Kwenda ku nda-nda-nda yo zviri mukati

Zvapupu zva Jehovha

Kheta ndumi Cindau

Ngocapi Citatijo co “Njiku Jokupejisira,” kana co “Kupejwa ko Nyika”?

Ngocapi Citatijo co “Njiku Jokupejisira,” kana co “Kupejwa ko Nyika”?

Mupinguro wo Bhaibheri

Bhaibheri rinosanangura zviitiko no mugariro jinotatija “kupera ko nyika” ino. (Mateu 24:3) Bhaibheri rinodanija mukuvo uu kuti “njiku jokupejisira” zve “kupejwa ko nyika,” kana “mukuvo . . . wokugumisira.” (2 Timoti 3:1; Danieli 8:​19; Baiberi Mazwi Akacena aMwari) Mugariro jinonangwa ngo uphorofita hunotevera, i zvitatijo zvinonasa kuzivika zvo njiku jokupejisira kana mukuvo wo kupejisira:

  • ● Hondo ku mativi ese.​—Mateu 24:7; Apokalipsi 6:4.

  • ● Njara.​—Mateu 24:7; Apokalipsi 6:​5, 6.

  • ● Kuzungunyika kukuru ko nyika.​—Luka 21:11.

  • ● Ndhwaji no mutungu jinothyisa.​—Luka 21:11.

  • ● Kuengejereka ko uphanga.​—Mateu 24:12.

  • ● Kuphwanywa-phwanywa ko nyika ngo vandhu.​—Apokalipsi 11:18.

  • ● Kuengejereka ko kushata ko mugariro jo vandhu, ngokuti vazinji vandhu “[‘vacikabongi, vacikagondeki, . . . vacikadi kuzwirana,’ Shanduro yeNyika Itsva], vanyepi, voupombo, vacina usizi, vacikadi bzauxoni, vapandukiri vo vamweni, vacingathi, vokujikuja.”​—2 Timoti 3:​1-4.

  • ● Kutama kubatana ko mbhuri, ngo kutama “rudo” ko vandhu no vana “vokutama kureremeja majibaba.”​—2 Timoti 3:​2, 3.

  • ● Kupera ko rudo hwo vandhu kuna Mwari.​—Mateu 24:12.

  • ● Ucengejeri hunokhombijwa vo zviara.​—2 Timoti 3:5.

  • ● Kuengejereka ko kuzwisisika ko zviphorofita zvo Bhaibheri, kubatanijavo no zvinobhuya ngo njiku jokupejisira.​—Danieli 12:4.

  • ● Kucumaihwa ko masoko akanaka o Umambo mu nyika yese.​—Mateu 24:14.

  • ● Kutama kutenda ko vandhu no kuseka ngo ndava yo zvitatijo zvokuti magumo aaphedo.​—Mateu 24:37-​39; 2 Pedru 3:​3, 4.

  • ● Kukwanirisika ko munyakamwe ko uphorofita hwese hwaperari kunangwa.​—Mateu 24:33.

Tiri kurarama mu “njiku jokupejisira” here?

Hina. Mugariro jo nyika kubatanijavo no uphorofita hwo Bhaibheri, zvinokhombija kuti njiku jokupejisira jakatanga mu gore ro 1914. Pa mukuvo wondhowo, Umambo hwa Mwari hwakatanga kutonga kumatenga zve ciito cao co kutanga cakava co kugogomera Sathana Dhiabhu no madhimoni ake kubva kumatenga, no kuita kuti simba rokucengeja kwake riperere pasi pano basi. (Apokalipsi 12:​7-​12) Kucengejwa ko vandhu ndi Sathana kuri kuvoneka pa mugariro no zviito zvavo zvakawanda, zvinoitisa kuti njiku jokupejisira jive “mukuvo wokunesa.”​—2 Timoti 3:1.