Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 64

Dhanieri ari mu Rindi ro Mbhondoro

Dhanieri ari mu Rindi ro Mbhondoro

Mambo umweni wo Bhabhironia waidaninjwa Dhario. Dhario wakavona kuti Dhanieri wainga wakasiyana no vamweni. Ngo kudaro wakaita kuti Dhanieri ave mutungamiriri wo vanarume vese vanosisira vo mu nyikemo. Vanarume avo vainga no ushanje na Dhanieri zve vaida kuti afe. Ivona vaiziva kuti Dhanieri waita mukumbiro kuna Jehovha katatu pa njiku, ngo kudaro wakabvunja Dhario kuti: ‘Mambo, ngapaitwe mutemo wokuti mundhu wese anodikana kuita mukumbiro kuna imwimwi basi. Ariwese anoita mukumbiro kuna mwari umweni anodikana kukhandihwa mu rindi rakazara ngo mbhondoro.’ Dhario wakadakarira zvakabhuiwa zve wakatara mutemo wondhowo.

Dhanieri paakazwa mutemo wondhowo, iyena wakaenda kunyumba kwake. Wakagwadama phedo no jhanera yakashama zve wakaita mukumbiro kuna Jehovha. Vanarume vaya vo ushanje vakanghwina mumba mwake ngo hasha zve vakamukhanda eciita mukumbiro. Vakaenda vecigogoma kobvunja mambo Dhario kuti: ‘Dhanieri aazivi kumuzwira. Iyena ari kuita mukumbiro katatu pa njiku.’ Dhario waidakarira maningi Dhanieri zve aacaidepi kuti afe. Wakapeja njiku yese acirangarira kuti angaponesa kudini Dhanieri. Asi mambo pacake aacaikwanisa kucinja mutemo wainga watahwa. Iyena wakabvunja vanarume vake kuti vakhandire Dhanieri mu rindi ro mbhondoro jinothyisa.

Mu usiku wodhowo, Dhario wakathimwa-thimwa maningi ngo pamusoro pa Dhanieri zvokuti aazivi  no kukwanisa kuvata. Co mangwanani, iyena wakagogoma woenda ku rindi wodaninja Dhanieri eciti: ‘Mwari wako wakuponesa?’

Dhario wakazwa izwi. Rainga ra Dhanieri! Iyena wakadaninja Dhario eciti: ‘Ngirozi ya Jehovha yakafunga muromo jo mbhondoro. Ajizivi kundikhuvaza.’ Dhario wakadakara maningi! Wakananga kuti Dhanieri abudiswe mu rindi. Dhanieri wainga ecikazivi kukwengwa-kwengwa. Mambo wakananga kuti: ‘Vanarume vayana vakapumbha Dhanieri ngavakandihwe mu rindi.’ Vanarume vondhovo pavakakhandihwa mu rindi, vakauraiwa ngo mbhondoro.

Dhario wakaenda kobvunja vandhu vake kuti: ‘Mundhu wese anodikana kuthya Mwari wa Dhanieri. Iyena wakaponesa Dhanieri kuti atame kuhiwa ngo mbhondoro.’

Unoita mukumbiro kuna Jehovha njiku jese, inga zvakaita Dhanieri here?

“Tenji anoziva kubvisa mu zviejo vatendi vake, kaveta anopanica vaxaixi mbhera njiku yo kutongwa.”—2 Pedru 2:9