Ukuhlupheka okukhulu kuzabe kuyisikhathi esinzima kakhulu abantu abangakaze basibone. IBhayibhili lathi ukuhlupheka okukhulu kuzakwenzakala “ezinsukwini zokucina” kumbe “esikhathini sokuphela.” (2 KuThimothi 3:1; UDanyeli 12:4, New American Bible) Lithi “insuku lezo zizakuba zinsuku zokuhlupheka okungakaze kube khona kusukela uNkulunkulu wadala abantu kuze kube yilesosikhathi, njalo okungasoze kuphinde kube khona.”​—UMakho 13:19; UDanyeli 12:1; UMathewu 24:21, 22.

Okuzakwenzakala ngesikhathi sokuhlupheka okukhulu

•   Ukubhujiswa kwenkolo yamanga. Inkolo yamanga izabhujiswa ngesikhathi esincane nje. (ISambulo 17:​1, 5; 18:​9, 10, 21) Amakhosi omhlaba amelwa yi-United Nations azabhubhisa inkolo yamanga futhi lokhu kuyabe kugcwalisa inhloso kaNkulunkulu.​—ISambulo 17:​3, 15-​18. a

•   Ukuhlaselwa kwenkolo yeqiniso. UHezekheli usitshela ‘ngoGogi waselizweni laseMagogi’ omelwa yizizwe ezizamanyana zilenhloso yinye yokuhlasela abantu bakaNkulunkulu. Kodwa uNkulunkulu uzabavikela abantu bakhe ekuhlaselweni lokhu.​—UHezekheli 38:​1, 2, 9-​12, 18-​23.

•   Ukwahlulelwa kwabantu. UJesu uzakwahlulela bonke abantu futhi ‘uzabehlukanisa babe ngamaqembu amabili njengomelusi esehlukanisa izimvu lembuzi.’ (UMathewu 25:31-​33) Abantu bazakwahlulelwa kusiya ngokuthi babaphatha njani ‘abafowabo’ bakaJesu okutsho labo azabusa labo ezulwini.​—UMathewu 25:34-​46.

•   Ukuqoqwa kwalabo abazabusa eMbusweni. Abathembekileyo abakhethwe ukuthi babuse loKhristu abazabe belokhu besemhlabeni, bazaguqulwa besebethola umvuzo wabo wokuyaphila ezulwini.​—UMathewu 24:31; 1 KwabaseKhorinte 15:50-​53; 1 KwabaseThesalonika 4:​15-​17.

•   I-Amagedoni. Le ‘yimpi yosuku olukhulu lukaNkulunkulu uSomandla’ ebizwa langokuthi ‘lusuku lukaJehova.’ (ISambulo 16:14, 16; U-Isaya 13:9; 2 UPhetro 3:​12) Labo abazathola isahlulelo sokubhujiswa bazatshabalaliswa nguKhristu. (UZefaniya 1:​18; 2 KwabaseThesalonika 1:​6-​10) Lokhu kugoqela lokutshabalaliswa kwazo zonke ezombusazwe ezikhona emhlabeni lo ezimelwa yisilo esilamakhanda ayisikhombisa.​—ISambulo 19:19-​21.

Okuzakwenzakala ngemva kokuhlupheka okukhulu

•   Ukubotshwa kukaSathane lamadimoni akhe. Ingilosi enkulu izaphosela uSathane lamadimoni akhe “emgodini ongelamkhawulo” okutsho ukuthi bayabe bengasenelisi ukudukisa abantu. (ISambulo 20:​1-3) Nxa uSathane esemgodini ongelamkhawulo kuyabe kungani usentolongweni, uyabe engasenelisi ukuphambanisa izinto emhlabeni.​—ISambulo 20:7.

•   Ukubusa kukaKhristu okweminyaka eyinkulungwane. UMbuso kaNkulunkulu uzaqalisa ukubusa okweminyaka engu-1 000 njalo uzaletha izibusiso ezinengi ebantwini. (ISambulo 5:​9, 10; 20:​4, 6) ‘Ixuku elikhulu kakhulu elizaphuma ekuhluphekeni okukhulu’ lizabona uKhristu eqalisa ukubusa emhlabeni okweminyaka eyinkulungwane.​—ISambulo 7:​9, 14; IHubo 37:​9-​11.