Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 88

Jesu Anosungwa

Jesu Anosungwa

Jesu no vapostori vakafamba ngo mubani ro Kidhroni vacienda ku Dundhu ro Maorivhe. Painga pakati po usiku zve mweji wainga wakazara. Pavakaguma ku munda wo Getsemani, Jesu wakati kwavari: ‘Garanyi pano, mecirinda.’ Perapo Jesu wakaenda acikaya-kaya mu munda zve wakagwadama. Acineseka maningi, wakaita mukumbiro kuna Jehovha eciti: “Ngakuitwe kuda kwenyu.” Jehovha wakatumira ngirozi kuti imuvangise. Jesu paakahwirira kwainga no vapostori vake, wakavakhanda vakavata. Iyena wakati: ‘Mukanyi! Iyi asipi nguva yo kuvata! Nguva yokuti nditohwe ngo vavengi vangu yaguma.’

Acinganonoki Judha wakaviya, ecitungamirira vandhu vazinji vainga no maponda no mapanga. Judha waikuziva kwaizowanira Jesu ngo kuti vaimboenda vese ku munda wondhowo. Judha wakabvunja masoca kuti waizokhombija kuti Jesu ngo wapi. Iyena wakaenda kuna Jesu wonanga kuti: ‘Makadini, mujijisi’ perapo womupsompsa.’ Jesu wakati: ‘Judha uri kundipsompsa kuti unditengese?’

Jesu wakaima pambeji po bungano riya wobvunjisa kuti: “Muri kupsaka ani?” Ivona vakati: “Jesu wo Nazareta.” Iyena wakapingura kuti: “Ndini,” bungano yakahwirira ngo sure, yowa pasi. Jesu wakabvunjisazve bungano kuti: “Muri kupsaka ani?” Ivona vakapingurazve kuti: “Jesu wo Nazareta.” Jesu wakadavira kuti: ‘Ndamubvunja kare kuti ndini. Kudari mecindipsaka, regeranyi ava kuti vapinde.’

Pedru paakavona zvainga zviciitika, wakabvisa banga wotema njeve ya Marko, mushandi wo mupiri mukuru. Asi Jesu wakabata njeve yo mwanarumewo woirapa. Perapo iyena wakati kuna Pedru: ‘Hwirijai banga mu ndau yaro. Kudari ukashandisa banga pa kuhwa, unozofa ngo banga.’ Masoca akabata  Jesu omusunga mukono, pondhopo vapostori vake vakatiza. Perapo bungano rakamuendesa kuna Anania, mutungamiriri wo vapiri. Anania wakaita mubvunjo kuna Jesu, perepo omuendesa kanyi ko mupiri Mukuru Kaifasi. Asi zvicinyi zvakaitika no vapostori?

“Munozotambujika pasi pano. Kaveta, gondanyi: Inini ndakanyisa nyika yo Pasi.”—Johani 16:33