Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 62

Umambo Wakaezana no Muti Mukuru

Umambo Wakaezana no Muti Mukuru

Usiku umweni, Nebhukadhinezari wakarota hope jaithyisa maningi. Iyena wakadanija vanarume vake vakangwara kuti vamubvunje zvojaireva. Asi apana na umwe waikwanisa kujidurujira. Pakupejisira, mambo wakabvunja Dhanieri.

Nebhukadhinezari wakabvunja Dhanieri kuti: ‘Mu hope jangu, ndakavona muti. Muti wakona waikura zvokuti waiguma atee mugore. Mativi ese o nyika zvaikwanisika kuvona mutiwo. Iwona wainga no masakani akanyara maningi zve no mucero jakawanda. Zvinyama zvaidakarira kuviya kozorora pasi po mumvuriri wawo zve shiri jaivaka saki jajo pa matavi. Kwakaviya ngirozi yecibva mu gore. Iyona yakati: ‘Temanyi muti, ngautemwe matavi awo. Asi siyanyi ciki no muji jawo mu mabvu zve diranyi panyezuru junguja ro simbi no ndarama. Mwoyo wo muti waizocinja pa ndau po mundhu, wozoita wo nyama, zve panozokhirira mukuvo munomwe. Vandhu vese vanozoziva kuti Mwari ndiyena Mutongi zve anokwanisa kupekeja umambo ku vese vaya vaanoda.’’

Jehovha wakaita kuti Dhanieri azive hope zvo jaireva. Dhanieri pa kazviziva. wakatanga kutya. Iyena wakati: ‘Haiwa mambo, Inini ndaida kuti hope iji jikwanirisike kuna vavengi venyu, asi jicaitika kwamuri. Muti mukuru wakatemwaro ndimwi. Imwimwi munoruza umambo hwenyu zve munozoha mauswa inga zvinyama zvo musora. Asi ngo kuti ngirozi yakananga kuti musiye ciki no miji, perapo munozoitazve mambo.’

Kupera ko gore rimwe, Nebhukadhinezari waifamba pa nyezuru po denga rake, ecikahamara ngo Bhabhironia. Iyena wakati: ‘Vonai modha rakanyara dhorobha iri randakavaka. Vonai ndiri mukuru.’ Painga ecibhuya, kwakazika rimwe izwi ricibva mugore reciti: ‘Nebhukadhinezari wari iwewe waruza umambo wako.’

Pa nguva yondhoyo, Nebhukadhinezari wakatanga kupenga zve wakatanga kuita inga cinyama. Wakabudiswa pa denga rake zve wakagara no zvinyama zvo musora. Bvuji ra Nebhukadhinezari rakakura kuita inga zimbau ro hokotora, zve zvikunwe zvakareba inga zvo shiri.

 Pakupera po makore 7, Nebhukadhinezari wakavazve mundhu waushoni zve Jehovha wakamusia kuti aitezve mambo wo Bhabhironia. Nebhukadhinezari wakati: ‘Jehovha, ndi Mambo wo ku matenga. Wari ndoziva kuti Jehovha ndiyena Mutongi. Anododokesa vandhu vanozvikuja zve iyena anopekeja umambo wiya waanoda.’

“Theka rinotungamirira rufu; Mwiha uno baya unotungamirira uwisi.”—Mazwi Akangwara 16:18