Omunye umama oleminyaka engu-35 okuthiwa nguSmita, * owayehlala eDhaka, eBangladesh, wayelothando futhi engumuntu wabantu. Abantu babekwazi ukuthi wayengumuntu okhutheleyo owayehlala ethabile njalo ethanda ukufundisa abantu ngoNkulunkulu. Kodwa abangane bakhe lemuli yakhe basala betshe amathe ngoba waphonguhlaselwa ngumkhuhlane, wafa kungakapheli leviki.

UJames lomkakhe ngabanye ababenjengoSmita. Bobabili babeleminyaka engaba ngu-30 futhi babesanda kutshada. Ngelinye ilanga basuka emzini wabo eNew York, e-United States, besiyavakatshela abangane babo abahlala kwelinye idolobho eliseNtshonalanga, duze lolwandle. Kodwa besuka babengakwazi ukuthi bayawucina umuzi wabo. Bafela engozini yomgwaqo. Lokhu kwatshiya izihlobo zabo, abangane lababesebenza labo besebuhlungwini obukhulu.

Akudingi ukuthi uqanse amaqaqa ukuze ubone ukuthi kunzima emhlabeni. Amasotsha labantu bayaphela ezimpini. Izigebenga zihlasela abantu abangelacala njalo kugcwele udlakela. Abanye bafela ezingozini njalo kulemikhuhlane ebuhlungu ehlasela abantu kungelani lokuthi baleminyaka emingaki kumbe ukuthi balani empilweni. Kanti njalo iziphepho lokuzamazama komhlaba kutshabalalisa izigidi zabantu. Kugcwele ubandlululo lokucindezelana. Mhlawumbe lawe lokhu sekwake kwakwehlela.

Yikho abantu bezibuza imibuzo le:

• Kungani abantu abalungileyo besehlelwa yizinto ezimbi?

• UNkulunkulu nguye ozibangelayo yini?

• Izingozi ziyazenzakalela yini kumbe zibangelwa ngabantu?

• Ukuhlupheka kungabe kubangelwa yilokho abakubiza bethi yi-Karma yini, okutsho ukuthi umuntu uyabe ehlupheka ngenxa yalokho akwenza empilweni yakhe yakuqala?

• Nxa kuyikuthi uNkulunkulu ulamandla amakhulu, kungani engabavikeli abantu abalungileyo?

• Ukuhlupheka lezinto ezimbi kuzaphela yini?

Ukuze sithole izimpendulo zemibuzo le kufanele siqale sixoxe ngokuthi kungani vele izinto ezimbi zisenzakala lokuthi uNkulunkulu uzakwenzani ngazo.