“UNkulunkulu wawuthanda kakhulu umhlaba waze wanikela ngeNdodana yakhe ezelwe yodwa, ukuze wonke umuntu otshengisa ukuthi uyakholwa kuyo angabhujiswa kodwa abe lokuphila okungapheliyo.”—UJohane 3:16, INguqulo Yomhlaba Omutsha.

 “UNkulunkulu wawuthanda umhlaba kangaka, waze wanikela ngeNdodana yakhe ezelwe yodwa ukuba ilowo lalowo okholwa kiyo angabhubhi, kodwa abe lokuphila okungapheliyo.”—UJohane 3:16, The Holy Bible in Ndebele.

 UNkulunkulu uyasithanda futhi ufuna siphile kuze kube nini lanini. Yikho wathuma iNdodana yakhe uJesu Khristu ukuthi ibuye lapha emhlabeni. Ngesikhathi uJesu esemhlabeni wenza umsebenzi oqakathekileyo wokufundisa abalandeli bakhe ngoYise. (1 UPhetro 1:3) Okunye akwenzayo yikunikela ngempilo yakhe ukuze abantu basindiswe. Kumele sibe lokholo kuJesu nxa sifuna ukuthola ukuphila okungapheliyo.

 Amazwi athi “wanikela ngeNdodana yakhe ezelwe yodwa” a atshengisa ukuthi uNkulunkulu usithanda kangakanani. Phela uJesu uligugu kakhulu ngoba nguye yedwa owadala nguNkulunkulu mathupha. (KwabaseKholose 1:17) ‘Ulizibulo kukho konke okwadalwayo.’ (KwabaseKholose 1:15) Konke okunye okwadalwayo kuhlanganisa lezingilosi, kwadalwa kusetshenziswa uJesu. Lanxa uJesu wayeqakatheke kangaka kuYise, uJehova b uNkulunkulu wayezimisele ukumthuma ukuze ‘azosebenza njalo anikele ngempilo yakhe ibe yinhlawulo yabanengi.’ (UMathewu 20:28) UJesu wahlupheka futhi wabulawa ukuze asikhulule esonweni lasekufeni, esakuthola ku-Adamu.—KwabaseRoma 5:8, 12.

 Ukuba lokholo kuJesu akutsho ukuphonguvuma nje ukuthi wasenzelani kodwa kutsho ukumlalela lokulandela amanyathelo akhe. (UMathewu 7:24-27; 1 UPhetro 2:21) IBhayibhili lithi: “Okholwa eNdodaneni ulokuphila okungapheliyo, kodwa ongayilaleliyo iNdodana kasoze akubone ukuphila.”—UJohane 3:36.

 UJesu watsho amazwi la ngesikhathi ekhuluma lendoda engumFarisi okwakuthiwa nguNikhodemu eyayingumbusi wamaJuda. (UJohane 3:1, 2) Engxoxweni le, uJesu wakhuluma ngoMbuso kaNkulunkulu c ‘langokuzalwa kutsha.’ (UJohane 3:3) Waphinda wakhuluma langendlela ayezabulawa ngayo wathi: “INdodana yomuntu layo kumele iphanyekwe phezulu [ibethelwe esigodweni] ukuze wonke umuntu okholwa kuyo abe lokuphila okungapheliyo.” (UJohane 3:14, 15) Wachasisa lokuthi okwenza uNkulunkulu wamthuma ukuthi azofela abantu yikuthi uyabathanda kakhulu. Waphetha ngokusitshela ukuthi kumele sibe lokholo njalo senze izinto ezithokozisa uNkulunkulu ukuze sithole ukuphila.—UJohane 3:17-21.