UKUCHASISWA KWAMAVESI ASEBHAYIBHILINI
IZaga 16:3—“Giqela ENKOSINI Imisebenzi Yakho”
“Beka konke okwenzayo ezandleni zikaJehova, lapho-ke amacebo akho azaphumelela.”—IZaga 16:3, INguqulo Yomhlaba Omutsha.
“Giqela eNKOSINI imisebenzi yakho, lamacebo akho azaqiniswa.”—IZaga 16:3, TBS.
Okutshiwo yiZaga 16:3
Amazwi la aqinisekisa labo abakhonza uNkulunkulu weqiniso ukuthi amacebo abo azaphumelela nxa bangathembela kuJehova futhi bavume ukuthi abaqondise.
“Beka konke okwenzayo ezandleni zikaJehova.” Izikhonzi zikaJehova a ziyazithoba zicele ukuthi aziqondise zingakenzi izinqumo. (UJakhobe 1:5) Kungani zisenza njalo? Esinye isizatho yikuthi ziyakwazi ukuthi kulutshwana abantu abangakwenza ukuze baqondise indlela izinto ezenzakakala ngayo empilweni zabo. (UmTshumayeli 9:11; UJakhobe 4:13-15) Okunye yikuthi kwezinye izikhathi abantu bayehluleka ukwenza izinto abayabe behlele ukuzenza. Ngenxa yezizatho lezi, abanengi batshengisa ukuthi bahlakaniphile ngokucela ukuthi uNkulunkulu aphumelelise amacebo abo. Bayathandaza bacele ukuthi abaqondise besebesenza izinto ezivumelana lentando yakhe ebhalwe eLizwini lakhe iBhayibhili.—IZaga 3:5, 6; 2 KuThimothi 3:16, 17.
Umutsho othi “giqela eNKOSINI imisebenzi yakho” b utsho ukuthi “nikela eNKOSINi yonke imisebenzi yakho.” Elinye ibhuku elichasisa iBhayibhili lithi lokhu kungafaniswa “lendoda eyethula umthwalo osindayo emahlombe ayo ibisiwuthwalisa eyinye eqinileyo njalo elamandla.” Labo abathemba uJehova abathandabuzi ukuthi uzabancedisa futhi abanakekele.—IHubo 37:5; 55:22.
Amazwi athi “konke okwenzayo” awatsho ukuthi uNkulunkulu uyemukela kumbe uyabusisa konke okwenziwa ngabantu. UJehova ubusisa izinto ezenziwa ngabantu kuphela nxa belandela izimiso zakhe njalo bevumelana lentando yakhe. (IHubo 127:1; 1 UJohane 5:14) Kababusisi abangamlaleliyo futhi “wenza amacebo abantu abenza okubi angaphumeleli.” (IHubo 146:9) Kodwa uyabancedisa labo abazithoba kuye njalo balandele izimiso zakhe eziseBhayibhilini.—IHubo 37:23.
“Lapho-ke amacebo akho azaphumelela.” Amanye amaBhayibhili athi ‘amacebo akho azaqiniswa.’ EMibhalweni yesiHebheru ebizwa langokuthi liThestamenti Elidala, ibala elihunyutshwe ngokuthi “azaqiniswa” litsho ukufaka isisekelo esiqinileyo njalo izikhathi ezinengi lisetshenziswa nxa kukhulunywa ngezinto uNkulunkulu azidale zaqina. (IZaga 3:19; UJeremiya 10:12) UNkulunkulu uzawaphumelelisa amacebo alabo abenza okulungileyo emehlweni akhe njalo uzabancedisa ukuthi baphile impilo enhle ethokozisayo.—IHubo 20:4; IZaga 12:3.
Amanye amavesi asinceda sizwisise iZaga 16:3
Amazwi la abhalwa yiNkosi uSolomoni njalo yiyo eyabhala izahluko ezinengi ezisebhukwini leZaga. UNkulunkulu wanika uSolomoni ukuhlakanipha yikho wenelisa ukukhuluma izaga ezinengi kakhulu.—1 AmaKhosi 4:29, 32; 10:23, 24.
Kusahluko 16 uSolomoni uqalisa ngokubabaza inhlakanipho kaNkulunkulu futhi uphinde akhulume ngokuthi uNkulunkulu uyabazonda abantu abazigqajayo. (IZaga 16:1-5) Isahluko lesi sinceda obalayo ukuthi azwisise iqiniso elitholakala kanengi ebhukwini leZaga, elithi: Abantu bazahlakanipha futhi baphumelele nxa bangazithoba, bavume ukuthi uNkulunkulu aqondise izinyathelo zabo. (IZaga 16:3, 6-8, 18-23) Iqiniso leli liphindaphindwa kanengi eBhayibhilini.—IHubo 1:1-3; U-Isaya 26:3; UJeremiya 17:7, 8; 1 UJohane 3:22.
Bukela ividiyo le emfitshane ukuze ubone okumunyethwe libhuku leZaga.
a UJehova libizo likaNkulunkulu. (IHubo 83:18) Khangela isihloko esithi “Ngubani UJehova?”
b EBhayibhilini okuthiwa yi-TBS kusetshenziswe ibizo eltihi “NKOSI” (elibhalwe ngamabala amakhulu) esikhundleni selithi Jehova. Ukuze ubone ukuthi kungani ukwenza njalo kubaphica ababali beBhayibhili abanengi, khangela isihloko esithi “U-Isaya 42:8—‘NgiyiNKOSI.’”
Nanku Okunye
UKUCHASISWA KWAMAVESI ASEBHAYIBHILINI
Ukuchasiswa KukaZaga 3:5, 6—‘Ungathembi Okwakho Ukuqedisisa’
Ungatshengisa njani ukuthi awuzithembi kodwa uthemba uNkulunkulu?
INQABAYOKULINDA
IBhayibhili Lilokhu Liluncedo
Lanxa iBhayibhili lilidala, lilokhu liluncedo njalo aliphelelwa yisikhathi.
IMIBUZO YEBHAYIBHILI IYAPHENDULWA
UNkulunkulu Ufuna Ngenzeni Ngempilo Yami?
UNkulunkulu kumele akhulume lawe ngendlela eyisimangaliso yini ukuze akutshele intando yakhe? Thola impendulo yombuzo lo esihlokweni lesi.
UKUCHASISWA KWAMAVESI ASEBHAYIBHILINI
Ukuchasiswa KukaJeremiya 29:11—“Ngiyawazi Amacebo Engilawo Ngani”
UNkulunkulu uhlelile yini ukuthi impilo yomuntu ngamunye izahamba njani?
OKUFUNDISWA LIBHAYIBHILI
Amathuluzi Okutaditsha IBhayibhili
Khetha amathuluzi okutaditsha iBhayibhili azakwenza ukuthi uzwisise iBhayibhili futhi ukholise ukulibala.
