IHubo 72:1-20
Ihubo elimayelana loSolomoni.
72 Awu Nkulunkulu, fundisa inkosi imithetho yakho yokwahlulela,Wenze indodana yenkosi yazi ukulunga kwakho.+
2 Kwangathi ingamela abantu bakho ngokulunga,Yahlulele kuhle abahluphekayo.+
3 Kwangathi izintaba zingalethela abantu ukuthula,Lamaqaqa alethe ukulunga.
4 Kwangathi ingavikela* abahluphekayo,Isindise amadodana abayanga,Njalo ichoboze umuntu oliqili.+
5 Njengoba nje ilanga lihlala likhona,Lenyanga ihlala kuze kube phakade,Bazakwesaba Nkulunkulu, izizukulwane ngezizukulwane.+
6 Inkosi izakuba njengezulu elina phezu kotshani obuqunyiweyo,Izakuba njengemifefezo ethambisa umhlabathi.+
7 Ngensuku zayo olungileyo uzaphumelela.*+Kuzakuba lokuthula kuyo yonke indawo+ kuze kube phakade.*
8 Izabusa kusukela kolunye ulwandle kusiya kolunye,Kusukela emfuleni* kusiya emikhawulweni yomhlaba.+
9 Abantu abahlala enkangala bazakhothama phambi kwayo,Izazinqoba izitha zayo.*+
10 Amakhosi eThashishi lawezihlengeni azabhadala umthelo kuyo.+
Amakhosi eShebha laweSebha azaletha izipho.+
11 Wonke amakhosi azakhothama phambi kwayo,Zonke izizwe ziyikhonze.
12 Izalamulela umyanga okhalela uncedo,Ilamulele lomuntukazana kanye laloba ngubani ongelamuntu ongamsiza.
13 Izazwela umuntukazana lomyanga,Isindise abadubekayo.
14 Izabakhulula ekuhlukuluzweni lasebantwini abalodlakela,Impilo yabo izakuba* ligugu kuyo.
15 Kwangathi ingaqhubeka iphila futhi iphiwe igolide leShebha.+
Abantu kabahlale beyikhulekela,Ibusiswe nsuku zonke.
16 Kuzakuba lenala yokudla emhlabeni,+Amabele azakuba manengi eziqongweni zezintaba.
Izilimo zenkosi zizathela njengegusu laseLebhanoni,+Emadolobheni abantu bazakuba banengi njengotshani.+
17 Kwangathi ibizo layo lingahlala kuze kube nini lanini,+Liqhubeke likhona njengelanga.
Kwangathi abantu bangabusiswa ngenxa yayo,+Zonke izizwe kazithi iyathokoza.
18 Kadunyiswe uJehova uNkulunkulu, uNkulunkulu ka-Israyeli.+
Nguye yedwa owenza izinto ezimangalisayo.+
19 Kwangathi ibizo lakhe elikhazimulayo lingadunyiswa kuze kube phakade,+Inkazimulo yakhe igcwale umhlaba wonke.+
Ameni, Ameni.
20 Lapha yikho okuphelela khona imithandazo kaDavida indodana kaJese.+
Amabala angaphansi
^ NgesiHebheru, “ingahlulela.”
^ NgesiHebheru, “uzahluma.”
^ Kumbe, “nxa nje inyanga isesekhona.”
^ Lapha kutshiwo umfula uYufrathe.
^ NgesiHebheru, “Izitha zayo zizakhotha uthuli.”
^ NgesiHebheru, “Igazi labo lizakuba.”
