Xikita nochi

¿Sionistas iTlaixpantijkauan Jehová?

¿Sionistas iTlaixpantijkauan Jehová?

Amo. ITlaixpantijkauan Jehová tikchiuaj ken Cristo uan nochi tlen tikneltokaj kisa itech Biblia. Seki tlaneltokalismej kineltokaj sekimej profecías tlen katej itech Santos Escritos, kijtoaj moneki judíos yetoskej san sekan itech Palestina, pero iTlaixpantijkauan Jehová amo ijkon kijtoaj. Amo kineltokaj Biblia tlajtoa itech nin tlamantli político. Biblia amo kipaleuia nion se tekiua tlen kajki nikan Tlaltikpak, nion se altepetl noso tlanechikol. Akin Tetlapouijtok, amatlajkuilol tlen inmiaxka iTlaixpantijkauan Jehová yokijto Biblia “amo tlajtoa itech sionismo político”.

Encyclopædia Britannica kijtoa sionismo non se “nechikol judío nacionalista tlen kineki ma mochiua uan ma yeto se estado nacional judío itech Palestina”. Kisa itech tlaneltokalistli uan política. ITlaixpantijkauan Jehová amo kipaleuiaj tlaneltokalistli itech sionismo uan amo mokajkalakiaj itech sionismo político.

ITlaixpantijkauan Jehová san tlaneltokaj itech toTajtsin Dios uan amo kipaleuiaj política nion sionismo. Techixmatij pampa amo timokajkalakiaj itech política, ik non, itech sekimej altepemej techtlajyouiltiaj. Melauak tikmatokej tekiuajkej noso nechikolmej, amo uelis kitlaliskej yolseuilistli itech Tlaltikpak tlen uejkauas. San iTekiuajkayo toTajtsin Dios uelis kichiuas.

Onka se tlamantli tlen kichiuaj nochtin iTlaixpantijkauan Jehová, maski san kan yetoskej, kintlakamatij itlanauatiluan tekiuajkej. Nion se iTlaixpantijka Jehová amo kinmixnamiki tekiuajkej uan noijki amo mokajkalakia ijkuak moteuiaj.