Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 63

Masoko Akatahwa pa Biravira

Masoko Akatahwa pa Biravira

Pa kufamba ko nguva, Bhetishazari wakava mambo wo Bhabhironia. Pa zuva rimweni, wakakoka vandhu vaisisira maningi vo ku Bhabhironia kuti vaende kumabuso. Wakabvunja vashandi vake kuti vaviise kopo jo goridhi jakatohwa ndi mambo Nabhukadhinezari mu temberi ya Jehovha. Bhetishazari no varendo vake vakamwira mu kopo jondhojo, votanga kukuja zvimwari zvavo. Ngo civhumbu, vakashamaisika ngo kuvona nyara yo mundhu, nyara yondhoyo yakatanga kutara masoko anoshamaisa pa biravira ro nyumba ya mambo.

Bhetishazari wakatanga kundhya-ndhya. Iyena wakadanija vandhu vanoita zvo masaramuso ovabvunja kuti: ‘Mundhu anokwanisa kudidurujira masoko aya, anozoita mundhu wocitatu anosisira maningi mu utongi hwo Bhabhironia.’ Ivona vakaeja, asi akuna na umwe wavo wakakwanisa kudurujira masoko aya. Vahosi vakaviya zve vanonga kuti: ‘Kuno mundhu anodanwa Dhanieri waidurujira zviro kuno mambo Nebhukadhinezari. Iyena angamusanangurira masoko awo.’

Dhanieri wakadanwa zve wakaenda kuna mambo. Bhetishazari wakati kwaari: ‘Kudari ukakwanisa kuverenga magama aya zve womadurujira, ndinozokusimija kordau yo ndarama mu musipa, ndokuita mundhu wocitatu anosisira maningi mu umambo wo Bhabhironia.’ Dhanieri wakati: ‘Andidi zvipo zvenyu, asi ndinomubvunja kuti magama aya anoda kunangenyi. Baba wenyu Nebhukadhinezari vaijikuja, asi Jehovha wakavadodokesa. Imwimwi munoziva zvese zvakavaitikira, asi imwimwi matuka Jehovha ngo kumwira mu kopo yo temberi Yake. Ngo kudaro Mwari watara masoko aya: Mene Mene, Tekeri zve Parisini. Masoko aya anoreva kuti vaMedhiya no vaPersia vanozonyisa Bhabhironia zve amucazovizve mambo.’

Zvaivoneka inga kuti apana nyika yaikwanisa kunyisa Bhabhironia. Dhorobha iri, raijivirihwa ngo mufimbiji wakakura pomwe no murambo wakajika  maningi. Asi pa usiku wondhowo, vaMedhiya no vaPersia vakaenda kuhwa no vaBhabhironi. Mambo wo vaPersia waidanijwa Siro wakaomesa murambo, ngo kudaro masoca ake akakwanisa kunghwina mu dhorobha akasujunuka. Paakaguma kondhoyo, musuvo jainga jakafununguka! Masoca akanghwina mukatimo zve wonyisa dhorobha perepo vouraya mambo. Tevere Siro wakava mambo wo Bhabhironia.

Gore ricito rapera, Siro wakazivisa kuti: ‘Jehovha wakandibvunja kuti ndivakise temberi iri ku Jerusarema. Vese vaya vanoda kubesera vakasujunuka kuti vaende.’ Inga zvakagondesa Jehovha, vaJudha vazinji vakahwirira kanyi no papera 70 o makore, Jerusarema no raparajwa. Siro wakahwirija goridhi no kopo jo Siriva no mujiyo jese jainga jakatohwa mu temberi ndi mambo Nebhukadhinezari. Unokwanisa kuvona kuti Jehovha wakashandisa kudini Siro kuti abesere vandhu Vake?

“Rawa, rawa Babilónia guru! Rakaphinduka kuita muzi wo masathana, guru yo mujimu yese yakashata, bako ro xiri jese jakagora no kuthisa.”—Apokalipsi 18:2