Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 57

Jehovha Anotumira Jeremia Kocumaera

Jehovha Anotumira Jeremia Kocumaera

Jehovha wakasana Jeremia kuti ave muporofita wo vaJudha. Iyena wakamubvunja kuti acumaere vandhu vo kondhono zve ecivangwaja kuti varegere kuita zviro zvakashata. Jeremia wakati: ‘Asi inini Jehovha, ndiciri mwana mudoko. Andikwanisi kuvereketa no vandhu.’ Jehovha wakati kwaari: ‘Ucathya. Ndinozokubvunja zvaunodikana kuvereketa. Ndinozokubesera.’

Jehovha wakabvunja Jeremia kuti aunganije vakuru vaitungamirira vandhu, perepo ophwanya dongo kumbeji kwavo, zve woti: ‘Jerusarema riri kuda kuparajwa inga dongo iri.’ Jeremia paakaita zvaakabvunjwa ndi Jehovha, vakuru vaya vakanyangajwa maningi. Umwe mupiri waidanijwa Pashuri wakataka Jeremia perapo wo musungira pa danda. Jeremia wakapeja usiku wese acikakwanisi no kucukunuka. Pashuri wakazomusujunura pa njiku inotevera co mangwanani. Jeremia wakati: ‘Andicazvikwanisi. Wari andicadizve kwenda kocumaera.’ Kureva kuti iyena wakaramwa? Haiwa. Jeremia paakanasa kurangarira ngo pamusoro pazvo, iyena wakati: ‘Masoko a Jehovha akaezana no muriro mukati mwangu. Azviiti kuti ndiregere kucumaera.’ Jeremia wakaramba acingwaja vandhu.

No papera makore akati kuti, vaJudha vakava na mambo mupsa. Vapiri no vaporofita vokunyepa vainga vacingadakariri zvaibhuiwa ndi Jeremia. Ivona vakabvunja vatungamiriri kuti: ‘Mundhu uwu anofanera kufa.’ Jeremia wakati: ‘Imwimwi mukandiuraya, munouraya mwanarume acina ndava. Inini masoko andinovereketa anobva kuna Jehovha, aabvi kwandiri.’ Apo vatungamiriri povakazvizwa, ivona vakati: ‘Mwanarume uwu aafaneri kufa.’

 Jeremia wakaramba acicumaira zve vapiri vakanyangajwa maningi ndiyena. Vakakumbira mambo kuti vauraye Jeremia. Mambo wakananga kuti vaite zvavaida kuna Jeremia. Ivona vakatora Jeremia zve vomukhandira mudima rakajika rainga no matope, vairangarira kuti anofira mondhomo. Jeremia wakatanga kuzamihwa kana kudodomera mu matope.

Mumwe mukuru anodanijwa Ebhedhi-mereki wakabvunja mambo kuti: ‘Vapiri vakhandira Jeremia mudima! Iyena wakatama kubuda mukatimo, anofiremo mondhomo.’ Mambo wakatuma Ebhedi–mereki kuti atore vanokwana kuita 30 kuti vabudise Jeremia mudima. Tingavavo inga Jeremia, wiya aazivi kuregera ciri cese kuti cimuite kuti aregere kucumaera?

“Imwimwivo munozonyenywa ngo vese ngo ndava yo zina rangu. Wiya anovangirira mbhera kupejisira, anozoponeswa.”—Mateu 10:22