Kema. ITlaixpantijkauan Jehová tikneltokaj nochi Biblia “Dios otlanawati makijkuilokah” uan techpaleuia (2 Timoteo 3:16). Kema, Antiguo Testamento uan Nuevo Testamento techpaleuia. Uan amo tiknekij ikaj ma mokuayejyeko Antiguo Testamento ayakmo techpaleuia, ik non, tiktokayotiaj Escrituras Hebreas. Uan Nuevo Testamento tiktokayotiaj Escrituras Griegas Cristianas.

¿Tleka akinmej kichiuaj ken Cristo moneki kitekitiltiskej Antiguo Testamento uan Nuevo Testamento?

ToTajtsin Dios okinauati Pablo ma kijkuilo: “Nochi tlan yowejka omoijkuilo itech tiotlajkuíloli, omoijkuilo para matimoixtlamachtikah” (Romanos 15:4). Ik non, kuali tikmatij miak ipati tlen ijkuilitok itech Escrituras Hebreas. Uan techiluia tlen techpaleuia uan tlen yiuejkika opanok tlen noijki techyolchikaua.

  • Tlen yiuejkika opanok. Escrituras Hebreas kuali techiluia ken toTajtsin Dios kualtsin okiyektlali Tlaltikpak uan ken tlaltikpaktlakamej opejkej tlajtlakolchiuaj. Nin techpaleuia tikmatiskej kanin tiuitsej uan tleka timikij (Génesis 2:7, 17). Noijki Antiguo Testamento techiluia ken toTajtsin Dios okinpaleui sekimej tlen opanokej ouijkayotl ken tejuan (Santiago 5:17).

  • Tlanojnotsalmej tlen techpaleuiaj. Escrituras Hebreas kinpiaj amochmej Proverbios uan Eclesiastés, tlen kipiaj miakej tlanojnotsalmej tlen axkan noijki techpaleuia miak. Se neskayotl, techiluia ken uelis yolpakis tokalchanejka (Proverbios 15:17). Ken moneki tikitaskej tekitl (Proverbios 10:4; Eclesiastés 4:6), uan noijki ken telpokamej uelis yolpakiskej (Eclesiastés 11:9–12:1).

Noijki techpaleuia miak timomachtiskej Tlanauatil tlen okijkuilo Moisés tlen kajki itech Torá noso Pentateuco (achto makuili amochmej tlen kipia Biblia). Uan maski akinmej tikchiuaj ken Cristo amo moneki tiktlakamatiskej tlen kijtoa non Tlanauatil, principios tlen kipia techpaleuia ma tiyolpakikan (Levítico 19:18; Deuteronomio 6:5-7).