Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 13

Jakobe na Izau Vanoita Runyararo

Jakobe na Izau Vanoita Runyararo

Jehovha wakagondisa kuti waizongwarira Jakobe kudari inga wakangwarira Abhirahama na Izaki. Jakobe wakazogara pa ndau yaidanijwa kuti Harani, iyena wakazorovora kondhoyo, wakava no mbhuri huru zve wakaguma pa kuva mukhupuki.

Mu kufamba ko nguva Jehovha wakati kuna Jakobe: ‘Hwirirai ku nyika yako.’ Ngokudaro Jakobe no mbhuri yake vakatanga hwendo hwakakura kuti vahwirire. Povainga veciita hwendo hwavo vandhu vamweni vakati kuna Jakobe: ‘Hama yako Izau iri kuviyavo no 400 o vanarume vari pamwepo naye!’ Jakobe waithya kuti Izau waida kumukhuvaza pamwepo no mbhuri yake. Wakaita mukumbiro kuna Jehovha eciti: ‘Ndapota ndiponesenyi mu nyara jo hama yangu.’ Pa njiku yakatevera, Jakobe wakatumira Izau zvipo zvakadari inga mabvuta mazinji, mbuji, nombe, makamera no maburu.

Co usiku Jakobe paainga ega, iyena wakavona ngirozi! Ngirozi yakatanga kutakana naye. Ivona vakatakana mbhera comangwanani. Pikija Jakobe wakahwajihwa, iyena aazivi kuregera. Ngirozi yakati: ‘Ndisiei ndipinde.’ Asi Jakobe wakati: ‘Andikusii, ucakandikomborera.’

Pakupejisira ngirozi yakazokomborera Jakobe. Wari Jakobe anoziva kuti Jehovha aazosii kuti Izau amukhuvaze.

Co mangwana fumi, Jakobe wakasota ngo ndhambo zve wakavona Izau no 400 o vanarume. Jakobe wakaenda pamberi po mbhuri yake  zve wogwadama kanomwe pambeji po hama yake. Izau wakagogoma zve wokumbatira Jakobe. Vovaviri vakatanga kurira zve voita runyararo. Unorangarira kuti Jehovha wakazwa kudini ngo pamusoro po mabatire akaita Jakobe mugariro uu?

No papera nguva, Izau wakaenda ku muzi kwake zve Jakobe wakaenderera mberi no hwendo wake. Jakobe wakava no vana vaikwana 12. Mazina avo nga aya: Rubheni, Simeioni, Revhi, Judha, Dhani, Nafitari, Ghadhi, Asheri, Isakari, Zebhuroni, Jasefa na Bhejamini. Umwe wo vana vondhovo ndi Jasefa, uwo wakashandiswa ndi Jehovha kuti aponese vandhu Vake. Unoziva kuti wakaitisa kudini? Ngatende tizvivone basi.

Rambanyi ‘mucidisa vakorore venyu; kumbiriranyi vanomuteverera, Mukadaro munozoita vana va Baba wenyu vari mugore.’—Mateu 5:44, 45