Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 2

Mwari Wakaita Mwanarume no Mwanakaji Wokutanga

Mwari Wakaita Mwanarume no Mwanakaji Wokutanga

Jehovha wakasima zvakawanda mu ndau yaidaninjwa kuti munda wo Edheni. Munda uu wainga wakazara ngo maruva, miti no zvinyama. Perapo Mwari wakaita mwanarume wokutanga, Adhamu, kubva ku dongo zve womufurija mwiha wo kupona ngo mu miro. Unoziva kuti zvicinyi zvakaitika? Mwanarume wakava mundhu anopona! Jehovha wakaita kuti Adhamu ave mutungamiriri wo mu munda zve Mwari wakamubvunja kuti adure mazina zvinyama zvese.

Jehovha wakapa Adhamu mutemo unosisira maningi. Iyena wakati kuna Adhamu: ‘Ihai mucero yo miti yese. Asi regerai muti umwe basi, kudari ukaha mucero wo muti wondhoo iwewe unozofa.’

Perapo, Jehovha wakati: ‘Ndinodikana kusika mubeseri wa Adhamu.’ Iyena wakaita kuti Adhamu avate hope jakajika kamare zve Mwari wakashandisa mbabvu ya Adhamu kuti aite mukaji wake. Zina rake ndi Evha. Adhamu na Evha vainga mbhuri yokutanga. Adhamu  wakazwa kudini ngo pamusoro po mukaji wake? Adhamu wakadakara maningi zvokuti wakananga kudari: ‘Vonanyi zvakandiitira Jehovha kubva ku mbabvu yangu! Ndingananga kuti! Uu mundhu wakadari inga ndini.’

Jehovha wakabvunja Adhamu na Evha kuti vave no vana zve vazaje nyika. Iyena waida kuti ivona vadakajihwe vecishanda pamwepo kuti nyika yese ive paradhiso, kana ndau yakaseja, inga munda wo Edheni. Asi izvi azvizivi kuzoitika. Ngenyi? Tinozojija zvizinji mu cijijo cinotevera.

“Amuzivi kujija kuti Marure, pakutungamira, wakavarura mwanarume no mwanakaji.”—Mateu 19:4