Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 58

Kuparajwa ko Jerusarema

Kuparajwa ko Jerusarema

Vandhu vo ku Judha, kazinji vaisiya Jehovha zve vainamata zvimwari zvo manyepo. Ko makore akawanda, Jehovha waieja kuvabesera. Wakatuma vaporofita vakawanda kuti vavangwaje, asi avazivi kupurukira. Asi ivona, vaiseka vaporofita. Zvicinyi zvaizoitwa ndi Jehovha kuti apeje manamatiro okunyepa?

Mambo wo ku Bhabhironia, Nebhukadhinezari, wainga acinyisa majinja akawanda. Pakutanga wakanyisa Jerusarema, perepo wakatora Mambo Jehoyakimu, vatungamiriri vo masoca, zve wakatora vandhu vese kwenda ku Bhabhironia. Wakatoravo pfuma yese yainga mu temberi ya Jehovha. Nebhukadhinezari wakagaja Zedhekia mambo wo vaJudha.

Pa kutanga, Zedhekia waipurukira Nebhukadhinezari. Asi vandhu vainga phedo no jinjero pomwe no vaporofita vo kunyepa vakabvunja Zedhekia kuti amukire Bhabhironia. Jeremia wakavabvunja kuti: ‘Kudari mukapanduka, mu nyika yo Judha munozouraiwa, munozova no njara pomwe no ndhenda.’

Pakupera kutonga ko makore anokwana 8, Zedhekia wakasunga kumukira Bhabhironia. Iyena wakakumbira masoca o Ejipita kuti amubesere. Nebhukadhinezari wakatumira masoca ake kuti amukire Jerusarema, zve vakavaka akampamento mu mbhiri-piri mo dhorobha. Jeremia wakabvunja Zedhekia kuti: ‘Jehovha wakati zvipirei ku vaBhabhironi, wakadaro unozoponeswa iwewe no dhorobha. Asi iwewe ukaramba kuzvipira ko vari, vaBhabhironi vanozopisa Jerusarema zve vanozokutora woita musungwi.’ Zedhekia wakati: ‘Narini adizozvipiri!’

 No papera gore no meya, vaBhabhironi vakaphwanya mufimbiji pomwe no kupisa guta rakona. Vakapisa temberi, vakauraya vandhu vakawanda, zve vakatora zviuri zvo vandhu inga vasungwi.

Zedhekia wakatiza mu Jerusarema, asi vaBhabhironi vakakwanisa kumutevera. Vakazomubata phedo no Jeriko zve vakaenda naye kuna Nebhukadhinezari. Mambo wo Bhabhironia wakaita kuti vana va Zedhekia vaurawe pambeji pake. Nebhukadhinezari wakaitisa bofu Zedhekia zve wakamudira mukadheya, wakagaremo mbera kufa kwake. Jehovha wakapikira vandhu vo Judha kuti: ‘Pakupera 70 o makore, ndinozomuhwirija ku nyumba kwenyu Jerusarema.’

Zvicinyi zvaizoitika no majaha ainga vasungwi ku Bhabhironia? Vaizoramba vakagondeka kuna Jehovha here?

‘Jehovha Mwari, wo masimba ese, zvomakatonga ngo zvokadi zve zvakarungama.’—Apokalipsi 16:7, Shanduro yeNyika Itsva