Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 77

Jesu no Mwanakaji Musamaria

Jesu no Mwanakaji Musamaria

No papera phasika, Jesu no vajiji vake vakaita hwendo kuenda ku Garirea, asi vacito vaguma vakakhirira ngo kuSamaria. Pavainga phedo no dhorobha ro Sikari, Jesu wakaima pa ndau yaidanijwa mwimbo wa Jakobe. Painga ecizorora, vajiji vake vakaenda ku dhorobha kootenga zvokuha.

Mwanakaji umweni anoviya ku mwimbo koocera kumwa. Jesu anoti kwaari: “Ndipei kumwa.” Iyena anoti: ‘Ngenyi muri kuvereketa na inini? Ndiri mwanakaji wo muSamaria. VaJudha avabhuisani no vaSamaria.’ Jesu wakamubvunja kuti: ‘Kudari no waizviziva kuti ndini ani, wondikumbira kumwa ndaizokupa kumwa yo upenyu.’ Mwanakaji wo muSamaria anobvunjisa kuti: ‘Muri kuda kunangenyi? Apa amuna co kucera ndicona.’ Jesu wakati: ‘Ari wese anomwa kumwa yandinomupa azozwi nyota.’ Mwanakaji wakati: “Tenji, ndipenyi kumweyo.”

Ngokudaro, Jesu wakati kwaari: ‘Endai kotora murume wako uviye naye.’ Iyena wakati: ‘Andina murume.’ Jesu wakati: ‘Wananga zvokadi. Ngokuti wainga wakarovohwa ngo vanarume vashanu, asi waunogararo naye asipi mwamunako ngo kuti auzivi kucadha naye.’ Mwanakaji wakati: ‘Ndiri kuvona kuti muri muporofita. Vandhu vangu vanotenda kuti tinganamata Mwari pa dundhu iri, asi vaJudha vanonanga kuti tinodikana kunamata ku Jerusarema basi. Ndinotenda kuti kudari Mesia wakaviya, anozotijijisa kuti tinganamatisa kudini.’ Jesu anonanga ciro cokuti ato wabvunja ariwese anoti: ‘Ndini Mesia.’

 Mwanakaji wakagogoma woenda mu dhorobha koobvunja vaSamaria kuti: ‘Ndinorangarira kuti ndawana Mesia. Iyena anoziva zvese ngo pamusoro pangu. Vianyi zve vonanyi!’ Vandhu vakamutevera ku mwimbo zve vakapurukira jijiso ja Jesu.

VaSamaria vakakoka Jesu kuti agare mudhorobha ravo. Wakagara mazuva maviri ecivajijisa zve vazinji vakatenda. Ivona vakabvunja mwanakaji muSamaria kuti: ‘Tinotenda, asipi ngo ndava yo mazwi ako, itisu tazwa tega, toziva kuti ndiyena kamare Muponesi wo nyika yo pasi.’

“Izai! Wiya anozwa ngaanangevo: Izai! Ndiani ano nyota, ngaaze; ndiani anoemura ngaaxire ngo unyaxa kumwa yo uhomi.”—Apokalipsi 22:17