Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 73

Johani Anonasirira Gwanja

Johani Anonasirira Gwanja

Johani, mwana wa Zakaria na Erizabheti, paakakura wakava muporofeti. Jehovha wakashandisa Johani kuti ajijise vandhu kuti Mesia waenga eciviya. Kunja ko kujijisa mu ndharaunda no mu madhorobha, Johani wakaenda kojijisa muzvipare. Vandhu vaibva Jerusarema no mu Judheya mwese vaiviya kojijiswa ndi Johani. Iyena waivajijisa kuti vaidikana kusia zviro zvakashata kuti vadakarihwe ndi Mwari. Pakupera kuzwa zvainangwa ndi Johani, vazinji vakatendeuka ku zvishaishi zvavo zve Johani wakavabhabhatija mu Murambo wo Jordhani.

Johani waipona upenyu wakareruka. Zvokusimira zvake zvainga zvo matovo zve waiha ndogwe no uci hwo musora. Vandhu vazinji vaida kuziva Johani. Pikija vaFarisi no vaSadhuki avo vaizvikuja maningi vakaviyavo kwaari. Johani wakati kwavari: ‘Imwimwi munodikana kucinja mararamiro enyu zve mokhauya. Mucazvivona inga munosisira ngo kuti munoti muri vana va Abhirahama. Zvondozvo azvinangi kuti muri vana va Mwari.’

Vakawanda vaiviya kuna Johani vecimubvunjisa kuti: ‘Toitenyi kuti tidakajise Mwari?’ Johani wakabvunja vaJudha kuti: ‘Inga muno nguvo mbiri, pekejanyi imwe kuno vaya vacina.’ Unoziva kuti ngenyi waibhuya kudaro? Iyena waida kuti vajiji vake vazive kuti vaidikana kuda vandhu kuti vadakarihwe ndi Mwari.

Johani wakabvunja vashabisi kuti: ‘Ivanyi vakagondeka zve mucabira vandhu.’ Iyena wakabvunja masoca kuti: ‘Mucanyepa zve mucaeja kutora mare yo vamweni.’

 Vapiri no vaRevhi vakaviyavo kuna Johani vomubvunjisa kuti: ‘Ndiwe ani? Vandhu vese vari kuda kukuziva.’ Johani wakati: ‘Ndini izwi rinokhuwa mu zvipare, rinotungamirira vandhu, kuna Jehovha inga zvakabhuiwa ndi muporofeti Isaia.’

Vandhu vaidakarira zvaijijiswa ndi Johani. Vazinji vairangarira kuti Johani wainga Mesia. Iyena wakavabvunja kuti: ‘Kuno mundhu umweni mukuru arikuviya. Andinakiri  kuthwara magwada ake. Inini ndinobhabhatija ngo kumwa, asi iyena anobhabhatija ngo mujimu mucena.’

“Wakaza inga fakazi koita ufakazi hwo ruveneko, kuti vese vatende ngo njio yake.”—Johani 1:7