Yeqa uye kokuphakathi

UKUCHASISWA KWAMAVESI ASEBHAYIBHILINI

UGenesisi 1:26—“Asenze Umuntu Ngomfanekiso Wethu”

UGenesisi 1:26—“Asenze Umuntu Ngomfanekiso Wethu”

 “UNkulunkulu wasesithi: ‘Asenze umuntu ngomfanekiso wethu, afanane lathi, njalo kabuse inhlanzi zolwandle, lezidalwa eziphaphayo zamazulu, lenyamazana ezifuywayo, lawo wonke umhlaba kanye lazo zonke izinanakazana ezihamba emhlabeni.’”—UGenesisi 1:26, INguqulo Yomhlaba Omutsha.

 “UNkulunkulu wasesithi, ‘Asenze abantu ngomfanekiso wethu, basifuze, babuse phezu kwenhlanzi zolwandle, laphezu kwenyoni zaphezulu, lezifuyo, lenyamazana zonke zomhlaba, lakho konke okuhuquzela emhlabeni.’”—UGenesisi 1:26, The Holy Bible in Ndebele.

Okutshiwo nguGenesisi 1:26

 Abantu badalwa ngomfanekiso kaNkulunkulu ngoba bayenelisa ukumlingisela kanye lokuba lobuntu obunjengobakhe obugoqela uthando, ukwahlulela kuhle lozwelo.

 “UNkulunkulu wasesithi: ‘Asenze umuntu ngomfanekiso wethu.’” UJehova uNkulunkulu a waqala ngokudala ingilosi elamandla eyacina isaziwa ngokuthi nguJesu engakadali zonke izinto. Wathi esedaliwe uJesu wasetshenziswa “ukudala zonke ezinye izinto ezisezulwini lezisemhlabeni.” (KwabaseKholose 1:16) UJesu uyenelisa ukulingisela uJehova ngoba ‘ungumfanekiso kaNkulunkulu ongabonakaliyo.’ (KwabaseKholose 1:15) Yikho uNkulunkulu wayekhuluma loJesu ngesikhathi esithi: “Asenze umuntu ngomfanekiso wethu.”

 “Kabuse . . . lenyamazana ezifuywayo, lawo wonke umhlaba.” Izinyamazana azidalwanga ngomfanekiso kaNkulunkulu. Azidalwanga zisenelisa ukutshengisa uthando njengabantu futhi kazilamzwangedwa. Lanxa kunjalo uNkulunkulu uyazithanda izinyamazana. Yikho wathi abantu ‘babuse’ phezu kwazo. Ngokutsho amazwi la uJehova wayenika abantu umsebenzi wokuthi bagcine kuhle izinyamazama. (IHubo 8:6-8; IZaga 12:10) Ukhangelele ukuthi abantu bawunakekele kuhle umhlaba lakho konke okukuwo.

Amanye amavesi asinceda sizwisise uGenesisi 1:26

 Izahluko ezimbili zokuqala ezisebhukwini likaGenesisi zisilandisela ngokudalwa kwamazulu lomhlaba lakho konke okukuwo. Yonke into uJehova ayidalayo inhle kodwa abantu bona badalwe ngendlela emangalisa kakhulu. UNkulunkulu wathi eqeda ukudala “wakhangela konke ayekwenzile, wakubona kukuhle kakhulu.”—UGenesisi 1:31.

 Bukela ividiyo le emfitshane ukuze ufunde okunengi ngokudalwa kwezinto okukhulunywa ngakho kuGenesisi.

Imibono engaqondanga ngoGenesisi 1:26

 Okungaqondanga: Ngamadoda kuphela angenelisa ukulingisela uNkulunkulu lokuba lobuntu obunjengobakhe.

 Okuqondileyo: Ibala elithi “indoda” elisetshenziswe emaBhayibhilini amanengi esiNgisi lenza abanye bacabange ukuthi lapha kukhulunywa ngabesilisa kuphela. Kodwa ibala lesiHebheru elisevesini le litsho kokubili abesilisa labesifazana. Bonke abantu bangenelisa ukuba lobuntu obunjengobukaNkulunkulu kungelani lokuthi ngabesilisa kumbe ngabesifazana. Bayenelisa ukuba ngabangane bakaJehova futhi bathole isipho sokuphila kuze kube nini lanini.—UJohane 3:16.

 Okungaqondanga: UNkulunkulu ulomzimba ofanana lowethu abantu.

 Okuqondileyo: “UNkulunkulu ungumoya” okutsho ukuthi kahlali emhlabeni kumbe kweyinye nje iplanethi. (UJohane 4:24) Lanxa kwezinye izikhathi iBhayibhili likhuluma ngobuso bukaJehova, izandla zakhe, inhliziyo lokunye nje, lokhu kwenzelwa ukuthi abantu bamzwisise ngcono.—U-Eksodusi 15:6; 1 UPhetro 3:12.

 Okungaqondanga: UGenesisi 1:26 utshengisa ukuthi uJesu nguNkulunkulu.

 Okuqondileyo: UNkulunkulu loJesu balobudlelwano obuseduze njengobaba lendodana kodwa ngabantu ababili abatshiyeneyo, asomuntu oyedwa. UJesu wathi uNkulunkulu mkhulu kulaye. (UJohane 14:28) Ukuze uthole okunengi bukela ividiyo ethi UJesu Khristu NguNkulunkulu Yini? kumbe ubale isihloko esithi “Kungani Kuthiwa UJesu YiNdodana KaNkulunkulu?

 Bukela ividiyo le emfitshane ukuze ubone okumunyethwe libhuku likaGenesisi.

a UJehova libizo likaNkulunkulu. (IHubo 83:18) Khangela isihloko esithi “Ngubani UJehova?