Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 60

Umambo Ucikazoparajwi

Umambo Ucikazoparajwi

Mu njiku imweni co usiku, Mambo Nebhukadhinezari wakarota hope jainesa kuzwisisa. Jakamunesa maningi zvokuti aazivi no kukwanisa kuvata. Iyena wakadanija vaiti vo zvomasaramuso zve wakati kwavari: ‘Ndidurujirenyi zvondakarota.’ Ivona vakati: ‘Tibvunjenyi zvomakarotaro, mambo.’ Asi Nebhukadhinezari wakavadavira kuti: ‘Haiwa! Imwimwi ndibvunjenyi zvondakarota, mukaregera kundibvunja ndinomuuraya mwese.’ Ivona vakamubvunjazve kuti: ‘Tibvunjenyi zvomakarotaro, perapo tinozomudurujira.’ Iyena wakati: ‘Imwimwi mwese muri kuda kundieja. Inini ndananga ndibvunjenyi hope jondakarota!’ Ivona vakabvunja mambo kuti: ‘Akuna mundhu anokwanisa kuita izvi. Zvamunoda waro kuti tiite azvikwanisiki.’

Nebhukadhinezari wakanyangajwa maningi zvokuti wakabvunja vanarume vese vakangwara vainga munyika mondhomo kuti vauraiwe. Izvi zvaibatanija Dhanieri, Shadreki, Misheki na Abhedhenego. Dhanieri wakakumbira mambo kuti amupe nguva. Iyena no shamwari jake vakabva vaita mukumbiro kuna Jehovha vacikumbira kuti vabesehwe. Jehovha wakaitenyi?

Mu civoniso, Jehovha wakabvunja Dhanieri hope jainga jakarotwa ndi Nebhukadhinezari zve wakavasanangurira zvajaireva. Mu njiku yakatevera, Dhanieri wakaenda kovona mu mushandiri wa mambo zve wakati: ‘Mucauraya vanarume vakangwara. Inini ndinokwanisa kudurujira hope ja mambo.’ Mushandiri wakatora Dhanieri woenda kuna Nebhukadhinezari. Dhanieri wakati kuna mambo: ‘Mwari waita kuti muzive zvicazoitika kumbeji. Hope jomakarota nga iji: Makavona mufananijo wo cithombe caenga no musoro wo ndarama, diti no mukono wo sirivha, ndani zve no mutezo wo utare, mukumbo jainga jo simbi, zve soka jainga jo simbi jaibvenganijwa no mabvu. Perepo kwakabhwemuka buwe recibva ku dundhu, zve rakataka soka jo cithombe jo parajika. Cithombe ciya cakaparajika kuita bukuta. Buwe riya rakaphinduka kakuita dundhu rakakura zve rakazaja nyika yese.’

 Dhanieri wakati: ‘Izvo ndizvona zvinonangwa ngo hope jenyu: Umambo hwenyu ndiwona musoro wo ndarama. Sirivha inoimirira umambo ucazotonga pasure penyu. Pacazova no umambo humweni wakaita inga utare, ucazotonga mu nyika yese. Umambo ucazotevera unozova wakavanga inga simbi. Pakupejisira, pacazova no umambo hwakapaurana divi rawo wakavanga inga simbi zve dive rimweni rinozova rakarembejeka inga mabvu. Buwe rinozoviya rinoimirira Umambo hwa Mwari. Hunozokwiya-kwiya no kupeja humambo humweni hwese zve ihwona hunozogara mbhera narini.’

Nebhukadhinezari wakagwadama pambeji pa Dhanieri no hope yake yakasota pasi. Iyena wakati: ‘Mwari wako wakakukhombija hope iji. Akuna Mwari wakaezana naye.’ Kunja ko kuuraya Dhanieri, Nebhukadhinezari wakaita kuti Dhanieri ave mukuru wo vanarume vese vano uzivi zve kuti ave mutongi ku Bhabhironi. Wakwanisa kuvona kuti Jehovha wakapingurisa kudini Dhanieri?

“Mujimu iya yakaunganija majimambo pa ndau inodanwa Harmagedoni, mu ciheberi”.—Apokalipsi 16:16