Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 67

Mufimbiji jo Jerusarema

Mufimbiji jo Jerusarema

Mu nguva yakararama Esdra, kwainga no umwe mu Iziraeri waidanijwa Nehemia uwo wainga mushandi wa mambo Artaserse. Nehemia waigara Persia ku dhorobha ro Susa. Hama ja Nehemia jakaviya ngo Judha no masoko akashata okuti: ‘Vandhu vakahwirira ku Jerusarema avazivi kungwaririka. Mufimbiji wo dhorobha no musuvo azvizivi kuvakiswa.’ Nehemia wakacamwa maningi. Iyena waida kuenda Jerusarema kobesera, ngo kudaro wakaita mukumbiro kuti mambo amutendere kuti aende.

Ngo kufamba ko nguva, mambo wakavona kuti Nehemia wainga wakacamwa. Iyena wakati: ‘Andito ndakakuvona kudaro. Ngenyi wakacamwa?’ Nehemia wakati: ‘Ngenyi ndingaregera kucamwa kudari dhorobha rangu, Jerusarema, rakaphwanywa-phwanywa?’ Mambo wakati: ‘Unoda kuti ndikuitirenyi?’ Ngo kukasika Nehemia wakaita mukumbiro ngo cinyararire. Perapo wakati: ‘Ndapota, ndiregerenyi ndiende ku Jerusarema kovakisa mufimbiji.’ Mambo Artaserse wakabvunja Nehemia kuti aende zve mambo wakanasirira kuti ave wakangwaririka pa hwendo hwake wainga wakareba. Iyena wakaitazve Nehemia ave nduna yo ku Judha zve wakamupa matabwa kuti anasirire musuvo jo dhorobha.

Nehemia paakaguma ku Jerusarema, wakavona kuti mufimbiji wainga wakashata. Perapo wakauganija vapiri pomwe no vatongi wovabvunja kuti: ‘Zviro azvizivi kunaka. Tinodikana kutanga basa.’ Vandhu vakatendera, vakatanga kuvaka mufimbiji.

Asi vavengi vamweni vo vaIziraeri vakatanga kuvaseka, veciti: ‘Muhwe ungakwanisa kuhwisa mufimbiji wamunoda kuvaka.’ Vashandi avazivi kuzviteverera zvevainangaro zve vakaenderera mberi vecivaka. Mufimbiji wakaramba ucikura zve wakavanga.

Vavengi vakaronga kuviya ngo mativi akasiana-siana kuti vahwise Jerusarema. VaJudha pavakazvizwa, vakatanga kuthya. Asi Nehemia wakati: ‘Mucathya. Jehovha anesu.’ Iyena wakaronga varindiri kuti vangwarire vavaki, ng kudaro vavengi vainga vacikakwanisi kuvahwisa.

 Mu mazuva anokwana 52, mufimbiji wainga wapera kuvakwa. Nehemia wakadanija vaRevi kubva Jerusarema kuti vaviye pa kuzauhwa ko mufimbiji. Iyena wakavaronga ngo zvikwata zviviri zvo vaimbi. Ivona vakakhwira panyezeru ngo pa sikada po mufimbiji cikwata cimwe cakaenda ngo divi rimweni zve cimweni cakaendavo ngo divi rimweni kuteneneja dhorobha rese. Ivona vairija mbayapaya, veciimbira Jehovha. Esdra wakaenda no cikwata cimwe zve Nehemia no cimweni mbhera voguma ku temberi. Vanhdu vese—vanarume, vanakaji no zvivana—vaipira zvibairo kuna Jehovha vecidakara. Izwi ro kudakara raikwanisa kuzika ndhambo maningi.

“Apana cokuhwa ndicona cakanasirihwa kuambana na imwimwi cinozobudirira” —Isaia 54:17, Baiberi Mazwi Akacena aMwari