Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 1

Mwari Wakaita Denga no Pasi

Mwari Wakaita Denga no Pasi

Jehovha Mwari Musiki wedu. Iyena wakaita zviro zvese, zviro zvinovoneka no zvicikavoneki. Acito akaita zviro zvatinovona, wakaita ngirozi zinji, zinji maningi. Unozviziva kuti ngirozi icinyi? Ngirozi i vandhu vakaitwa ndi Jehovha vakadari inga ndiyena. Atikwanisi kujivona, kudari inga ticikakwanisi kuvona Mwari. Ngirozi yo kutanga yakaitwa ndi Jehovha yakaguma pakuva mubeseri wake. Ngirozi iyi yakabesera Jehovha paakaita ndhondho, maparaneta no zviro zvimweni. Imwe yo maparaneta ondhoo, i pasi pano, ndiwona muzi wedu wakasejesesa.

Jehovha paakaita pasi pano, wakasika zvinyama no vandhu kuti zvirarame pamwepo. Iyena wakaita kuti kubwaka ko zuva kubveneke pasi pano. Woitazve matundhu, mabahari no murambo.

Zvicinyi zvakazotevera? Jehovha wakati: ‘Ndinodikana kuita ndhonve no maruva no mamiti.’ Mufumbo muzinji jo mucero, murivo no maruva zvakatanga kukura. Perapo Jehovha wakaita zvinyama zvese—zvinyama zvinomburuka, zvomukumwa, zvinofamba, no zvinyama zvinogwebza. Iyena wakaitazve zvinyama zvimweni zvidoko, zvakadari inga shuro, no zvimweni zvakakura zvakadari inga njou. Ngocapi cinyama caunodakarira maningi?

Perapo Jehovha wakati ku ngirozi yokutanga: “Ngatiite mundhu.” Vandhu vakasiana kamare no zvinyama. Vangakwanisa kuita zviro. Vanokwanisa kuvereketa, kuseka no kuita mukumbiro. Ivona vaidikana kungwarira pasi pano no zvinyama. Unomuziva kuti ndiyani wakava  mwanarume wokutanga? Ngatende tivone.

“Pakutungamira, Mwari wakarura nyezuru no pasi.” —Genesi 1:1