Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 99

Muvonereri o Mukadheya Anojija Cokwadi

Muvonereri o Mukadheya Anojija Cokwadi

Ku dhorobha ro ku Firipi, kwainga no umwe musikane wainga muranda zve wainga no dhimoni. Dhimoni iro raiita kuti musikane wiya afembere zve iyena waiwana mare yakawanda maningi kuno majitenji ake. Pauro na Sira pavakaenda ku Firipi, musikane wiya wakaita mazuva akawanda ecivateverera. Dhimoni riya raiita kuti iyena amime kuti: “Vandhu ava vanobatira Mwari Mukuru-kuru, votokotesa komuri gwanja ro ruponeso.” Pauro wakati ku dhimoni: ‘Mu zina ra Jesu, ndinokutonga kuti ubude mu musikane uu!’ Ngo kudaro dhimoni rakabuda.

Majitenji o musikane paakavona kuti avacaizokwanisazve kuwana mare ngo pamusoro pake, vakacamwa maningi. Vakakhwekhwereja Pauro na Sira vovaendesa ku utongi, veciti: ‘Vanarume ava vari kuphwanya mutemo zve vari kukanganisa dhorobha rese!’ Vandhu vakakumbira kuti Pauro na Sira varohwe zve vadihwe mukadheya. Muvonereri o mu kadheya wakavadira pa ndau yakaita cidima zve wovasungira murenje pamatanda.

Pauro na Sira vakatanga kuimba ndumbo jinokuja Jehovha zve vasungwa vamweni vakatanga kuteverera. Pakati po usiku, kwakava no kuzungunyika ko pasi kwakaphwanya kadheya. Musuvo jo mukadheya jakafununguka zve vandhu vainga vakasungwa vakabuda. Muvonereri wo mukadheya wakaenda mukati zve wakavona musuvo jese jainga jakafununguka. Ecirangarira kuti vasungwi vese vainga vatiza, wakatora banga zve woda kujiuraya.

Pondhopo, Pauro wakamima kuti: ‘Ucajiuraya!’ Tese tiri muno! Muvonereri wakagogoma woenda kuna Pauro na Sira, ogwadama. Iyena wakabvunjisa kuti: ‘Ndingaitenyi kuti ndiponeswe?’ Ivona vakapingura kuti: ‘Tendai Jesu Kristu iwewe no mbhuri yako munozoponeswa.’ Perapo Pauro na Sira vakamujijisa soko ra Jehovha zve muvonereri wo kadheya pomwe no mbhuri yake vakabhabhatijwa.

“Vanozomusunga no kumuteverera; vozomupa mu masinagoga no mu gunia; vozomuendesa ku majimambo no vatungamiriri vo nyika ngo ndava yo zina rangu. Ibzi bzese bzinozomupa mukuvo wo kuita ufakazi.”—Luka 21:12, 13