Yeqa uye kokuphakathi

Yeqa uye kokumunyethweyo

INDLELA IMINIKELO ESETSHENZISWA NGAYO

I-Library Ongayithwala Ngesandla

I-Library Ongayithwala Ngesandla

SEPTEMBER 1, 2021

 Usawakhumbula yini amazwi akhulunywa nguGeoffrey Jackson embikweni wesithupha weQula Elibusayo ka-2020? Wathi: “Eminyakeni esanda kudlula sasingakucabangi ukuthi singathola ukudla okuqinisa ukholo kusetshenziswa ezempucuko. Kodwa khathesi esizibuza khona yikuthi besizakwenza njani aluba kasilawo amathuluzi anjenge-JW Library? Kuyazicacela ukuthi eminyakeni yonke le edlulileyo, uJehova ubesilungiselela izimo ezinjengalezi.”

 Kodwa uJehova usilungiselele njani? Abafowethu benzani ukuze sibe le-JW Library app? Kuyini okwenziwayo ukuze iqhubeke isebenza kuhle? Kwenziwani ukuze ihlale ihambisana lesikhathi?

Akula Enjengayo

 NgoMay 2013, iQula Elibusayo lacela abasebenza le-MEPS Programming emawofisini ethu amakhulu ukuthi benze i-application eleBhayibhili okuthiwa yi-New World Translation ethuthukisiweyo. UPaul Willies osebenza lediphathimenti ye-MEPS Programming uthi: “Sasingakaze senze i-application etholakala kwezempucuko. Kwakhethwa iqembu elalizakwenza umsebenzi lo, kwamiswa eminye imisebenzi esasiphakathi kwayo futhi sancedisana lamanye amadiphathimenti. Waqalisa njalo umsebenzi wokwenza i-JW Library app lalokho okwakuzafakwa kuyo. Sasihlala sithandaza kuJehova futhi kwazicacela ukuthi wasincedisa ngoba senelisa ukwethula i-application le emhlanganweni owenziwa minyaka yonke ngemva kwezinyanga ezinhlanu kuphela siqalise umsebenzi wakhona.”

 Kwasokusele ukuthi i-app le ifakwe amabhuku atshiyeneyo futhi itholakale ngendimi ezinengi. NgoJanuary 2015, amabhuku ethu amanengi ayesetholakala ku-JW Library ngesiNgisi kwazothi ngemva kwezinyanga eziyisithupha kuphela, amabhuku la ayesetholakala langezinye indimi ezinengi futhi abantu basebesenelisa ukuwadawuniloda.

 Kusukela lapho i-JW Library isithuthukiswe ngendlela ezitshiyeneyo. Ngokwesibonelo, sokutholakala amavidiyo, amabhuku atshiyeneyo lezinto ezisetshenziswa emihlanganweni yebandla. Ususenelisa lokusebenzisa Ibhuku Lokuchwayisisa ngokuhlaba nje ivesi eseBhayibhiyilini.

Ukugcina i-JW Library Isebenza Kuhle

 Nsukuzonke, i-JW Library isetshenziswa emitshineni engu-8 miliyoni ikanti ngenyanga eyodwa isetshenziswa emitshineni edlula 15 miliyoni. Kuyini okuhlala kusenziwa ukuze i-JW Library iqhubeke isebenza kuhle emitshineni etshiyeneyo? Umfowethu uWillies uthi: “Ama-application asetshenziswa kwezempucuko kumele ahlale ethuthukiswa ukuze aqhubeke esebenza kuhle njalo kube lula lakulabo abawasebenzisayo. Phela ezempucuko zihlala zithuthukiswa ngaso sonke isikhathi yikho lathi kumele sihlale sithuthukisa i-JW Library ukuze layo ihlale ihambisana lesikhathi. Okunye okwenza senze njalo yikuthi amabhuku, lezinto ezirekhodiweyo lokunye okunengi okumele kufakwe ku-JW Library lokhe kuqhubeka kusanda.” Sikhuluma nje, kulamabhuku afika 200 000 lamavidiyo lokunye okurekhodiweyo okwedlula 600 000 okutholakala ngezindimi ezitshiyeneyo ku-JW Library!

 Ukuze i-JW Library iqhubeke isebenza kuhle, kulokunye okunengi okumele sibe lakho ngaphandle kwamakhompiyutha. Ngokwesibonelo, kumele sibe lamalayisensi ama-software atshiyeneyo futhi ilayisensi eyodwa iyi-$1 500 (U.S.) ngomnyaka. Ikanti abeMEPS Programming basebenzisa imali efika $10 000 (U.S.) umnyaka ngamunye bethenga imitshina elungiswa ngamakhampani atshiyeneyo ukuze babe leqiniso lokuthi i-JW Library iqhubeka isebenza kuhle kumakhompiyutha, kuma-tablet lasemafonini akulezinsuku.

Ukudawuniloda Kuyanceda Ekongeni Imali

 Ukuba le-JW Library sokunciphise imali esiyisebenzisa ekuphrinteni amabhuku lokuwahambisa ezindaweni ezitshiyeneyo. Ngokwesibonelo, kwaphrintwa amakhophi angu-12 miliyoni ebhukwana elithi Ukuhlola IMibhalo Nsuku Zonke ka2013 kodwa sekuphrintwa amakhophi ka-2020, kwaphrintwa angu-5 miliyoni kuphela lanxa inani labamemezeli laseliqanse nge-700 000 emhlabeni wonke. Lokhu kwabangelwa yikuthi abafowethu labodadewethu abanengi sebebala umbhalo wosuku besebenzisa i-JW Library. a

“Lithuluzi Elihle Kakhulu”

 I-JW Library isincede abantu abanengi kakhulu. UGeneviève ohlala eCanada uthi khathesi usekukhuthalele ukutaditsha ngenxa yokuthi ule-JW Library. Uthi: “Angiboni ukuthi bengizenelisa ukutaditsha nsukuzonke ekuseni, phela ngumsebenzi ukubuthelela wonke amabhuku oyabe ufuna ukuwasebenzisa. Kodwa kulula ukwenza njalo khathesi, phela ngiphonguthatha i-tablet yami besengivula i-JW Library ngoba ilakho konke engikusebenzisa nxa ngitaditsha. Ukwenza lokhu nsukuzonke kuqinise ukholo lwami futhi kwangenza ngasondela kakhulu kuJehova.”

UGeneviève

 Ukuthi i-JW Library iluncedo kakhulu, kukhanye langesikhathi lesi seCOVID-19. UCharlyn ohlala e-United States uthi: “Sokudlule umnyaka owodwa ngingatholi amabhuku ethu aphrintiweyo ngenxa yokumemetheka komkhuhlane weCOVID-19 emhlabeni wonke, kodwa ngilawo wonke ku-JW Library. Ngiyambonga kakhulu uJehova ngoba usinika konke esikudingayo ukuze sibe lokholo oluqinileyo.”

 Abanengi bavumelana loFaye ohlala ePhilippines. Uthi: “I-JW Library ingincede kakhulu ukuthi ngihlale ngingumnngane kaJehova. Ngihle ngiqalise ukuyisebenzisa ekuseni ngisanda kuvuka futhi yiyo engiyisebenzisayo ukulalela okurekhodiweyo nxa ngizenzela imisebenzi yendlini. Ngiyisebenzisa lokulungiselela imihlangano yebandla langesikhathi ngilungiselela engizakufundisa abanye ekutshumayeleni. Ngisebenzisa yona ukubukela amavidiyo atshiyeneyo nxa ngizikwejisele. Ngiyisebenzisa lokubala amabhuku atshiyeneyo leBhayibhili nxa ngiselayinini. I-JW Library lithuluzi elihle kakhulu.”

 I-JW Library iyanceda lasekutshumayeleni futhi lokhu kuyazikhanyela kokwenzakala kudadewethu oseCameroon. Kuleyinye ivesi ayefuna ukuyisebenza ekutshumayeleni futhi ivesi le wayeyizwe isetshenziswa ngudade ayeke waphuma laye ekutshumayeleni kodwa wayengasakhumbuli ukuthi yiphi. Udadewethu uthi: “Ngavula iBhayibhili lami ku-JW Library ngasengibhala amazwi asevesini le engangiwakhumbula, lakanye yathutsha ivesi engangiyidinga. Ukusebenzisa i-JW Library ngendlela le kuyanginceda ukuthi ngithole amavesi engiyabe sengiwakhohliwe.”

 Iminikelo yenu eliyenza lisebenzisa izindlela ezitshiyeneyo ezitholakala ku-donate.jw.org yiyo eyenze senelisa ukuba le-JW Library, senelisa ukuyigcina isebenza kuhle lokuthi sihlale siyithuthukisa ukuze iqhubeke inceda abafowethu labodadewethu emhlabeni wonke. Siyalibonga kakhulu ngeminikelo yenu.

Izinto Ezithokozisayo Nge-JW Library

  1. Ngo-October 2013—Kwethulwa i-JW Library eleBhayibhili le-New World Translation ethuthukisiweyo

  2. NgoJanuary 2015—I-JW Library yayisilamabhuku atshiyeneyo ngesiNgisi, kungakayi ngaphi amabhuku la ayesetholakala langezinye indimi

  3. NgoNovember 2015—Yathuthukiswa ukuze abantu benelise ukudwebela amabhuku abawasebenzisayo

  4. NgoMay 2016—Kwaqoqwa amabhuku lokunye okusetshenziswa emihlanganweni yebandla kwaba ku-tab eyodwa

  5. NgoMay 2017—Kwangezelelwa indlela yokuthi abantu benelise ukubhala ama-notes

  6. NgoDecember 2017—Yathuthukiswa ukuze abantu benelise ukusebenzisa i-Study Bible

  7. NgoMarch 2019—Abayisebenzisayo basebesenelisa ukudawuniloda izinto ezilalelwayo lamavidiyo lokusebenzisa Ibhuku Lokuchwayisisa

  8. NgoJanuary 2021—Yathuthukiswa sokufakwa ibhuku elithi Ungathokoza Kuze Kube Nini Lanini!

a Ukudawuniloda izinto ku-JW Library kulezindleko zakho. Ngokwesibonelo, ngomnyaka ophelileyo kwasetshenziswa imali edlula 1.5 miliyoni (U.S.) ukuze abantu benelise ukudawuniloda loba ukubukela izinto ezitshiyeneyo ku-jw.org laku-JW Library. Lanxa kunjalo, imali le iphansi kakhulu nxa kuqathaniswa lebingasetshenziswa nxa kuphrintwa futhi kuthunyelwa amabhuku, amaCD lamaDVD emazweni atshiyeneyo.