Kutshoni Ukubhabhathizwa?
Impendulo yeBhayibhili
Nxa umuntu ebhabhathizwa kumele acwiliswe emanzini. a IBhayibhili lilezibonelo zabantu abatshiyeneyo ababhabhathizwayo. (ImiSebenzi 2:41) Omunye wabo nguJesu owabhabhathizwa ngokucwiliswa emfuleni uJodani. (UMathewu 3:13, 16) Ngemva kweminyaka ethile, indoda engumTopiya yabhabhathizwa “endaweni eyayilamanzi” eyayiseduze kwendlela.—ImiSebenzi 8:36-40.
UJesu wathi labo abafuna ukuba ngabalandeli bakhe kumele babhabhathizwe. (UMathewu 28:19, 20) Umphostoli uPhetro laye wakhuluma amazwi ahambelana lalawo.—1 UPhetro 3:21.
Okusesihlokweni lesi
Kutshoni ukubhabhathizwa?
Nxa umuntu ebhabhathizwa uyabe etshengisa obala ukuthi usephendukile ezonweni zakhe lokuthi usethembise uNkulunkulu ukuthi usezakwenza intando yakhe. Uyabe esezimisele lokulalela uNkulunkulu loJesu. Abantu ababhabhathizwayo baba lethuba lokuthola ukuphila okungapheliyo.
Ukucwiliswa emanzini kutshengisa ukuthi umuntu usetshintshile indlela abephila ngayo. Kungani sisitsho njalo? Kungenxa yokuthi iBhayibhili lifanisa ukubhabhathizwa lokungcwatshwa. (KwabaseRoma 6:4; KwabaseKholose 2:12) Nxa umuntu ecwiliswa emanzini kuyabe kungani usefile endleleni abephila ngayo. Nxa ephuma emanzini uyabe eseqalisa impilo entsha yokuba ngumKhristu ozinikele kuNkulunkulu.
IBhayibhili lithini ngokubhabhathizwa kwezinsane?
Akulandawo eBhayibhilini lapho esitshelwa khona ukuthi izinsane kumele zibhabhathizwe. b Kodwa lifundisa ukuthi kulezinto okumele umuntu azenze nxa efuna ukubhabhathizwa. Ngokwesibonelo kumele azwisise imfundiso eziqakathekileyo eziseLizwini likaNkulunkulu njalo aphile ngokuvumelana lazo. Kumele aphenduke ezonweni zakhe abesezinikela kuNkulunkulu ngomthandazo. (ImiSebenzi 2:38, 41; 8:12) Izinsane azenelisi ukwenza izinto lezi.
Kutshoni ukubhabhathizwa ebizweni likaBaba leleNdodana lelomoya ongcwele?
UJesu watshela abalandeli bakhe ukuthi ‘benze abafundi bababhabhathize ebizweni likaBaba leleNdodana lelomoya ongcwele, babafundise ukulandela izinto zonke ayebatshele zona.’ (UMathewu 28:19, 20) Ukubhabhathizwa “ebizweni likaBaba leleNdodana lelomoya ongcwele” kutsho ukuthi lowo obhabhathizwayo uyazwisisa isikhundla sikaBaba, leseNdodana lokuthi umoya ongcwele uyini. Ngokwesibonelo, umphostoli uPhetro watshela indoda eyayizelwe igogekile wathi: “Ngebizo likaJesu Khristu umNazaretha, sukuma uhambe!” (ImiSebenzi 3:6) Lokhu kutshengisa ukuthi uPhetro wayekwazi ukuthi uKhristu nguye olamandla okwelapha indoda le.
“UBaba” nguJehova c uNkulunkulu. UJehova ulesikhundla esiphezulu kulazo zonke ngoba unguMdali, unguNkulunkulu uSomandla futhi nguye osinika ukuphila.—UGenesisi 17:1; ISambulo 4:11.
“INdodana” nguJesu Khristu owanikela ngokuphila kwakhe ngenxa yethu. (KwabaseRoma 6:23) Okuzasenza sisindiswe yikukholwa ukuthi uJesu nguye osetshenziswa nguNkulunkulu ukuthi agcwalise inhloso yakhe ngabantu.—UJohane 14:6; 20:31; ImiSebenzi 4:8-12.
“Umoya ongcwele” ngamandla kaNkulunkulu awasebenzisayo. d UNkulunkulu wasebenzisa umoya wakhe ukuze adale zonke izinto. Waphinda wawusebenzisa ukuthi atshele abaphrofethi labanye abantu imilayezo yakhe lokuthi abancedise ukwenza intando yakhe. (UGenesisi 1:2; UJobe 33:4; KwabaseRoma 15:18, 19) Kanti njalo uNkulunkulu wasebenzisa umoya wakhe ongcwele ukuze aphefumulele labo ababhala iBhayibhili ukuthi babhale lokho ayekufuna.—2 UPhetro 1:21.
Kuyisono yini ukuphinda ubhabhathizwe?
Kwezinye izikhathi abantu bayatshintsha amatshetshi abawangenayo. Kodwa kuthiwani nxa umuntu wayevele esebhabhathiziwe etshetshi ayeyingena? Uyabe esenza isono yini nxa angaphinda abhabhathizwe? Abanye bangathi uyabe esenza isono ngoba u-Efesu 4:5 uthi: “KuleNkosi eyodwa, lokholo olulodwa, lobhabhathizo olulodwa.” Kodwa ivesi le kayalisi muntu ukuthi aphinde abhabhathizwe. Kungani sisitsho njalo?
Amanye amavesi asinceda sizwisise ivesi le. Amanye amavesi aku-Efesu isahluko 4 atshengisa ukuthi umphostoli uPhawuli wayekhuluma ngokuqakatheka kokuthi amaKhristu eqiniso amanyane kulokho akukholwayo. (Kwabase-Efesu 4:1-3, 16) Okwakuzawanceda ukuthi amanyane yikuba leNkosi eyodwa uJesu Khristu, ukukholwa izinto ezifananayo ezifundiswa liBhayibhili lokulandela lokho elikutshoyo endabeni yokubhabhathizwa.
Umphostoli uPhawuli wakhuthaza abanye ababebhabhathiziwe ukuthi baphinde babhabhathizwe. Lokhu kwakungenxa yokuthi babengakazwisisi ngokugcweleyo okwakufundiswe nguJesu.—ImiSebenzi 19:1-5.
Okwenza umuntu abhabhathizwe. Ukuze umuntu abhabhathizwe ngendlela eyamukelwa nguNkulunkulu, kuyabe kumele aqale abe lolwazi oluqondileyo olusekelwe eBhayibhilini. (1 KuThimothi 2:3, 4) Kodwa nxa umuntu engabhabhathizwa elandela izimfundiso ezingasekelwanga eBhayibhilini, ukubhabhathizwa kwakhe akwamukeleki kuNkulunkulu. (UJohane 4:23, 24) Lanxa wayengabe ezitshela ukuthi wenza into eqondileyo, iqiniso yikuthi lokhu wakwenza ‘engelalwazi oluqondileyo’. (KwabaseRoma 10:2) Nxa umuntu lo efuna ukwamukelwa nguNkulunkulu kuyabe sekumele afunde iqiniso eliseBhayibhilini, asebenzise lokho akufundileyo, azinikele kuNkulunkulu futhi aphinde abhabhathizwe. Esimeni esinjalo, umuntu ophinda abhabhathizwe uyabe engenzi isono kodwa uyabe esenza into eqondileyo.
Okunye ukubhabhathizwa okukhulunywa ngakho eBhayibhilini
IBhayibhili liphinda likhulume ngokunye ukubhabhathizwa okutshiyene lokucwiliswa emanzini okwakusenziwa ngabalandeli bakaKhristu. Nanzi ezinye izibonelo:
Ubhabhathizo olwenziwa nguJohane uMbhabhathizi. e AmaJuda labanye ababephendukele okholweni lwesiJuda ababhabhathizwa nguJohane babetshengisa ukuthi sebephendukile ezonweni zabo ababezenze ngokwephula uMthetho kaNkulunkulu ayewunike ama-Israyeli esebenzisa uMosi. Ubhabhathizo olwalusenziwa nguJohane lwalunceda abantu bakwazi ukuthi uJesu umNazaretha nguye uMesiya besebemamukela.—ULukha 1:13-17; 3:2, 3; ImiSebenzi 19:4.
Ukubhabhathizwa kukaJesu. Ukubhabhathizwa kukaJesu nguJohane uMbhabhathizi kwakutshiyene lokwabanye. UJesu wayephelele futhi kenzanga sono. (1 UPhetro 2:21, 22) Yikho ukubhabhathizwa kwakhe kwakungasokokuphenduka kumbe ‘okokucela umzwangedwa omuhle kuNkulunkulu.’ (1 UPhetro 3:21) Kodwa kwakutshengisa ukuthi uzimisele ukwenza intando kaNkulunkulu, njengoba wayenguMesiya kumbe uKhristu owayethenjisiwe. Ukwenza intando kaNkulunkulu kwakugoqela lokuthi anikele ngokuphila kwakhe ngenxa yethu.—KumaHebheru 10:7-10.
Ukubhabhathizwa ngomoya ongcwele. UJohane uMbhabhathizi loJesu Khristu bakhuluma ngokubhabhathizwa ngomoya ongcwele. (UMathewu 3:11; ULukha 3:16; ImiSebenzi 1:1-5) Ubhabhathizo lolu lutshiyene lokubhabhathizwa ebizweni lomoya ongcwele. (UMathewu 28:19) Kutshiyene njani?
Balutshwana abalandeli bakaJesu ababhabhathizwa ngomoya ongcwele. Ubhabhathizo lolu lutsho ukugcotshwa ngomoya ongcwele. Yikho labo abagcotshwe ngomoya bakhethiwe ukuthi bayekuba loKhristu ezulwini ukuze babuse umhlaba bengamakhosi labaphristi. f (1 UPhetro 1:3, 4; ISambulo 5:9, 10) Bayabe bebusa izigidi zabalandeli bakaJesu abazaphila emhlabeni olipharadayisi kuze kube nini lanini.—UMathewu 5:5; ULukha 23:43.
Ukubhabhathizelwa kuJesu Khristu lasekufeni kwakhe. Labo ababhabhathizwe ngomoya ongcwele, kuphinda kuthiwe ‘babhabhathizelwe kuKhristu uJesu.’ (KwabaseRoma 6:3) Ubhabhathizo lolu ngolwalabo abagcotshwe ngomoya ongcwele abazabusa loJesu ezulwini. Ukubhabhathizelwa kuJesu kubenza babe ngamalunga ebandla lakhe eligcotshiweyo. UJesu uyinhloko bona bangumzimba.—1 KwabaseKhorinte 12:12, 13, 27; KwabaseKholose 1:18.
AmaKhristu agcotshiweyo aphinda ‘abhabhathizelwe ekufeni kukaJesu.’ (KwabaseRoma 6:3, 4) Alingisela uJesu ngokulalela uNkulunkulu kukho konke kulokuqakathekisa lokho akufunayo njalo ayakwazi ukuthi awasoze aphile emhlabeni kuze kube nini lanini. Ukubhabhathizwa kwawo kuphela nxa esifa futhi ethola umvuzo wokuyaphila ezulwini eseyizidalwa zomoya.—KwabaseRoma 6:5; 1 KwabaseKhorinte 15:42-44.
Ukubhabhathizwa ngomlilo. UJohane uMbhabhathizi watshela labo ababemlalele wathi: “Yena [uJesu] uzalibhabhathiza ngomoya ongcwele langomlilo. Ifotsholo yakhe yokwela isesandleni sakhe. Uzayenza ihlanzeke ngokupheleleyo indawo abhulela kuyo, abuthe ingqoloyi yakhe ayifake esiphaleni kodwa amakhoba awatshise ngomlilo ongacitshekiyo.” (UMathewu 3:11, 12) Ungaphi umehluko phakathi kokubhabhathizwa ngomlilo lokubhabhathizwa ngomoya ongcwele? Umzekeliso kaJohane omayelana lengqoloyi lamakhoba utshoni?
Ingqoloyi imela labo ababezalalela uJesu futhi bamhloniphe ngoba bayenelisa ukuthola ithuba lokubhabhathizwa ngomoya ongcwele. Amakhoba wona amela labo ababengasoze balalele uJesu. Isiphetho sabo yikubhabhathizwa ngomlilo futhi lokho kutsho ukubhujiswa kwaphakade.—UMathewu 3:7-12; ULukha 3:16, 17.
a Ibala lesiGrikhi elihunyutshwe ngokuthi “ukubhabhathizwa” litsho “ukucwiliswa kumbe ukutshoniswa emanzini ubusuphuma,” ngokwesichazamazwi okuthiwa yi-Vine’s Complete Expository Dictionary of Old and New Testament Words.
b Ukubhabhathizwa kwezinsane kujayele ukwenziwa kwamanye amasonto lapho izinsane ezinikwa khona amabizo besezibhabhathizwa ngokufafazwa kumbe ngokuthelwa amanzi ekhanda.
c UJehova libizo likaNkulunkulu. (IHubo 83:18) Khangela isihloko esithi “Ngubani UJehova?”
d Bala isihloko esithi “Uyini Umoya Ongcwele?”
e Bala isihloko esithi “Who Was John the Baptist?”
f Bala isihloko esithi “Ngobani Abazakuya Ezulwini?”
g IBhayibhili liphinda lisebenzise ibala elithi “ukubhabhathizwa” nxa likhuluma ngalokho okwakusenziwa ukuze kuhlanjululwe izitsha. (UMakho 7:4, amabala angaphansi; KumaHebheru 9:10, amabala angaphansi) Kodwa lokhu kutshiyene lokucwiliswa emanzini okwenziwa nguJesu labalandeli bakhe ngesikhathi bebhabhathizwa.
Nanku Okunye
IMIBUZO YEBHAYIBHILI IYAPHENDULWA
UNkulunkulu Wamukela Wonke Amasonto Yini?
Zwana ukuthi iBhayibhili liwuphendula njani umbuzo lo.
ESSENTIAL BIBLE TEACHINGS
UNkulunkulu Wamukela Zonke Izindlela Zokukhonza Yini?
Abantu abanengi bathi akulandaba ukuthi ungena yiphi inkolo.
IMIBUZO EBUZWA NGABASAKHULAYO
Kumele Ngibhabhathizwe Yini?—Kutshoni Ukubhabhathizwa?
Nxa ufuna ukubhabhathizwa kumele uqale ukwazi ukuthi kutshoni.
IMIBUZO YEBHAYIBHILI IYAPHENDULWA
Kutshoni Ukusindiswa?
Kumele senzeni ukuze sisindiswe? Kanti njalo sisindiswa kukuphi?
