Kwenda ku nda-nda-nda yo zviri mukati

Zvapupu zva Jehovha

Kheta ndumi Cindau

Nyika Inozoparajwa Here?

Nyika Inozoparajwa Here?

Mupinguro wo mu Bhaibheri

Haiwa, Nyika narini aizoparajwi, kupiswa kana kufakehwa. Bhaibheri rinojijisa kuti nyika yakasikwa kuti vandhu vagaremo mbhera narini.

  • “Varurami vanozoita veno vo nyika, vanozogaremo mbhera narini.”—Nduyo 37:29.

  • “[Mwari] makavangisa nyika panyezuru po maambo ayo, aizungunyuswi mbhera narini.”—Nduyo 104:5

  • “Nyika inondogara indoripo.”—Mucumaeri 1:4.

  • “Wiya wakaumba nyika no kuirura, yena wakaiimisa; aazivi kuirura inga bzipare, ngo kusiana wakairura kuti igariwe.”—Isaia 45:18.

Vandhu vanoparaja nyika here?

Mwari aazotenderi kuti vandhu vaparaje nyika mbhera narini ngo kuisvipisa, hondo kana ngo maitiro amweni. Ngo zvokadi kuti Mwari anozoparaja “vaya vanophwanya nyika.” (Apokalipsi 11:18) Anozviitisa kudini?

Mwari anozocinja utongi wo vandhu aucikakwanisi kungwarira nyika, ngo Umambo wo mugore wakakwana. (Dan. 2:44; Mt. 6:9, 10) Jesu mwana wa Mwari acazova Mambo wo Umambo wondhowo. (Isaia 9:6, 7) Jesu painga pasi pano, wakaita mushamaiso jaitatija kuti iyena ano simba rokungwarira zviro zvinoitika zvega. (Mc. 4:35-41) Inga Mambo wo Umambo wa Mwari, Jesu anongwarira zvaushoni nyika no zviro zvinoitika zvega. Iyena anozoitisazve mugariro jimweni kuti nyika ive paradhiso inga munda wo Edheni.—Mateu 19:28; Luka 23:43, Shanduro yeNyika Itsva.

Bhaibheri arijijisi kuti nyika inozoparajwa ngo muriro here?

Haiwa. Murangariro wondhowo wakavepo ngo ndava yo kutama kuzwisisa ushoni 2 Pedru 3:7, inonanga kuti: “Denga no nyika yo pasi ya nyamasi, bzinogarira muriro.” Vonanyi zviro zviviri zvinotibesera kuzwisisa magama aya:

  1. Mu Bhaibheri, magama okuti “denga”, “nyika” zve no “muriro” angava no revo zinji. Inga muezaniso, Genesi 11:1 inoti: “nyika yese yainga ino ndimi imwe basi.” Apa, gama rokuti “nyika” rinonangira vandhu.

  2. Zvinonangwa pa bhuku ra 2 Pedru 3:7 zvinotatija kuti matenga, nyika no muriro zvinoda kurevenyi. Vhesi 5 na 6 inoezanisira no Ndambi yo mu njiku ja Nowa. Mu mukuvo wondhowo, nyika yondhoyo yakaparajwa, asi pasi pedu apazivi kuparajwa. Mucokwadi, “nyika” yakaparajwa ngo ndambi yaimirira vandhu vakashata vo mukuvowo. (Genesi 6:11) Iyena wakaparajazve “matenga,” kana vandhu vaitonga vangari vo mondhomo. Ngo kudaro, vandhu vakashata vakaparajwa, asi pasi pano apazivi. Nowa no mbhuri yake vakapokonyoka pa kuparajwa kwayo, perepo vakazogara mu nyikemo pa kupera ko ndambi.—Genesi 8:15-18.

Kudari inga kumwa yo ndambi, “muriro” unonangwari pana 2 Pedru 3:7 unonangira kuparajwa ko vandhu vakashata, haiwa ku nyika yakatitendeneja. Mwari anogondisa “gore ripsa no nyika ipsa” zve mondhomo ‘munozogara rugarisiko.’ (2 Pedru 3:13) “Nyika ipsa” inoimirira vandhu vanozopona mu mukuvo wondhowo, ivona vanozotongwa ngo ‘gore ripsa’ kana utongi upsa. Utongi uwo ndi Umambo hwa Mwari, unozoita kuti pasi pano pave paradhiso.-Apokalipsi 21:1-4.