IHubo 105:1-45
105 Bongani uJehova+ libize ibizo lakhe,Litshele izizwe ngemisebenzi yakhe!+
2 Mhlabeleleni, hlabelani limdumise.
Cabangisisani* ngayo yonke imisebenzi yakhe emangalisayo.+
3 Zigqajeni ngebizo lakhe elingcwele.+
Izinhliziyo zalabo abadinga uJehova kazithokoze.+
4 Dingani uJehova+ lithembele emandleni akhe.
Khangelani kuye zikhathi zonke.
5 Khumbulani imisebenzi emangalisayo ayenzileyo,Lezimangaliso zakhe kanye lezahlulelo azikhulumileyo,+
6 Lina zizukulwane zika-Abrahama inceku yakhe,+Madodana kaJakhobe, lina abakhethiweyo bakhe.+
7 UnguJehova uNkulunkulu wethu,+Izahlulelo zakhe zisebenza emhlabeni wonke.+
8 Uzasikhumbula isivumelwano sakhe kuze kube nini lanini,+Kasoze asikhohlwe isithembiso asenza* ebantwini bakhe,+
9 Isivumelwano asenza lo-Abrahama,+Lesifungo asenza ku-Isaka,+
10 Leso asenza saba ngumthetho kuJakhobe,Isivumelwano esizahlala isikhathi eside, asenza lo-Israyeli
11 Esithi, “Ngizakupha ilizwe leKhenani+Libe lilifa lakho.”+
12 Lokhu wakutsho besesebalutshwana.+
Babebalutshwana kakhulu, beyizihambi elizweni.+
13 Babehamba bethutha besuka kwesinye isizwe besiya kwesinye,Besuka komunye umbuso besiya komunye.+
14 Kavumelanga loba ngubani ukuthi abacindezele.+
Wakhuza amakhosi ngenxa yabo+
15 Wathi, “Lingabathinti abagcotshiweyo bami,Lingenzi lutho olubi kubaphrofethi bami.”+
16 Wehlisela indlala elizweni,+Wenza ukuthi baswele ukudla.
17 Wathumela umuntu phambi kwabo,UJosefa owathengiswa ukuthi abe yisigqili.+
18 Inyawo zakhe bazibopha ngamaketane,+Wabotshwa entanyeni ngensimbi,
19 Kwaze kwaba yilapho ilizwi likaNkulunkulu ligcwaliseka,+Ilizwi likaJehova yilo elamhlambululayo.
20 Inkosi yathi akhululwe,+Umbusi wezizwe wamkhulula ejele.
21 Wamenza waba ngumphathi wendlu yakhe,Wamphathisa yonke impahla yakhe,+
22 Ukuze abuse phezu kwezikhulu zakhe ngokuthanda kwakhe,Afundise labadala besizwe ukuhlakanipha.+
23 U-Israyeli wasebuya eGibhithe,+UJakhobe wahlala elizweni likaHamu engumuntu wesinye isizwe.
24 UNkulunkulu wandisa abantu bakhe baba banengi,+Wabenza baba lamandla kulezitha zabo.+
25 Wasevumela ukuthi izitha zabo zitshintshe zibazonde,Ukuze zibumbe amacebo amabi ngabo.+
26 Wathuma inceku yakhe uMosi,+Kanye lo-Aroni+ ayemkhethile.
27 Benza izimangaliso zakhe phakathi kwabo,Benza izimangaliso elizweni likaHamu.+
28 Wathumela ubumnyama, kwaba mnyama elizweni.+
Bawalalela amazwi akhe.
29 Watshintsha amanzi abo aba ligazi,Wabulala inhlanzi zabo.+
30 Ilizwe labo lagcwala amaxoxo,+Angena lasezindlini zesikhosini.
31 Wathuma izibawu ukuthi zibahlasele,Wathuma leminyane elizweni labo lonke.+
32 Watshintsha izulu labo laba yisiqhotho,Wathumela umbane* elizweni labo.+
33 Watshaya izihlahla zabo zamagilebisi lezomkhiwa,Wephula izihlahla ezaziselizweni labo.
34 Wathi intethe zihlasele,Intethe ezincane ezingeke zibalwe.+
35 Zatshaya zabhuqa zonke izimila elizweni,Zadla konke okwakumila emhlabathini.
36 Wasebulala wonke amazibulo elizweni,+Isiqalo samandla abo okuzala.
37 Wakhipha abantu bakhe bethwele isiliva legolide,+Kakho phakathi kwezizwana zakhe owakhubekayo.
38 Abantu beGibhithe bathaba lapho ama-Israyeli esukaNgoba basebewesaba kakhulu.+
39 Wathuma iyezi ukuze avikele abantu bakhe,+Lomlilo ukuze ubakhanyisele ebusuku.+
40 Bacela inyama, wabanika izagwaca.+
Waqhubeka ebanika isinkwa esivela ezulwini.+
41 Waqhekeza idwala amanzi athululeka,+Ageleza enkangala angathi ngumfula,+
42 Ngoba wasikhumbula isithembiso esingcwele ayesenze encekwini yakhe u-Abrahama.+
43 Yikho wakhipha abantu bakhe bejabula,+Wakhipha abakhethiweyo bakhe bememeza ngentokozo.
44 Wabapha amazwe ezinye izizwe,+Bathatha lokho ezinye izizwe ezazikusebenzele nzima,+
45 Ukuze bagcine imilayo yakhe,+Njalo balalele imithetho yakhe.
Dumisani uJah!*
