AmaNani 25:1-18
25 Abako-Israyeli bathi sebehlala eShithimi,+ basebeqalisa ukufeba lamadodakazi akoMowabi.+
2 Abesifazana laba banxusa abantu emihlatshelweni yabonkulunkulu babo+ njalo abantu baqalisa ukudla kanye lokukhothamela onkulunkulu babo.+
3 Ngakho abako-Israyeli baqalisa ukukhonza uBhali wasePheyori+ futhi uJehova wabathukuthelela kakhulu.
4 UJehova wasesithi kuMosi: “Thatha bonke abakhokheli babantu laba ubalengise phambi kukaJehova emini libalele ukuze ulaka lukaJehova oluvuthayo lusuke ebantwini bako-Israyeli.”
5 UMosi wasekhuluma labahluleli bako-Israyeli+ wathi: “Ngamunye wenu kumele abulale abantu laba abakhonze uBhali wasePheyori.”+
6 Khonokho nje kwathutsha omunye umuntu wako-Israyeli ezihonqweni elowesifazana ongumMidiyani,+ phambi kukaMosi labo bonke abako-Israyeli, ngesikhathi bekhala besemnyango wetende lokuhlangana.
7 UFiniyasi+ indodana ka-Eliyazari indodana ka-Aroni umphristi wathi ekubona lokhu wahle wasukuma phakathi kwebandla lonke wathatha umkhonto
8 wayilanda indoda yako-Israyeli etendeni wafika wabagwaza bobabili, yona lowesifazana lowo, umkhonto wabahlaba wayathutshela ngale udabula esithweni sensitha sowesifazana. Isifo esasesibehlele abako-Israyeli sahle saphela.+
9 Isifo leso sabulala abantu abangu-24 000.+
10 UJehova wasesithi kuMosi:
11 “UFiniyasi+ indodana ka-Eliyazari, indodana ka-Aroni umphristi, ulususile ulaka lwami ebantwini bako-Israyeli ngoba kazange avumele ukuthi kube lomuntu ongathembekanga kimi phakathi kwabo.+ Ngakho lanxa ngifuna abantu bazinikele kimi kuphela angisazange ngibatshabalalise abako-Israyeli.+
12 Yikho mtshele ukuthi sengisenza laye isivumelwano sami sokuthula.
13 Lesi kuzakuba yisivumelwano sobuphristi esizahlala sikhona kuye labantwabakhe abazalandela ngemva kwakhe+ ngoba kazange avumele ukuthi kube lomuntu ongathembekanga kuNkulunkulu wakhe+ njalo uhlawulele abantu bako-Israyeli.”
14 Kwatholakala ukuthi ibizo lendoda yako-Israyeli eyabulawa kanye lowesifazana ongumMidiyani kwakungu-Zimri indodana kaSalu eyayingumkhokheli wabendlu yakoSimiyoni.
15 Ibizo lowesifazana ongumMidiyani owabulawayo kwakunguKhozibhi indodakazi kaZuri+ umkhokheli wabosendo lwabendlu kayise koMidiyani.+
16 Ngemva kwesikhathi uJehova wathi kuMosi:
17 “Wathwaliseni nzima amaMidiyani liwabulale,+
18 ngenxa yokuthi abelokhu elithwalise nzima ngezenzo zawo zobuqili endabeni kaPheyori+ lekaKhozibhi indodakazi yomkhokheli wakoMidiyani, eyabulawa+ ngelanga lohlupho olwabangelwa* yindaba kaPheyori.”+
Amabala angaphansi
^ Kumbe, “lesifo esabangelwa.”
