UJehova uNkulunkulu unguMdali futhi ungusomandla. * Yikho-ke abantu abanengi bangacina sebecabanga ukuthi nguye obangela zonke izinto ezenzakala emhlabeni, okugoqela lakho konke okubi. Kodwa khangela ukuthi iBhayibhili lithini ngoNkulunkulu weqiniso:

• “UJehova ulungile kuzo zonke izindlela zakhe.”​—IHubo 145:17.

• “Izindlela zakhe [uNkulunkulu] zilungile. UNkulunkulu olungileyo othembekileyo ongenzi okubi, uqotho njalo ulungile yena.”​—UDutheronomi 32:4.

• “INkosi igcwele isihawu esikhulu lomusa.”​—UJakhobe 5:11.

UNkulunkulu kabangeli izinto ezimbi. Kodwa nguye yini okhuthaza abantu ukuthi bazenze? Hatshi! IMibhalo ithi: “Ekulingweni, kakho omele athi, ‘UNkulunkulu uyangilinga.” Ngani? Ngoba “uNkulunkulu angeke alingwe yibubi, kumbe alinge umuntu.” (UJakhobe 1:13) Kalingi muntu ngokumkhuthaza ukuthi enze izinto ezimbi. Kuyacaca ukuthi kayisuye obangela izinto ezimbi njalo kakhuthazi abantu ukuthi bazenze. Pho-ke zibangelwa kuyini izinto ezimbi?

IBhayibhili lisitshela esinye isizathu esenza abantu bahlupheke. Lithi: “Abantu bafikelwa yizikhathi ezimbi ezibafikela belibele.” (UmTshumayeli 9:12) Umuntu angehlelwa yingozi elibele ngenxa yokuthi uyabe ekuleyo ndawo lapho isenzakala. Eminyakeni engaba ngu-2 000 eyadlulayo, uJesu Khristu wakhuluma ngabantu abangu-18 abawelwa ngumphotshongo bafa. (ULukha 13:1-5) Ingozi le yabehlela ngenxa yokuthi babengaphansi komphotshongo ngesikhathi usiwa, hatshi ngenxa yalokho ababekwenzile ezimpilweni zabo. NgoJanuary 2010 kwaba lokuzamazama komhlaba okukhulu kakhulu eHaiti. Uhulumende wakulelo wathi kwafa abantu abadlula i-300 000. Abantu laba bafa kungelani lokuthi banjani. Kanti njalo sonke singagula loba nini.

Abanye bangathi: ‘Kanti pho uNkulunkulu uyabe engaphi nxa izingozi lezi eziqeda abantu kangaka zisenzakala? Kungani engabavikeli abantu abalungileyo?’ Phela ukuze uNkulunkulu enze njalo kuyabe sekumele akwazi okubi okuzakwenzakala. Kuliqiniso sibili ukuthi ulamandla okubona izinto zingakenzakali. Kodwa amandla la uphonguwasebenzisa yini kumbe uyakhetha ukuthi uwasebenzisa ngaphi?​—U-Isaya 42:.

IMibhalo ithi: “UNkulunkulu wethu usezulwini; wenza loba yini ayithandayo.” (IHubo 115:3) UJehova wenza loba yini ayibona ifanele, hatshi konke anelisa ukukwenza. Kutsho ukuthi lanxa ekhangela izinto ezizakwenzakala, uyakhetha  kaphongukhangela konke. Ngokwesibonelo lapho abantu beSodoma leGomora beqhubeka besenza izinto ezimbi, uNkulunkulu wathi ku-Abhrahama: “Sengizakuya khona ngiyobona ingabe lokho abakwenzileyo kubi okulingana lensolo le esifikile kimi. Nxa kungenjalo, ngizakwazi.” (UGenesisi 18:20, 21) Ekuqaliseni uJehova wayengazange atshone ebalandelela ukuze akwazi konke ababekwenza. Yikho-ke nxa esebenzisa amandla akhe okubona izinto ezizakwenzakala, kawasebenzisi kukho konke. (UGenesisi 22:12) Lokhu akutsho ukuthi kuyabe kumehlula. Njengoba “imisebenzi yakhe iphelele,” uNkulunkulu usebenzisa amandla akhe okubona okuzakwenzakala, ikakhulu ezintweni eziphathelane lenjongo yakhe. Kabambi abantu ngamandla ukuthi benze lokho akufunayo. * (UDutheronomi 32:4) Yikho-ke singaphetha ngokuthini? Ngokuthi uNkulunkulu usebenzisa amandla akhe okubona okuzakwenzakala kusiya ngokuthi kuyini akufunayo ngaleso ­sikhathi.

Labantu bayakubangela ukuhlupheka. IBhayibhili liyachaza ukuthi kuyini okwenza umuntu acine esenza okubi. Lithi: “Lowo lalowo ulingwa yinkanuko yakhe embi, lapho edonselwa kude ehugwa. Ngakho nxa inkanuko isiyemule izala isono; njalo isono lapho sesikhulile okugcweleyo, sizala ukufa.” (UJakhobe 1:14, 15) Abantu bangahlupheka ngenxa yokulandela izinkanuko kanye lezifiso ezimbi. (KwabaseRoma 7:21-23) Kusukela kudala abantu bebesenza izinto ezesabekayo, ezibangele ukuhlupheka okukhulu. Okubi kakhulu yikuthi abantu ababi bayenga labanye ukuthi benze izinto ezimbi, besekubangela ukuthi ububi bugcwale.​—IZaga 1:10-16.

UNkulunkulu kumele angenele yini nxa ebona abantu besenza okubi? Ake sibone ukuthi vele wabadala njani abantu. IMibhalo ithi uNkulunkulu wadala abantu ngomfanekiso wakhe, okutsho ukuthi banjengoNkulunkulu. Yikho-ke abantu bangenelisa ukutshengisa izimpawu zobuntu bakhe. (UGenesisi 1:26) Wabadala belenkululeko yokuzikhethela. Lokhu kutshengisa ukuthi bangazikhethela ukuthi bamthande njalo bathembeke kuye ngokwenza lokho akufunayo. (UDutheronomi 30:19, 20) Phela nxa esebamba abantu ngenkani ukuthi benze okuthile, kuyabe sekufanana lokuthi sebathathela leyo nkululeko yokuzikhethela. Kanti njalo abantu bayabe sebenjengemitshina, enza lokho ehlelelwe ukuthi ikwenze kuphela. Siyabe sesiyimitshina sibili nxa kuyikuthi okwenzakala ezimpilweni zethu kwahlelwa kudala. Siyathokoza kakhulu ngokuthi uNkulunkulu wasivumela ukuthi sizikhethele ukuthi sizaphila njani! Kodwa lokhu akutsho  ukuthi ukuhlupheka okubangelwa ngabantu kuzahlala kukhona.

Nxa ubungabuza umHindu kumbe umBuddha umbuzo ophandle kwemagazini le, ubungamuzwa esithi: “Izinto ezimbi zehlela abalungileyo ngenxa yomthetho we-Karma. Bayahlupheka ngenxa yalokho abakwenza ezimpilweni zabo zakuqala.” *

Kuyanceda ukukhangela ukuthi iBhayibhili lithini ngokufa ukuze sibone ukuthi imfundiso ye-Karma iliqiniso yini. Lapho uNkulunkulu edala u-Adamu esivandeni sase-Edeni, wathi kuye: “Ukhululekile ukudla loba yisiphi isihlahla esivandeni; kodwa ungadli isihlahla sokwazi okuhle lokubi ngoba ungaze usidle uzakufa ngempela.” (UGenesisi 2:16, 17) Ngabe u-Adamu walalela uNkulunkulu, wayezaphila kuze kube nini lanini. Ukufa kwakuyisijeziso sokungalaleli umlayo kaNkulunkulu. Yikho-ke abantwana ­baka-Adamu bathi bezalwa, “ukufa kwafika ebantwini bonke.” (KwabaseRoma 5:12) Lokhu kutshengisa ukuthi “umvuzo wesono yikufa.” (KwabaseRoma 6:23) Kanti njalo iBhayibhili lithi: “Lowo osefile usekhululwe esonweni.” (KwabaseRoma 6:7) Ngamanye amazwi, abantu abaqhubeki bejeziselwa izono zabo nxa sebefile.

Lamuhla izigidi zabantu zithi i-Karma layo iyakubangela ukuhlupheka. Kanengi umuntu okholwa imfundiso le uyakwamukela ukuhlupheka kwakhe lokwabanye engazikhathazi kangako. Kodwa yenza ukuthi abantu basale bengelathemba lokuthi izinto ezimbi zizaphela. Bakholwa ukuthi umuntu uyakhululwa ekuhluphekeni angadlula ibanga lokuzalwa kutsha okutsho ukuthi uyabe selobuntu obamukelwayo kanye lolwazi oluqakathekileyo lwesiHindu. Imibono le itshiyene kakhulu lalokho okutshiwo liBhayibhili. *

USathane uDeveli nguye owabangela ukuhlupheka. Wayeyingilosi kaNkulunkulu ethembekileyo kodwa “kazema eqinisweni,” yikho waletha isono emhlabeni. (UJohane 8:​44) Nguye owabangela ukuthi abantu bokuqala ababili bahlamukele uNkulunkulu esivandeni sase-Edeni. (UGenesisi 3:1-5) UJesu Khristu wambiza wathi ‘ngomubi’ waphinda wathi ‘yinkosi yalo umhlaba.’ (UMathewu 6:13; UJohane 14:30) USathane uyenga abantu abanengi ukuthi bangalaleli uJehova. (1 UJohane 2:15, 16) U-1 Johane 5:19 uthi: “Umhlaba wonke ungaphansi kwamandla omubi.” Kanti njalo kulezinye izingilosi ezahlamukayo zalandela uSathane. IBhayibhili lithi uSathane lamadimoni akhe ‘badukisa umhlaba wonke,’ bebangela ukuthi kube ‘lomaye kuwo wonke umhlaba.’ (ISambulo 12:9, 12) Yikho-ke uSathane uDeveli nguye okumele asolwe kakhulu ngokuhlupheka okusemhlabeni.

Kuyacaca-ke ukuthi uNkulunkulu kabangeli ukuthi abantu bahlupheke loba ukuthi izinto ezimbi zenzakale. Kodwa yena usithembisa ukuthi uzakususa konke ukuhlupheka kuphele du. Isihloko esilandelayo sizakhuluma ngalokhu.