Xikita nochi

Pampa tikitas okse menú

ITlaixpantijkauan Jehová

náhuatl del centro

ITlaixpantijkauan Jehová, ¿kinchiualtiaj tlaltikpaktlakamej ma kipatlakan intlaneltokalis?

ITlaixpantijkauan Jehová, ¿kinchiualtiaj tlaltikpaktlakamej ma kipatlakan intlaneltokalis?

Amo, amo ikaj kichiualtiaj ma kipatla itlaneltokalis. Revista Akin Tetlapouijtok, tlen okachi tiktekitiltiaj okijto: “Amo kuali ikaj tikchiualtiskej ma kipatla itlaneltokalis”. * Amo tikinchiualtiaj ma kipatlakan intlaneltokalis pampa:

  • Jesús amo keman okinchiualti tlaltikpaktlakamej ma kiselikan tlen otlamachtiaya. Ye okimatiaya amo nochtin kikakiskiaj tlen otlamachtiaya (Mateo 7:13, 14). Ijkuak sekimej imachtijkauan amo okiselijkej tlen okinmachtijtoka, oyajkej uan Jesús amo okinchiualti ma mokauakan (Juan 6:60-62, 66-68).

  • Jesús okinmititi imachtijkauan amo ma kinchiualtikan tlaltikpaktlakamej ma kipatlakan tlen kineltokaj. Okachi kuali, omonekiaya ma kintemokan akinmej okinekiayaj kikakiskej iTlajtol toTajtsin Dios (Mateo 10:7, 11-14).

  • Tikinchiualtiskej ma kipatlakan intlaneltokalis tlaltikpaktlakamej amo itlaj ipati, toTajtsin Dios kineki ma kiueyichiuakan ika nochi inyolo uan amo pampa ikaj kinchiualtia (Deuteronomio 6:4, 5; Mateo 22:37, 38).

¿Kinchiualtiaj tlaltikpaktlakamej ma mochiuakan imachtijkauan Jesús maski amo kinekij?

Tejuan titetlapouiaj iTlajtol toTajtsin Dios “itech nochi n tlaltíkpaktli” uan tikchiuaj “teixpa [...] iwa itech nomocha”, ijkon ken kijtoa Biblia (Hechos 1:8; 10:42; 20:20). Ijkon ken akinmej opejkej kichiuaj ken Cristo itech achto siglo, ualeua techiluiaj tikinchiualtiaj tlaltikpaktlakamej ma kipatlakan intlaneltokalis (Hechos 18:12, 13). Pero non amo melauak. Amo tikinchiualtiaj ma kipatlakan tlen kineltokaj, tikinkauaj ma kipejpenakan tlen kinekij kineltokaskej. Tejuan san tiknekij ma kajsikamatikan tlen kijtoa Biblia pampa uelis kipejpenaskej tlen tlaneltokalistli kipiaskej.

Amo tikinchiualtiaj ma kineltokakan tlen tejuan tikneltokaj. Amo tiktekitiltiaj totlaneltokalis pampa ika titeyoleuaskej ma mokajkalakikan itech política nion tikinmakaj tomin pampa ma mochiuakan iTlaixpantijkauan Jehová. Tejuan amo tikchiuaj ken akinmej kijtoaj kichiuaj ken Cristo, amo tlamachtiaj ken ye otlamachti. *

¿Uelis ikaj kipatlas itlaneltokalis?

Teotlajtojki Abrahán okipatlak itlaneltokalis uan ayakmo okichi tlen itatajuan okimachtijkej

Biblia kijtoa kema uelis ikaj kipatlas itlaneltokalis. Kipia neskayomej intech tlaltikpaktlakamej tlen okipatlakej intlaneltokalis pampa kitekichiuiliskej toTajtsin Dios akin melauak uan amo yetoskej itech tlaneltokalistli tlen intatajuan okinmachtijkej. Ijkon okichijkej Abrahán, Rut, sekimej tlen ochantiayaj itech ueyi altepetl Atenas uan noijki tlatitlanil Pablo (Josué 24:2; Rut 1:14-16; Hechos 17:22, 30-34; Gálatas 1:14, 23). Biblia noijki kijtoa tejuan uelis tikpejpenaskej kox tikkauaskej tlaneltokalistli tlen kiselia Jehová (1 Juan 2:19).

La Declaración Universal de Derechos Humanos, tlen kijtoa Organización de las Naciones Unidas (ONU), “ompa uits noso kisaj tlanauatilmej tlen ika moyekanaj nochtin tlaltikpaktlakamej pampa kipejpenaskej tlen kinekij”, kijtoa tinochtin uelis “tikpejpenaskej kox tikpatlaskej totlaneltokalis”. Noijki kijtoa tlaltikpaktlakamej uelis tlatemoskej, kiseliskej uan kijtoskej tlen mokuayejyekoaj. Nin kijtosneki uelis kijtoskej tlen kineltokaj. Nin tlanauatil kinpaleuia tlaltikpaktlakamej pampa ma kijtokan tlen kineltokaj noso amo ma kiselikan tlen tejuan tikneltokaj. *

Tla ikaj kipatla itlaneltokalis, ¿kinpinatia ikalchanejkauan?

Amo. Biblia techiluia ma tikintlakaitakan tlaltikpaktlakamej maski san tlen tlaneltokalistli kipiaj (1 Pedro 2:17). ITlaixpantijkauan Jehová tiktlakamatij tlanauatil kanin kijtoa ma tikintlakaitakan totatajuan maski kipiaj okse tlaneltokalistli (Efesios 6:2, 3).

Pero amo nochtin kinpaktia tlen kijtoa Biblia. Se neskayotl, se siuatl tlen chanti itech ueyi altepetl Zambia kijtoa: “Tlaltikpaktlakamej tlen chantij itech noaltepe kijtoaj tla tikpatlaskej totlaneltokalis yetoskia ken tikinkauaj tokalchanejkauan uan toaltepe”. Ijkuak okatka ichpochtli opejki momachtia Biblia iuan iTlaixpantijkauan Jehová uan okipejpenki kipatlas itlaneltokalis. Ye kijtoa: “Notatajuan onechiluijkej sapanoa nouan okualantokaj uan onikinyolkokoaya. Nikilnamiki sapanoa oui okatka pampa ne oniknekiaya ma nechselikan. [...] Niyetos niyolmelajki inauak Jehová uan amo nikchiuas costumbres tlen kichiuaj tlaneltokalismej, amo kijtosneki nikinkaua nokalchanejkauan.” *

^ párr. 2 Xikita revista La Atalaya (ika náhuatl del centro Akin Tetlapouijtok) 1 de enero de 2002, página 12, párrafo 15.

^ párr. 8 Se neskayotl, kanaj itech xiuitl 785, tekiuaj Carlomagno okitlali se tlanauatil pampa akinmej ochantiayaj itech altepetl Sajonia tla amo okinekiayaj moapolaktiskej pampa yetoskej católicos, omonekiaya ma kinmiktikan. Okse neskayotl, itech Paz de Augsburgo, okichichijkej se amatl akinmej omoteuijkej itech Sacro Imperio Romano itech xiuitl 1555. Itech nin amatl omoijkuilo san tekiua ueliskia kipejpenas kox yetos católico noso luterano. Uan akinmej okinnauatiaya omonekiaya kipiaskej tlaneltokalistli tlen tekiua okipejpenaya. Tla amo okinekiayaj kipiaskej non tlaneltokalistli, omonekiaya kisaskej itech altepetl.

^ párr. 11 Derechos ken nin moajsi itech Carta Africana de Derechos Humanos y de los Pueblos, la Declaración Americana de los Derechos y Deberes del Hombre, la Carta Árabe de Derechos Humanos de 2004, la Declaración de Derechos Humanos de la Asociación de Naciones del Sudeste Asiático, el Convenio Europeo de Derechos Humanos y el Pacto Internacional de Derechos Civiles y Políticos. Pero amo nochi uejueyij altepemej kichiuaj tlen nikan kijtoa.

^ párr. 14 Biblia kijtoa akin melauak toTajtsin Dios itoka Jehová.