvona here?

Mosi wakabvunjisa kudari: ‘Ndinozonanga kudini kudari vandhu vakandibvunjisa kuti ndiani wandituma?’ Mwari wakamudavira eciti: ‘Unozovabvunja kuti Jehovha, Mwari wa Abhirahama, Mwari wa Izaki, Mwari wa Jakobe wandituma.’ Mosi wakadavira kudari: ‘Waro kudari vandhu vakatama kundipurukira keni?’ Jehovha wakapa Mosi citatijo caizomubesera. Iyena wakakumbira kuti Mosi akhandire ndonga pasi. Perapo ndonga yakava nyoka! Mosi paakabata nyoka ngo mushe waiyo, yakavazve ndonga. Jehovha wakati: ‘Ukaita mushamaiso iyi, vanozotenda kuti ndini ndakutuma.’

Mosi wakati: ‘Andikwanisi kuvereketa ushoni.’ Jehovha wakamugondesa eciti: ‘Ndinozokubvunja zvaunodikana kuvereketa, zve ndinozokutumira no hama yako Aroni kuti ive mubeseri wako.’ Eciziva kuti Jehovha wainga naye, Mosi wakatora mukaji wake no vana vake wohwirira ku Ejipita.

“Mucathimwa-thimwa ngo bzo munoda kuvereketa dangani kureva; mukuvo wondhowo munozobvunjwa bzinodikana kuvereketa.”—Mateu 10:19