Xikita nochi

Pampa tikitas okse menú

ITlaixpantijkauan Jehová

náhuatl del centro

¿Melauak tlen kijtoa “Traducción del Nuevo Mundo”?

¿Melauak tlen kijtoa “Traducción del Nuevo Mundo”?

Tlen achto Traducción del Nuevo Mundo omochijchi itech 1950. Itech nonmej tonalmej opejkej kijtoaj Traducción del Nuevo del nuevo Mundo amo ken okseki Biblias, uan noijki kijtoaj kox melauak tlen kijtoa. * Ma tikitakan tlen tlamantli kipia Traducción del Nuevo Mundo tlen ika moixmati.

  • Omokixti itech amatlajkuilolmej tlen uelis tikneltokaskej tlen kijtoaj. Pampa mochiuas Traducción del Nuevo Mundo ika inglés omotekitiltijkej tlajkuilolmej tlen yiuejkika omoijkuilojkej tlen uelis tikneltokaskej tlen kijtoaj uan tlen axkan ok tikinpiaj. Uan ijkuak okitlajtolkuepkej Biblia King James Version (Versión del Rey Jacobo) itech 1611, okitekitiltijkej amatlajkuilolmej tlen amo okijtoaya nochi tlen melauak uan tlen amo okachi yiuejkika omoijkuilojkej, amo ijkon opanok ika Traducción del Nuevo Mundo.

  • Amo kipatla tlen achto omoijkuilo. Akinmej okitlajtolkuepkej Traducción del Nuevo Mundo omochijchikajkej pampa kitlajtolkuepaskej tlajtolmej tlen toTajtsin Dios okinmilui akinmej okijkuilojkej Biblia (2 Timoteo 3:16). Oksekimej akinmej kitlajtolkuepaj Biblia, yejuan okachi kipatioitaj tradiciones uan amo tlen kijtoa toTajtsin Dios. Se neskayotl, okipatlakej itoka akin oKichijchi nochi, Jehová, uan san kitlaliaj toTajtsin noso toTeko.

  • Kitlajtolkuepaj san ken ijkuilitok. Miakej Biblias motlajtolkuepaj san ika seki tlajtolmej, uan ualeua ayakmo moijtoa tlen okachi ipati noso kitlaliliaj okseki tlamantli. Pero itech Traducción del Nuevo Mundo motlajtolkuepa ken achto omoijkuilo pampa ma moajsikamati uan amo ma poliui tlen okachi ipati noso ken achto omoijkuilo.

Traducción del Nuevo Mundo amo ken okseki Biblias

Amochmej tlen amo okitlalilijkej. Iglesia Católica uan Iglesia Ortodoxa kitlaliliaj Biblia amochmej tlen amo melauak, amochmej tlen amo keman okatkaj itech canon judío, amochmej tlen kipia Escrituras Hebreas. Uan miak ipati ma tikmatikan, pampa Biblia kijtoa “achto, Dios okinmaktili itlajtol n judíojteh” (Romanos 3:1, 2). Traducción del Nuevo Mundo uan okseki Biblias kuali kichiuaj pampa amo kitlaliliaj amochmej tlen amo melauak.

Tlaxelolmej tlen amo okitlalilijkej. Seki Biblias kintlaliliaj tlaxelolmej tlen amo katej itech tlajkuilolmej tlen yiuejkika omoijkuilojkej, ninmej satepan okintlalilijkej. Itech ninmej tonalmej, miakej Biblias, uan Traducción del Nuevo Mundo amo kipiaj nonmej tlaxelolmej, noso tla kipiaj, kijtoaj nonmej tlaxelolmej amo okiski itech tlajkuilolmej tlen achto omoijkuilo. *

Ken okitlajtolkuepkej. Ualeua, ijkuak kitlajtolkueptiuij sejse tlajtol amo moajsikamati tlen achto omoijkuilo. Se neskayotl, tlen okijto Jesús itech Mateo 5:3 motlajtolkuepa ika ninmej tlajtolmej: “Ma kipiakan pakilistli akinmej amo chikauak inmiespíritu” (Biblia de Jerusalén, Nácar-Colunga, Reina-Valera uan Torres Amat). Tlajtolmej “akinmej amo chikauak inmiespíritu” —okitlajtolkuepkej sejse tlajtoli— non kichiua amo kuali ma moajsikamati. Sekimej kajsikamatij Jesús okijtoaya amo itlaj ma tikpiakan. Pero ye okinekiaya kijtos pampa uelis tiyolpakiskej moneki ma tikmatikan moneki ma techyekana toTajtsin Dios. Traducción del Nuevo Mundo okachi kuali kiyekijtoa tlen okijto Jesús pampa kitekitiltia ninmej tlajtolmej: “Akinmej kimatij moneki kitemoskej toTajtsin Dios”. *

Sekimej ixtlamatkej tlajtoa kuali itech Traducción de Nuevo Mundo

  • Itech se amatlajkuilol 8 de diciembre de 1950, se tlakatl tlen otlajtolkuepaya uan ixtlamatki itech Biblia tlen omotokayotiaya Edgar J. Goodspeed okijto seki tlamantli itech Traducción del Nuevo Mundo de las Escrituras Griegas Cristianas: “Nikpatioita tekitl tlen nankichiuaj itech namoaltepe, ijkon ken itech nochi Tlaltikpak, uan noijki nechpaktia ken nantlajtolkuepaj, amo oui moajsikamati uan nanmochijchikauaj totoka nankichiuaskej. Itech kajki miak tlamatilistli, nikneltoka melauak tlen kijtoa”.

    Edgar J. Goodspeed

  • Allen Wikgren, akin tlamachtia itech Universidad de Chicago, okijto Traducción del Nuevo Mundo se kuali amochtli tlen amo moneki mopaleuis itech okseki Biblias, uan kipia “miak tlamantli kuali tlen moneki moijtos” (The Interpreter’s Bible, volumen I, página 99).

  • Uan itech Traducción del Nuevo Mundo de las Escrituras Griegas Cristianas, Alexander Thomson, se tlakatl tlen tlajtoa itech Biblia okijkuilo: “Kuali mota akinmej okitlajtolkuepkej nin Biblia sapanoa ixtlamatkej uan kuali kichiuaj inteki, omochijchikajkej pampa kitlajtolkuepaskej ijkon ken ijkuilitok itech griego uan kuali moijtoa itech inglés (The Differentiator, abril de 1952, página 52).

  • Ijkuak Charles Francis Potter okijto seki tlaxelolmej amo kuali omotlajtolkuepkej, satepan okijto: “Kuali okitlajtolkuepkej Biblia, maski amo moijtoa akinmej, kuali okichijkej tekitl, kuali okintlajtolkuepkej tlajkuilolmej ken yiuejkika omoijkuilojkej” (The Faiths Men Live By, página 300).

  • Robert M. McCoy okijto maski omotaya Traducción del Nuevo Mundo okipiaya itlaj tlen okseki Biblias amo kipiaj, nin kipia tlamantli tlen kuali. Okijto: “Ken okitlajtolkuepkej Nuevo Testamento [tlen inmiaxka iTlaixpantijkauan Jehová] kiteititia katej tlakamej ixtlamatkej pampa uelis kiyektlaliskej ouijkayotl ijkuak motlajtolkuepa Biblia” (Andover Newton Quarterly, enero 1963, página 31).

  • Samuel MacLean Gilmour, akin otlamachtiaya, amo okipakti ken omotlajtolkuepkej seki tlaxelolmej itech Traducción del Nuevo Mundo, pero okijto akinmej okitlajtolkuepkej Biblia “kuali okajsikamatiayaj tlajtoli griego” (Andover Newton Quarterly, septiembre 1966, página 26).

  • Ijkuak otlajto itech Traducción del Nuevo Mundo tlen noijki omoijkuilo itech se Biblia interlineal itech Escrituras griegas Cristianas (Kingdom Interlinear Translation of the Greek Scriptures), Thomas N. Winter okijkuilo: “Ken okitlajtolkuepkej nin Biblia amo motlajtolnamiki uan melauak tlen kijtoa” (The Classical Journal, abril-mayo 1974, página 376).

  • Itech xiuitl 1989, Benjamin Kedar, akin otlamachtiaya uan omomachtiaya tlajtoli hebreo itech Israel okijto: “Ijkuak nitlatemoa itech Biblia hebrea uan itech okseki Biblias, nochipa nikita Biblia ika inglés tlen itoka Traducción del Nuevo Mundo. Ijkuak niktlajtoltia, kuali nikita nin Biblia kiteititia akinmej okitlajtolkuepkej omochijchikajkej pampa kajsikamatiskej, uan kitlajtolkuepaskej ijkon ken achto omoijkuilo”.

  • Jason David BeDuhn, akin tlamachtia itech Estudios Religiosos, omomachti chiknaui Biblias tlen okachi moixmati ika inglés uan okijto: “Traducción del Nuevo Mundo melauak kijtoa ken achto omoijkuilo, amo ken okseki”. Uan maski miakej tlaltikpaktlakamej uan biblistas kijtoaj nin Biblia omotlajtolkuepki pampa ma kipaleui tlen kineltokaj akinmej okitlajtolkuepkej, BeDuhn okiyekijto: “Mopatla pampa okachi kuali kiyekijtoa tlen achto omoijkuilo, nin amo kipojpoloa tlen achto okijkuilojkej itech Nuevo Testamento” (Truth in Translation, páginas 163 uan 165).

  • Xabier Pikaza, akin biblista uan tlamachtia Teología, okijkuilo seki tlamantli itech Traducción del Nuevo Mundo ika español: “Miakej akinmej ixtlamatkej, católicos uan protestantes, kijtoaj nin Biblia amo kuali okitlajtolkuepkej. Pero nin kiyekijtoa iTlajtol toTajtsin Dios uan techuika itech yankuik tlali, kijtosneki Tekiuajkayotl mesiánico” (Nuevo Comentario Bíblico San Jerónimo, página 778).

^ párr. 2 Itech xiuitl 2013 okiyektlalijkej Traducción del Nuevo Mundo ika tlajtoli inglés. Seki tlamantli tlen nikan tikijtoaj amo tlajtoa itech nin Biblia. Traducción del Nuevo Mundo ika inglés omotlajtolkuepki itech español, uan pampa kijtos tlen melauak okitakej tlajkuilolmej tlen ika achto omoijkuilo Biblia.

^ párr. 8 Se neskayotl, xikita tlen kijtoa Biblia protestante Nueva Versión Internacional uan Biblia de Jerusalén tlen iaxka tlaneltokalistli católica. Ninmej tlaxelolmej tlen okintlalilijkej: Mateo 17:21; 18:11; 23:14; Marcos 7:16; 9:44, 46; 11:26; 15:28; Lucas 17:36; 23:17; Juan 5:4; Hechos 8:37; 15:34; 24:7; 28:29, uan Romanos 16:24. Biblias Reina-Valera uan Torres Amat okintlalilikej se tlaxelol itech 1 Juan 5:7, 8 tlen kipaleuia Trinidad, pero okitlalilijkej miak siglos satepan ijkuak yomoijkuilo Biblia.

^ párr. 9 Okseki Biblias ken Dios habla hoy (Versión Popular) de 1979 uan La Palabra de Dios para Todos, amo kijtoaj “akinmej amo chikauak inmiespíritu” itech Mateo 5:3, okachi kuali, kitoaj “akinmej kimatij moneki kitemoskej toTajtsin Dios”.