17 UJAYELI
“Ubusisiwe Kulabo Bonke Abesifazana”
KWATHI sekunzima uSisera wathi nyawo mbeletha watshiya amasotsha akhe ebulawa. Kufanele ukuthi kwamethusa ukubona ibutho lakhe elesabekayo elalilezinqola ezingu-900 lezikhali, linqotshwa ngama-Israyeli ayedeleleka elezikhali ezingatsho lutho njalo engelazinqola. USisera wabona kungcono ukuthi abaleke ayecatsha etendeni likaHebheri umKheni.
AmaKheni ayesekela ama-Israyeli futhi ayevele elobudlelwano lama-Israyeli kusukela ngesikhathi sikaMosi ngoba umkakhe wayengumKheni. Abantu laba babehlala ko-Israyeli. Kodwa uHebheri wayengafanani lamanye amaKheni, kulokuthi asekele inkosi yama-Israyeli yena wayesekela inkosi yamaKhenani uJabhini. Lokho yikho okwenza uSisera wabaleka wayacatsha khona. USisera wayengakwazi ukuthi uJayeli umkaHebheri wayesekela ama-Israyeli engafanani lomkakhe.
Wathola kuloJayeli etendeni, umkakhe engekho. UJayeli wathi embona nje, wahle wacabanga lokho ayezakwenza ngoba wayemazi kuhle uSisera lokuthi uyingozi enganani. Kungenzeka wayengakwazi lokho uJehova akutshele uDibhora ukuthi uSisera wayengasoze abulawe yindoda, kodwa wayezabulawa ngowesifazana. Lanxa kunjalo, kumele ukuthi wayekwazi ukuthi uJehova kukhona ayekhangelele ukuthi akwenze. Yindaba sisitshonjalo?
Ngemva kwempi uDibhora wahlabela ingoma eyayikhuluma ngokunqoba kukaBharakhi uSisera. Ethi: “UJayeli umkaHebheri umKheni, ubusisiwe kulabo bonke abesifazana, ubusisiwe kulabo bonke abesifazana abahlala ematendeni.” Abanye abantu bachothoza uJayeli besithi wayelolunya futhi eliqili. Kodwa lokho akuqondanga ngoba wayengowesifazana olesibindi owayesekela izimpi zikaJehova. Wenza njengoRahabi, wasekela uJehova kulokuthi asekele izitha zakhe. UJayeli wayekwazi ukuthi uSisera wayeyisitha sikaJehova lokuthi kwakumele afe. Njengoba wayesezandleni zakhe wayezakwenzani?
UJayeli wayekwazi ukuthi wayengeke amlande alwe laye mathupha uSisera ngoba wayelamandla futhi eyazi kuhle impi. Yikho uJayeli wamngenisa etendeni ukuze aphumule, wasembhathisa. USisera wasecela amanzi okunatha kodwa uJayeli wamnika uchago. Watshela uJayeli ukuthi ame emnyango alinde ukuze loba ngubani owayezafika amtshele ukuthi kwakungelamuntu etendeni. Yena wasebubhuqa ubuthongo.
UNkulunkulu wakhetha owesifazana ukuthi abulale iqhawe elalilolunya
UJayeli wakubona ukuthi kwasekumele amsusele amanqe. Wathatha isikhonkwane lesando, amathuluzi okumele ukuthi wayejayele ukuwasebenzisa futhi kungenzakala ukuthi ayeyenziwe ngezigodo. Wanyenya wayalapho okwakulele khona uSisera. Wayesezimisele ukuqeda ngaye. Kwakumele enze ngonanzelelo ngoba nxa wayengaphambanisa nje kancane, uSisera wayezaphaphama amenze isihluku. UJayeli kazange aphambanise. Ngesikhatshana nje wayeseqedile ngaye, uSisera wayesethe daca phansi isikhonkwane singene enhlafunweni sayathutshela enhlabathini.
Ngemva kwesikhathi, kwathutsha uBharakhi esemzileni kaSisera. UJayeli waphuma wamhlangabeza, wasesithi: “Buya ngizokutshengisa umuntu omdingayo.” UBharakhi wathi engena etendeni wananzelelela ukuthi amazwi esiphrofetho sikaDibhora ayesegcwalisekile, athi: “UJehova uzanikela uSisera esandleni sowesifazana.”
Engomeni eyahlatshelwa nguBharakhi loDibhora bedumisa uJehova, bancoma loJayeli. Lapha yikho esicina khona ukuzwa ngoJayeli eBhayibhilini. Indaba le yenzakala eminyakeni edlula engu-3 200 eyadlulayo, kodwa lalamuhla lokhu sifunda ngayo. Lamuhla izinceku zikaJehova azilwi ngezikhali, kodwa zilwa loSathane lamadimoni akhe kanye lomhlaba lo. Yikho kuqakathekile ukuthi lathi sibe lesibindi njengoJayeli.
Bala indaba le eBhayibhilini:
Ingxoxo:
UJayeli watshengisa njani ukuthi ulesibindi?
Julisa Ingqondo
-
1. Impi kaBharakhi loSisera ihambelana njani lalokho okuzakwenzakala empini ye-Amagedoni? (w19.09 8-9 ¶3-6)
-
2. UHebheri umkaJayeli wayesekela amaKhenani ayeyizitha zama-Israyeli, kodwa vele yena wayehlobana njani lama-Israyeli? (it “UHebheri” No. 2-wcgr)
-
3. Ukunqotshwa kukaJabhini loSisera kwaluqinisa njani ukholo lwabantu bakaJehova? (w08 10/15 14-15 ¶12-15-wcgr)
-
4. Indlela uDibhora ancoma ngayo uJayeli isifundisani? (w15 8/1 15 ¶3-wcgr) A
Umfanekiso A
Umfanekiso A
Cabangisisa Ngezifundo
-
Udade olomkakhe ongasuye Fakazi angatshengisa njani ukuthi ulesibindi njengoJayeli?
-
UJayeli wayengasuye mphrofethikazi njengoDibhora futhi wayengayisilo sotsha njengoBharakhi. Kodwa wenza konke okwakusemandleni akhe ukuthi asekele uJehova. Akwenzayo kusifundisani? B
Umfanekiso B
-
Kukuziphi izimo lapho engingalingisela khona isibonelo sikaJayeli?
Cabangisisa
-
Indaba le ingifundisani ngoJehova?
-
Indaba le ingenelana njani lenhloso kaJehova?
-
Ngizambuzani uJayeli nxa esevusiwe?
Funda Okunengi
Kuvidiyo elandelayo, nanzelela ukuthi isibonelo sikaJayeli simkhuthaza njani udade osakhulayo ukuthi atshumayele.
Lingisela Abantu Ababelesibindi Hatshi Amagwala—UJayeli, Hatshi Izakhamizi ZeMerozi (1:40)
UJayeli ngomunye wabesifazana abenza kuhle esingathola izifundo eziqakathekileyo kuye. Bala ngabanye babo.
“Esikufunda Kwabesifazana Okukhulunywa Ngabo EBhayibhilini” (ijwbq isihloko 161)
Nanku Okunye
OKUMAYELANA LATHI
Imihlangano Yebandla YaboFakazi BakaJehova
Thola ukuthi sikhonzela ngaphi futhi sikhonza njani.
