Xikita nochi

¿Tlen kineltokaj iTlaixpantijkauan Jehová?

¿Tlen kineltokaj iTlaixpantijkauan Jehová?

TiiTlaixpantijkauan Jehová timochijchikauaj tikchiuaskej ken Jesús otlamachti ijkon ken okichijkej itlatitlaniluan. Itech nin tlamachtil tikitaskej seki tlamantli tlen tikneltokaj.

  1. ToTajtsin Dios. Tikueyichiuaj akin melauak toTajtsin Dios, akin sapanoa Ueyititok uan akin oKichijchi nochi tlen onka, ye itoka Jehová (Salmo 83:18; Apocalipsis 4:​11). IDios Abrahán, Moisés uan Jesús (Éxodo 3:6; 32:11; Juan 20:17).

  2. Biblia. Tikneltokaj toTajtsin Dios techtlapouia ika Biblia (Juan 17:17; 2 Timoteo 3:​16). Tlen tikneltokaj kisa itech 66 amochmej, ninmej amochmej moixmatij ken Antiguo uan Nuevo Testamento. Se ixtlamatki tlen itoka Jason D. BeDuhn, okijto tlen iTlaixpantijkauan Jehová “kineltokaj uan tlen kichiuaj kisa itech Biblia, kitekitiltiaj uan amo kipatlaj tlen ijkuilitok itech Biblia”. *

    Maski tikseliaj nochi tlen kijtoa Biblia, amo nochtin tlapoualismej tlen itech tikajsij itlaj kineskayotiaj, ik non, amo tiktemoaj tlen kijtosneki sejse tlajtoli tlen ijkuilitok itech Biblia (Apocalipsis 1:1).

  3. Jesús. Tikchiuaj ken Jesucristo uan tikchiuaj ijkon ken otlamachti uan tiktlakaitaj pampa ye “Totemakixti” uan iKone toTajtsin Dios (Mateo 20:28; Hechos 5:​31). Non kiteititia tejuan tikchiuaj ken Cristo (Hechos 11:26). Pero Biblia amo kiteititia Jesús ye toTajtsin Dios akin kipia nochi chikaualistli uan amo kijtoa katej se Trinidad (Juan 14:28).

  4. ITekiuajkayo toTajtsin Dios. Nin se Tekiuajkayotl tlen kajki iluikak uan amo itlaj tlen kajki itech inyolo akinmej kichiuaj ken Cristo. Kinpojpolos nochtin tekiuajkej uan kichiuas itlanekilis toTajtsin Dios itech Tlaltikpak (Daniel 2:​44; Mateo 6:​9, 10). Ayakmo miak poliui uan mochiuas nochi nin, pampa nochi tlen Biblia kijtoa panoskia yimochijtok, non kiteititia tikatej itlamian tonalmej (2 Timoteo 3:​1-5; Mateo 24:​3-​14, TNM).

    Jesús kajki ken ueyi tekiua itech iTekiuajkayo toTajtsin Dios. Opejki tlanauatia itech xiuitl 1914 (Apocalipsis 11:15).

  5. Temakixtilistli. Jesús omikik topatka, ik non tlaltikpaktlakamej uelis ayakmo mikiskej uan ayakmo kipiaskej tlajtlakoli (Mateo 20:28; Hechos 4:​12). Tla kinekij mopaleuiskej ika imikilis, tlaltikpaktlakamej moneki tlaneltokaskej itech Jesús, kipatlaskej innemilis uan moapolaktiskej (Mateo 28:19, 20; Juan 3:​16; Hechos 3:​19, 20). Ika tlen kichiua sejse tlaltikpaktlakatl mota kox melauak tlaneltoka (Santiago 2:​24, 26). Maski amo technamiki ma techmakixti toTajtsin Dios; ye techmakas tlamantli kuali tlen amo technamiki tikpiaskej (Gálatas 2:​16, 21, TNM).

  6. Iluikak. Jehová, Jesucristo uan ángeles tlen yolmelajkej chantij itech iluikak, kanin chantij espíritus (Salmo 103:19-​21; Hechos 7:​55). * Sekimej tlaltikpaktlakamej tlen poui itech 144,000, kinyolitiskej pampa ma yetokan iluikak uan tlanauatiskej iuan Jesús itech Tekiuajkayotl (Daniel 7:​27; 2 Timoteo 2:​12; Apocalipsis 5:​9, 10; 14:​1, 3).

  7. Tlaltikpak. ToTajtsin Dios okichijchi Tlaltikpak pampa tlaltikpaktlakamej nochipa itech ma chantikan (Salmo 104:5; 115:16; Eclesiastés 1:4). ToTajtsin Dios kichiuas ayakmo ma mokokokan uan ma yetokan nochipa itech se Xochitlali, pero san akinmej kitlakamatij (Salmo 37:11, 34).

  8. Tlen amo kuali uan tlajyouilistli. Biblia kiyekijtoa se ángel okixnamik toTajtsin Dios. Ijkon opejki nochi tlen amo kuali uan tlajyouilistli (Juan 8:​44). Nin ángel, tlen satepan omoixmatki ken Diablo uan Satanás, okinkajkaya achto tlaltikpaktlakamej pampa okinekiaya ma kipaleuikan. Tlen okichijkej sapanoa amo kuali uan kintlajyouiltia nochtin tlaltikpaktlakamej (Génesis 3:​1-6; Romanos 5:​12). Pampa uelis monankilis tlen okijto Satanás, toTajtsin Dios okitekauili ma yeto tlen amo kuali uan tlajyouilistli, pero amo kikauas ma yeto nochipa.

  9. Mikilistli. Ijkuak ikaj miki ayakmo itlaj mokaua tlen ok yoltok (Salmo 146:4; Eclesiastés 9:​5, 10). Akinmej yomikej amo tlajyouiaj ijtik tlitl.

    ToTajtsin Dios kinyolitis sapanoa miakej tlaltikpaktlakamej (Hechos 24:15). Pero akinmej amo kinekiskej kitlakamatiskej toTajtsin Dios, sepa kinmixpoloskej uan ayakmo keman kinyolitiskej (Apocalipsis 20:14, 15).

  10. Kalchanejke. ToTajtsin Dios okitlali. Namiktilistli kijtosneki ijkuak se tlakatl iuan se siuatl monamiktiaj, uan uelis mokajkauaskej ixpan tekiuajkej tla ikaj auilnemi (Mateo 19:​4-9). Kuali tikmatokej itlanauatiluan Biblia kipiaj miak ixtlamatilistli uan kinpaleuia kalchanejkej ma yolpakikan (Efesios 5:⁠22-6:1).

  11. Ken tikueyichiuaj toTajtsin Dios. Amo tikueyichiuaj cruz nion se teotsin (Deuteronomio 4:​15-​19; 1 Juan 5:​21). Tikchiuaj nin tlamantli:

  12. Ialtepe toTajtsin Dios. Tikinpiaj tlanechikolmej. Itech sejse tlanechikol katej sekimej tlakamej tlen kintokayotiaj tlayekankej, non amo kijtosneki okachi inpati ken oksekimej nion amo kintlaxtlauiaj (Mateo 10:8; 23:8). Amo tiktemakaj diezmo nion tiktlajtlanij tomin (2 Corintios 9:7). Tekitl tlen tikchiuaj mopaleuia ika tomin tlen kitemakaj tlaltikpaktlakamej ika nochi inyolo uan amo ikaj kimati akin kitemaka.

    Sekimej tlakamej tlen kipiaj miak ixtlamatilistli, kinmixmatij ken Cuerpo Gobernante, yejuan kiyekanaj tekitl tlen kichiuaj iTlaixpantijkauan Jehová itech nochi Tlaltikpak (Mateo 24:45).

  13. San sekan titekitij. Maski tlatlamantli altepetl kanin tichantij, tinochtin san se tlamantli tikneltokaj (1 Corintios 1:​10). Timochijchikauaj pampa amo tikinchikoitaskej oksekimej (Hechos 10:34, 35; Santiago 2:4). Sejse iTlaixpantijka Jehová kipejpena tlen kichiuas ijkon ken kijtoa Biblia (Romanos 14:​1-4; Hebreos 5:​14).

  14. Tonemilis. Timochijchikauaj timotlasojtlaskej (Juan 13:34, 35). Timochijchikauaj amo tikchiuaskej itlaj tlen amo kipaktia toTajtsin Dios. Ik non, amo tikmotlaliliaj nion tikkuaj estli (Hechos 15:28, 29; Gálatas 5:​19-​21). Amo timokualaniaj iuan ikaj nion timokajkalakiaj itech guerras (Mateo 5:9; Isaías 2:4). Tikintlakaitaj tekiuajkej uan tikintlakamatij tla amo kinmixnamikij itlanauatiluan toTajtsin Dios (Mateo 22:21; Hechos 5:​29).

  15. Timouikaj inmiuan oksekimej. Jesús okijto: “Xiktlasojtla mokni kemi te timotlasojtla”. Noijki okijto akinmej okichiuayaj ken Cristo “yejwah noiwa ayakmó de nin tlaltíkpaktli” (Mateo 22:39; Juan 17:16). Ik non, timochijchikauaj tikinchiuiliskej nochtin tlen kuali, pero amo timokajkalakiaj itech política uan amo titekitij inmiuan oksekimej tlaneltokalismej (Gálatas 6:​10; 2 Corintios 6:​14). Pero tiktlakaitaj tlen kipejpenaj kichiuaskej oksekimej itech non tlamantli (Romanos 14:12).

Tla tikneki tikmatis okachi itech tlen tikneltokaj, uelis tikajsis okseki tlamantli itech página tlen tikpiaj itech Internet. Noijki uelis titlanotsas kanin titekitij, uelis tias kanin timonechikoaj ik kanin tichanti noso uelis timotlapouis iuan se iTlaixpantijka Jehová.

^ párr. 4 Xikita amochtli Truth in Translation (Tlen melauak itech ken motlajtolkuepa), página 165.

^ párr. 10 Maski ángeles tlen okixnamikej toTajtsin Dios okinkixtijkej itech iluikak, yejuan chantij kanin katej espíritus (Apocalipsis 12:​7-9).