Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 70

Ngirozi Jinozivisa kubahwa ka Jesu

Ngirozi Jinozivisa kubahwa ka Jesu

Mutongi wo Umambo wo Roma, Sezari Augustu, wakapa mutemo wo kuti vaJudha vese vaidikana kuhwirira mu madhorobha avo kuti vatarihwe. Ngo kudaro Josefa na Maria vakaita hwendo kuenda ku Bheterehema, kwaibva mbhuri ya Josefa. Maria wainga ari phedo maningi kuti abare.

Pavakaguma ku Bheterehema, kwainga no ndau imwe basi yainga yasara kuti vagare, yainga ndau yaivatira zvinyama. Maria wakabara mwana wake Jesu mondhomo. Wakamufukija ngo macira zve womurajika mu citengu caihira zvifuyo.

Phedo no Bheterehema painga no vahavisi vaiejehwa vecirindira mushambi javo. Ngo civhumbu, vakavona ngirozi yakaima pamberi pavo zve goja ra Jehovha rakavabvenekera. Vahavisi vaithya maningi, asi ngirozi yakati: ‘Mucathya. Ndaza komuzivisa masoko akanaka. Kwabahwa  Mesia nyamasi ku Bheterehema.’ Pa nguva yondhoyo, vakatanga kuvona ngirozi jakawanda mudenga, jeciti: ‘Ngaakujwe Mwari mugore, ngavagarisike, pasi pano vandhu vakasikwa ndiyena.’ Perapo ngirozi jakangarangara. Vahavisi vakaitenyi?

Ivona vakatanga kubhuya ngo cavo veciti: ‘Ngatende Beterehema.’ Ivona vakaenda ngo kukasika zve vakavona Josefa na Maria no cimwana cakarajikwa pa citengu.

Vese vaya vaizwa zvakabvunjwa vahavisi ngo ngirozi vaishamaisika. Maria wakarangarira maningi ngo pamusoro po masoko o ngirozi iya zve aazivi kumakanganwa masokowo. Vahavisi vakahwirira kwainga no mushambi wavo, vecibonga Jehovha ngo zvese zvavainga vavona no kuzwa.

“Inini ndakabva ka Mwari ndoza muno. Andizivi kuza ngocangu; kaveta ndiyena wakandituma.”—Johani 8:42