Yeqa uye kokuphakathi

UKUCHASISWA KWAMAVESI ASEBHAYIBHILINI

UMikha 6:8—‘Hamba Ngokuzithoba LoNkulunkulu Wakho’

UMikha 6:8—‘Hamba Ngokuzithoba LoNkulunkulu Wakho’

 “Ukutshelile okuhle, wena muntu. Kambe uJehova ufunani kuwe? Akufunayo nje yikuthi wenze okulungileyo lokuthi uthande ubuqotho, njalo uhambe loNkulunkulu wakho ngokuzithoba.”—UMikha 6:8, INguqulo Yomhlaba Omutsha.

 “Ukutshengisile wena muntu okuhle. UJehova ufunani kuwe na? Ukwenza okulungileyo lokuthanda umusa kanye lokuhamba ngokuzithoba loNkulunkulu wakho.”—UMikha 6:8, Holy Bible in Ndebele.

Okutshiwo nguMikha 6:8

 Umphrofethi uMikha uyasichasisela ukuthi akunzima ukuthi abantu bathokozise uJehova a uNkulunkulu. (1 UJohane 5:3) Evesini le sithola imitsho emithathu esinceda sibone ukuthi uNkulunkulu ukhangeleleni kithi. Imitsho emibili yokuqala ikhuluma ngendlela okumele abantu baphathane ngayo. Owesithathu ukhuluma ngobudlelwano bethu loJehova.

 ‘Ukwenza okulungileyo.’ UNkulunkulu ufuna abantu bakhe benze okulungileyo futhi bahlulele kuhle. Indlela abacabanga ngayo kanye lalokho abakwenzayo kumele kuhambelane lalokho uNkulunkulu athi kulungile. (UDutheronomi 32:4) Ngokwesibonelo, abantu abalandela imithetho kaNkulunkulu benza konke okusemandleni abo ukuthi bathembeke futhi bangabandlululi abanye kungelani lokuthi bangumhlobo bani, bavela kusiphi isizwe lokuthi banothile kumbe bangabayanga.—ULevi 19:15; U-Isaya 1:17; KumaHebheru 13:18.

 ‘Thanda ubuqotho.’ Amazwi la angahunyutshwa langokuthi ‘thanda uthando oluqotho.’ (UMikha 6:8, amabala angaphansi) Ibala lesiHebheru elihunyutshwe ngokuthi ‘ubuqotho’ litsho ukuthembeka emuntwini kanye lokuba lomusa lesihawu. Umuntu oqotho wenza lokho okwedlula akhangelelwe ukuthi akwenze. Yikho uNkulunkulu ufuna labo abamthokozisayo bakuthande ukuba lomusa lesihawu futhi batshengise ukuthi balempawu lezi. Lokhu kutsho ukuthi abantu abakhonza uNkulunkulu kumele bakuthande ukuncedisa abanye ikakhulu abaswelayo. Nxa bengaba ngabantu abaphanayo bazathokoza.—ImiSebenzi 20:35.

 ‘Hamba loNkulunkulu wakho ngokuzithoba.’ EBhayibhilini ibala elithi ‘ukuhamba’ lingatsho “ukulandela indlela ethile yokwenza izinto.” Umuntu ohamba loNkulunkulu uphila ngendlela emthokozisayo. Lokho yikho kanye okwakusenziwa nguNowa. IBhayibhili lithi “wahamba loNkulunkulu weqiniso” ngenxa yokuthi wayesenza okulungileyo phambi kukaNkulunkulu, watshengisa lokuthi ‘umsulwa phakathi kwabantu ababephila ngesikhathi sakhe.’ (UGenesisi 6:9) Lathi ‘sihamba loNkulunkulu’ ngokwenza lokho esikufunda eBhayibhilini. Kanti njalo siyavuma ukuthi zikhona izinto esingenelisi ukuzenza lokuthi kumele sincediswe nguNkulunkulu kukho konke esikwenzayo.—UJohane 17:3; ImiSebenzi 17:28; ISambulo 4:11.

Amanye amavesi asinceda sizwisise uMikha 6:8

 UMikha waphrofetha ko-Israyeli ngo-777 B.C.E. kusiya ku-717 B.C.E. Ngalesosikhathi ilizwe lako-Israyeli laligcwele abantu abakhonza izithombe, abangamaqili labalodlakela. (UMikha 1:7; 3:1-3, 9-11; 6:10-12) Ama-Israyeli amanengi ayengayilandeli imithetho uNkulunkulu ayebaphe yona esebenzisa uMosi. Abanengi babecabanga ukuthi uNkulunkulu uzabemukela nxa nje bengenza ezinye izinto eziphathelane lokukhonza, banikele lemihlatshelo lanxa bengayilandeli eminye imithetho yakhe.—IZaga 21:3; UHosiya 6:6; UMikha 6:6, 7.

 Kwathi sekudlule iminyaka eminengi uMikha ekhulume amazwi la, uJesu laye wakhuluma ngokuthi uYise uthokoziswa ngabantu abalothando, abahlulela kuhle labalesihawu, hatshi labo abenza izinto eziphathelane lokukhonza befuna abanye bababone ukuthi bazinikele kuNkulunkulu. (UMathewu 9:13; 22:37-39; 23:23) Amazwi kaJesu asinceda sizwisise ukuthi uNkulunkulu ukhangelele ukuthi abantu bakhe bamkhonze njani lamuhla.

 Bukela ividiyo le emfitshane ukuze ubone ukuthi ibhuku likaMikha limumetheni.

a Ibizo likaNkulunkulu ngesiHebheru limelwa ngongwaqa abane abajayele ukubhalwa ngokuthi YHWH ngesiNgisi, ababizwa langokuthi yi-Tetragrammaton. Bala isihloko esithi “Ngubani UJehova?” ukuze uthole ukuthi kungani amaBhayibhili amanengi esebenzisa ibizo lokuhlonipha elithi Nkosi kulokusebenzisa ibizo likaNkulunkulu elithi Jehova.