Xikita nochi

¿Ken kitaj iTlaixpantijkauan Jehová tla ikaj kineki okachi momachtis?

¿Ken kitaj iTlaixpantijkauan Jehová tla ikaj kineki okachi momachtis?

Tejuan timoyekanaj ika principios bíblicos ijkuak tikijtoaj tlen timokuayejyekoaj ijkuak ikaj kineki okachi momachtis. Sejse iTlaixpantijka Jehová kimachtia itlalnamikilis ika tlen kijtoa Biblia uan ijkon kipejpenaj tlen kichiuaskej. Ik non, axkan tikitaskej seki principios bíblicos tlen ika timoyekanaj. *

 ¿Moneki momachtiskej telpokamej uan ichpokamej?

Ijkuak timomachtiaj, techpaleuia ma tikpiakan ixtlamatilistli uan techpaleuia kuali ma timokuayejyekokan uan Biblia amo kijtoa tlajtlakoli non tlamantli (Proverbios 2:​10, 11; 3:​21, 22). Noijki Jesús okinmilui imachtijkauan ma kinmachtikan oksekimej tlen yejuan omomachtijkej (Mateo 28:19, 20, TNM). Ik non, tikinmiluiaj akinmej pouij itech toreligión ma momachtikan ken uelis kitlajtoltiskej se amatl, ma momachtikan ken tlajkuiloskej uan ma kimatikan ken motlapouiskej iuan oksekimej. * Noijki ma kimatikan tlen kichiuaj okseki religiones uan noijki tlen kichiuaj okseki altepemej (1 Corintios 9:​20-​22; 1 Timoteo 4:​13).

Tekiuajkej noijki kijtoaj moneki ma timomachtikan primaria uan secundaria. Tejuan tikintlakamatij ninmej tlanauatilmej porque Biblia kijtoa: “Nochteh n tlakah moneki makintlakitakah n tekiwajkeh” (Romanos 13:1). Noijki tikinmiluiaj telpokamej uan ichpokamej ma mochijchikauakan ma momachtikan. * Ijkon ken kijtoa Biblia: “Nochi tlan nonkichiwah, xikyekchiwakah, kemi nonkichiwilijtoskiah n Toteko Cristo Jesús iwa amo san para n tlakah” (Colosenses 3:​23).

Kinmakaskej tlen kinpoloa inkalchanejkauan tla momachtiskej. Biblia kijtoa: “Tla aka amo kimpalewia non ken kimita, iwa okachi tla amo kimpalewia non de icha, non tlakatl inewia kitenextia mach milák tlaneltoka iwa okachi amokuali kichijtok ke non amo kineltokah n Toteko Dios” (1 Timoteo 5:8). Akinmej momachtiaj kinpaleuis ma kinmakakan inkalchanejkauan tlen ika mopanoltiskej. Ijkon ken kijtoa se amochtli itoka The World Book Encyclopedia “moneki timomachtiskej porque techpaleuis ma tikchiuakan san tlen technauatiskej. Tla ikaj omomachti uan kimati ken tekipanos, okachi totoka kajsis tekitl para kinmaluis ikalchanejkauan uan akin amo momachtia amo totoka kajsis tekitl (Proverbios 22:29).

Noijki tetajmej kinmaluiaj inkoneuan ijkuak kinmixtlamachtiaj tlen kichiuaskej ijkuak moskaltiskej uan noijki kinpaleuis tla kintitlaniskej escuela (2 Corintios 12:14). Tikinmiluiaj tetajmej ma kinkalakikan escuela inkoneuan maski ualeua moneki kitlaxtlauaskej. Ualeua amo kintitlanij escuela noso kijtoaj amo moneki momachtiskej. * Noijki tikinmiluiaj tetajmej ken kinpaleuiskej inkoneuan kuali ma mixtlamachtikan. *

 Kuali ma tikitakan kox moneki momachtiskej

Ma tikitakan seki tlamantli tlen techpaleuis ma tikitakan kox moneki okachi momachtiskej. Biblia kijtoa: “Akin amo ixtlamatki kineltoka nochi tlen kiluiaj pero akin ixtlamatki mokuayejyekoa itech sejse tlamantli tlen kichiua” (Proverbios 14:15). Timoyekanaj ika nin principio ijkuak tikitaj kox tokoneuan okachi momachtiskej ijkuak kitlamiskej secundaria. Tikitaj kox uelis tiktlaxtlauaskej kanin momachtiskej uan kox kinpaleuis. Ualeua itech universidades amo moneki miak xiuitl momachtiskej uan kuali kinmixtlamachtiaj.

Okachi miak ipati ma momachtikan Biblia. Miak ipati tiaskej escuela pero okachi ipati timomachtiskej Biblia porque techpaleuia ma tikixmatikan toTajtsin Dios uan nin techpaleuis ma timomakixtikan (Juan 17:3). Noijki Biblia techpaleuia ma tikchiuakan tlen kuali uan nochi ika melajkayotl (Proverbios 2:9). Tlatitlanil Pablo noijki sapanoa omomachti. Pero ye okijto: “Yonikixma Noteko Cristo Jesús Akin kipanawia nochi tlan onikmoliaya ipati” (Filipenses 3:8; Hechos 22:3). Noijki axkan miakej telpokamej uan ichpokamej tlen iTlaixpantijkauan Jehová omomachtijkej itech universidades pero yejuan okachi kipatioitaj tlen tlamachtia Biblia. *

Biblia techmachtia ma tikpiakan kuali toyelis.

 Xamo kichiuaskej tlen amo kuali uan ayakmo tlaneltokaskej

Proverbios 22:3 kijtoa: “Akin ixtlamatki kita ouijkayotl uan motlatia”. TiiTlaixpantijkauan Jehová tikneltokaj seki universidades kichiuaj seki tlamantli tlen uelis kichiuas ayakmo ma titlaneltokakan uan noijki uelis auilnemiskej. Ik non, iTlaixpantijkauan Jehová amo kinekij inkoneuan ma yakan universidades porque ompa kinmijtlakoskej. Ma tikitakan seki tlamantli tlen ualeua kinmiluiaj:

  • Kinmiluiaj tomin kinpaleuis ma yolpakikan uan kuali yetoskej

    Seki universidades san kinmiluiaj telpokamej uan ichpokamej ma momachtikan uan kajsiskej se kuali tekitl uan kuali kintlaxtlauiskej. Ik non, miakej okachi momachtiaj universidad. Miakej kineltokaj sapanoa kinpaleuis tla kipiaskej tomin uan ijkon yolpakiskej. Pero Biblia kijtoa non amitlaj ipati (Eclesiastés 5:​10). Biblia noijki kijtoa: “Keman se kitlalia iyolo itech tomi, pewa kichiwa nochi tlan amokuali” uan noijki ayakmo se tlaneltokas itech toTajtsin Dios (1 Timoteo 6:​10). Tejuan timomaluiaj amo ma techkajkayauakan ijkuak sekimej kijtoaj tiyolpakiskej tla tikpiaskej miak tomin (Mateo 13:22).

  • Kinmiluiaj okachi kinmixmatiskej tla momachtiskej

    Ma tikitakan tlen okipanok Nika Gilauri. Ye okatka achto ministro ompa Georgia. Okijto tlen mokuayejyekoaj itech ialtepe: “Ompa Georgia kinekij nochtin ma momachtikan universidad porque kijtoaj ijkon miakej kinmixmatiskej”. Noijki okijto: “Yiuejkika tla telpokamej uan ichpokamej amo oayayaj universidad, san okinpinauiayaj inkalchanejkauan”. * Pero Biblia kijtoa amo ma tiktemokan tlen onka itech nin tlaltikpak. Jesús okinmilui teopixkej ijkuak nikan okatka: “¿Kenijki weletis nontlaneltokaskeh, tla san nonkitemojtinemih manomechweyilikah [...]?” (Juan 5:​44). Itech universidades sapanoa moueyinekij uan toTajtsin Dios amo kipaktia (Proverbios 6:​16, 17; 1 Pedro 5:5).

  • Kijtoaj toneuian moneki tikitaskej tlen kuali uan tlen amo kuali

    Tejuan tiiTlaixpantijkauan Jehová tiktlakamatij toTajtsin Dios porque san ye kijtoa tlen kuali uan tlen amo kuali (Isaías 5:​20). Pero se revista okijto: “Akinmej momachtiaj kinchiualtiaj ma kichiuakan tlen amo kuali maski kimatij tlen moneki kichiuaskej”. * Nin kiteititia tlen kijtoa Biblia: “Tla nonnemiskeh iwa akimeh kichiwah tlan amokuali, kipatlaskeh nomotlayejyekolis iwa nomechijtlakoskeh” (1 Corintios 15:33). Itech universidades kinmiluiaj ma kichiuakan miak tlamantli tlen toTajtsin Dios kitlajyaltia. Porque sekimej tlauanaj, kintekitiltiaj drogas uan auilnemij (1 Corintios 6:​9, 10; 2 Corintios 7:1).

  • Kijtoaj okachi kuali yetoskej tla okachi momachtiskej

    Amo nochtin momachtiaj para kipiaskej miak tomin, okachi ma kinmixmatikan noso okachi yolpakiskej. Miakej kinekij okachi kuali yetoskej uan kinpaleuiskej oksekimej. Kuali ijkon kinekij kichiuaskej. Pero tejuan tiiTlaixpantijkauan Jehová tikneltokaj okse tlamantli. Ijkon ken Jesús tikneltokaj san iTekiuajkayo toTajtsin Dios kichiuas kuali ma tiyetokan (Mateo 6:​9, 10). Pero amo san tikchixtokej ma tlayektlali iTekiuajkayo toTajtsin Dios. Tejuan titetlapouiaj itech nochi tlaltikpak uan sapanoa miakej tikinpaleuiaj sejse xiuitl (Mateo 24:14, TNM). *

^ párr. 2 Telpokamej uan ichpokamej tlen chantij iuan intatajuan kintlakamatij ijkuak kinmiluiaj ma momachtikan tla amo kixnamikij tlen kijtoa Biblia (Colosenses 3:20).

^ párr. 8 Yotikinkixtijkej kanaj 11 millones amatlajkuilolmej tlen intoka Ximomachti tiktlajtoltis se amatl uan titlajkuilos. Noijki ika kanaj 120 tlajtolmej tikinmachtiaj oksekimej ma tlajkuilokan uan ma kitlajtoltikan se amatl. Itech 2003 hasta 2017 otikinmachtijkej kanaj 70,000 (setenta mil) ma tlajkuilokan uan ma kitlajtoltikan se amatl.

^ párr. 9 Xikita tlamachtil “¿Debería dejar de estudiar?”.

^ párr. 11 Tikinmiluiaj tetajmej ma kintitlanikan chokotsitsintin uan takotsitsintin escuela. Xikita revista Akin Tetlapouijtok 15 de marzo 2003 itech tlamachtil “¿Debería ir mi hijo a la escuela?.

^ párr. 11 Xikita tlamachtil “Cómo ayudar a su hijo a mejorar sus calificaciones”.

^ párr. 14 Xikita jw.org itech sección “Opiniones sobre el origen de la vida”.

^ párr. 20 Practical Economics: Economic Transformation and Government Reform in Georgia 2004—2012, página 170.

^ párr. 22 Journal of Alcohol and Drug Education, volumen 61, núm. 1, abril de 2017, página 72.

^ párr. 24 Itech jw kanin kijtoa “Biblia okinpatili innemilis” ompa tikitas miakej yokinpaleui tlen kijtoa Biblia uan kimatij tlen kichiuas iTekiuajkayo toTajtsin Dios.