Xikita nochi

¿Tleka iTlaixpantijkauan Jehová amo kichiuaj seki iluitl?

¿Tleka iTlaixpantijkauan Jehová amo kichiuaj seki iluitl?

 ¿Ken kimatij tlen iluitl amo kichiuaskej?

ITlaixpantijkauan Jehová kitaj tlen kijtoua Biblia ijkuak kipejpenaj kox iluichiuaskej. Seki iluitl kixnamiki tlen kijtoua iTlajtol toTajtsin Dios. Ik non, iTlaixpantijkauan Jehová amo kichiuaj seki iluitl. Pero onka okseki iluitl tlen moneki san tejuan tikpejpenaskej kox tikchiuaskej. Ijkon amo techkuejsos totlalnamikilis uan ‘amo matechtlajtlakolti inawak Dios nion innawak n tlakah’ (Hechos 24:16).

Axkan ma tikitakan seki tlamantli tlen motlajtlaniaj iTlaixpantijkauan Jehová ijkuak kipejpenaj kox kichiuaskej se iluitl. *

  • ¿Kichiuaj se iluitl tlen kixnamiki Biblia?

    Principio bíblico: “Yika noiwa kijtoa n Toteko Dios: Xikinkakajtewakah, iwa ayakmó inwah ximonelokah; amo xiktelkokah tlan teyolijtlakoa” (2 Corintios 6:​15-​17).

    TiiTlaixpantijkauan Jehová amo tikseliaj tlen tlamachtiaj oksekimej uan san tlakajkayauaj. Nin kijtosneki amo tikchiuaj tlen kixnamiki iTlajtol toTajtsin Dios. Ma tikitakan seki iluitl tlen amo tikchiuaj.

    Ijkuak kinmiluichiuiliaj teotsitsintin. Jesús okijto: “Xikweyijkachiwa Moteko Dios, iwa sanwel Ye tiktekichiwilis” (Mateo 4:​10). Ijkon ken kijtoua nin tlanauatil, tiiTlaixpantijkauan Jehová amo tikchiuaj Navidad, amo tikchiuaj Pascua Florida, amo tikchiuaj Domingo de Pascua nion iluitl tlen mochiua primero de mayo. Nochi nin iluitl opejki kichiuaj ijkuak okinueyichiuayaj teotsitsintin. Noijki tiiTlaixpantijkauan Jehová amo tikchiuaj okseki iluitl. Ma tikitakan tlen iluitl amo tikchiuaj:

    • Kwanza. Se amochtli tlen itoka Enciclopedia Moderna kijtoua itoka nin iluitl “kisa itech se tlajtoli itoka swahili matunda ya kwanzaa, kijtosneki tlakilotl tlen achto tlaki”. Nin iluitl kichiuaj akinmej chantij África “ijkuak pixkaj”. Sekimej kijtouaj ijkuak kichiuaj nin iluitl amo kinueyichiuaj teotsitsintin. Pero se amochtli kijtoua nin iluitl tlen kichiuaj akinmej chantij África: “Kinmaniliaj teotsitsintin tlakilotl tlen achto tlaki uan noijki kintlasojkamatiliaj inkojkoluan”. Noijki ijkon kichiuaj iluitl Kwanza porque “kintlasojkamatiliaj inkojkoluan para ma kinteochiuakan” (Encyclopedia of African Religion [Enciclopedia de la religión africana]).

    • Fiesta del Medio Otoño. Se amochtli itoka Otras culturas, otras formas de vida, kijtoua itech nin iluitl “okitlamaniliayaj teotsin metstli”. “Siuamej omotlankuaketsayaj iyekapan [...] nin teotsin” (Religions of the World—A Comprehensive Encyclopedia of Beliefs and Practices [Religiones del mundo: Enciclopedia exhaustiva de creencias y prácticas]).

    • Nowruz. “Nin iluitl opejki kichiuaj akinmej opouiayaj itech se religión itoka zoroastrismo uan non tonal sapanoua okipatioitayaj. Okineltokayaj okatka se espíritu ijkuak oseuaya. Non okichiualtiaya espíritu tlen okatka tlajkotonal tlen itoka Rapithwin, ma motlalpacho ijkuak oseuaya uan ijkuakon opejki kichiuaj iluitl Nowruz. Ijkon akinmej opouiayaj itech se religión itoka zoroastrismo opejki iluichiuaj tlajkotonal” (Organización de las Naciones Unidas para la Educación, la Ciencia y la Cultura [Unesco]).

    • Shab-e Yalda. Nin iluitl okichiuayaj ijkuak oseuaya uan “mouika iuan ijkuak okiueyichiuayaj Mitra” nin tonal okatka ijkuak oneski tlauili (Sufism in the Secret History of Persia [El sufismo en la historia secreta de Persia]). Noijki nin iluitl okichiuayaj akinmej ochantiayaj Roma uan griegos ijkuak okinueyichiuayaj teotsitsintin uan noijki ijkuak okiueyichiuayaj tonaltsin. *

    • Día de Acción de Gracias. Nin iluitl kichiuaj noijki ijkon ken iluitl Kwanza porque noijki teotsitsintin okinmaniliayaj tlen achto otlakiaya. Satepan nin “iluitl opejki kichiuaj akinmej yauij teopan uan kijtouaj kichiuaj ken Cristo” (A Great and Godly Adventure—The Pilgrims and the Myth of the First Thanksgiving [Una gran aventura piadosa: Los peregrinos y el mito del primer día de Acción de Gracias]).

    San tlen amo kineltokaj noso kijtouaj kinpanos tlen kuali. Biblia kijtoua: “Namejuan nankitlamaniliaj teotsin tlen kitemaka Suerte” yejuan akinmej kikauaj Jehová (Isaías 65:11). Ik non, tiiTlaixpantijkauan Jehová amo tikchiuaj nion se iluitl tlen tlalchi moijtoua:

    • Ivan Kupala. “Ijkuak kichiuaj nin iluitl, kineltokaj kiiluichiuiliaj Iván Kupala, nochi tlen onka kikixtia ichikaualis uan kineltokaj kiseliskej non chikaualistli tla moyolchikauaj uan tla kineltokaj kinpanos tlen kuali” (The A to Z of Belarus [Bielorrusia de la A a la Z]). Achto okichiuayaj non iluitl ijkuak sapanoua otonaya. Pero se enciclopedia kijtoua “non iluitl opejki kichiuaj akinmej opejki tlaneltokaj itech Cristo uan okichiuayaj non iluitl ijkuak okilnamikiayaj san Juan Bautista” (Encyclopedia of Contemporary Russian Culture [Enciclopedia de la cultura rusa contemporánea]).

    • Año Nuevo Lunar (Año Nuevo chino o Año Nuevo coreano). “Ijkuak kichiuaj nin iluitl, nochtin kichiaj ma kinpano tlen kuali, kinueyichiuaj teotsitsintin, espíritus uan kichiaj kipiaskej miak tlamantli ijkuak peuas yankuik xiuitl (Mooncakes and Hungry Ghosts—Festivals of China [Festivales chinos: Pasteles de la luna y fantasmas hambrientos]). Akinmej chantij Corea noijki kichiuaj non iluitl. “Kinueyichiuaj inkojkoluan, kichiuaj miak tlamantli uan ijkon ma yakan amo kuali ejekamej uan kipiaskej miak tlamantli ijkuak peuas yankuik xiuitl uan kimatiskej tlen kinpanos nochi se xiuitl” (Encyclopedia of New Year’s Holidays Worldwide [Enciclopedia de las celebraciones de Año Nuevo de todo el mundo]).

    Año Nuevo chino

    Iluichiuaj porque kineltokaj itlaj mokaua ok yoltok ijkuak tiixpoliuij. ITlajtol toTajtsin Dios kijtoua ijkuak tiixpoliuij ayakmo mokaua itlaj ok yoltok (Ezequiel 18:4). Ik non, tiiTlaixpantijkauan Jehová amo tikchiuaj non iluitl porque oksekimej kineltokaj ok mokaua itlaj yoltok ijkuak tiixpoliuij. Ma tikitakan tlen iluitl amo tikchiuaj:

    • Mikailuitl noso Todos Santos. Se enciclopedia kijtoua non tonal “kinmilnamikij akinmej yoixpolikej”. Noijki kijtoua: “Yiuejkika okineltokayaj akinmej yoixpolikej okisayaj inmialma uan omokopayaj fantasmas, naualtin, kalamej uan okseki tlamantli uan okinmonextiliayaj akinmej okintlajyouiltijkej” (New Catholic Encyclopedia [Nueva Enciclopedia Católica]).

    • Festival Ching Ming y Festival de los Fantasmas Hambrientos. Nin ome iluitl okinchiuiliayaj inkojkoluan. Se amochtli kijtoua ijkuak kichiuaj Festival Ching Ming “kitlaliaj tlakuali, tlakonili uan tomin uan ijkon akinmej yoixpolikej amo ma apismikikan, amo ma amikikan uan ma kipiakan tomin (Celebrating Life Customs Around the World—From Baby Showers to Funerals [Costumbres de todo el mundo para celebrar la vida: desde baby showers hasta funerales]). Noijki non amochtli kijtoua akinmej kinmiluichiuiliaj Fantasmas Hambrientos kineltokaj “non metstli mikamej uitsej kinmitakiuij uan noijki okachi uitsej ijkuak metstli yochikauak. Ik non, moneki kinyolseuiskej mikamej uan kinueyichiuaskej inkojkoluan”.

    • Chuseok. Se amochtli kijtoua akinmej chantij Corea kichiuaj non iluitl uan “kinmaniliaj tlakuali inmialma mikamej uan noijki vino”. Nin tlamanali kiteititia “kineltokaj ok mokaua itlaj yoltok ijkuak ikaj ixpoliui” (The Korean Tradition of Religion, Society, and Ethics [La tradición coreana de la religión, la sociedad y la ética]).

    Iluitl tlen mouika iuan naualotl. ITlajtol toTajtsin Dios kijtoua: “Amikaj ma yeto [...] tlen kitekitiltia adivinación, tlen kitekitiltia magia, tlen kitemoua akin tlatetsauia, tlen tetlajchiuia, tlen kitechiuilia tlen amo kuali, tlen kitlajtlania se nauali, noso ikaj tlen kijtoua tlen panos satepan nion ikaj tlen motlapouia iuan akinmej yomikej. Jehová kitlajyaltia akin kichiua nochi nin tlamantli” (Deuteronomio 18:10-​12). TiiTlaixpantijkauan Jehová amo tikchiuaj nion se iluitl tlen mouika iuan naualotl uan adivinación. Amo tikchiuaj iluitl Halloween nion se iluitl tlen tlalchi moijtoua:

    • Año Nuevo cingalés uan Año Nuevo tamil. Se amochtli kijtoua: “Nochi tlen kichiuaj itech nin iluitl [...] kichiuaj seki tlamantli tlen mouika iuan astrología para mopaleuiskej” (Encyclopedia of Sri Lanka [Enciclopedia de Sri Lanka]).

    • Songkran. Se enciclopedia kiyekijtoua nin iluitl tlen kichiuaj ompa Asia, itoka kisa itech se tlajtoli itoka sánscrita [...] kijtosneki ‘molinia’ noso ‘mopatla’”. Nin iluitl “kiteititia ijkuak kalaki tonaltsin uan peua constelación zodiacal de Aries” (Food, Feasts, and Faith—An Encyclopedia of Food Culture in World Religions [Comida, fiestas y fe: Enciclopedia de cultura gastronómica en las religiones del mundo]).

    Iluitl tlen kichiuaj ijkon ken kijtoua tlanauatil tlen okijkuilo Moisés. Pero ayakmo mochiua porque Jesús topatka yomotemakak. ITlajtol toTajtsin Dios kijtoua: “Cristo omochiwako nochi tlan kijtoa itlanawatil” (Romanos 10:4). Tejuan tiiTlaixpantijkauan Jehová ok timopaleuiaj ika principios tlen kisaj itech tlanauatil tlen okijkuilo Moisés uan okinmakakej israelitas. Pero amo tikchiuaj iluitl ijkuak kijtouaj uits Mesías. Porque tiiTlaixpantijkauan Jehová tikneltokaj youala. Biblia kijtoua: “Nochi yon tlamantle okipiaya ipatij nijkuak ayamo owalaya in Cristo, pero axan [amo] ok itlaj ipati. Achtoj otiekaj kej yeskia otiekaj itech se ekawitl, pero axan ya tikatej itech Cristo de kan owalajtoka in yon ekawitl” (Colosenses 2:​17, Itlajtol toTajtzin Dios, NHY). Nochi tlen kichiuaj kiteititiaj kichiuaj miak costumbres tlen kixnamiki Biblia. Ik non, tiiTlaixpantijkauan Jehová amo tikchiuaj nion se iluitl tlen tlalchi moijtoua:

    • Janucá. Nin iluitl kichiuaj porque kilnamikij ijkuak judíos okiyektlalijkej teokali tlen okatka Jerusalén. Pero iTlajtol toTajtsin Dios kijtoua Jesús “Ye tiópixki, okachi kuali iwa milajka. Porke amo san tlakah okichijchijkeh, yika amo de nin tlaltíkpaktli” (Hebreos 9:​11). TiiTlaixpantijkauan Jehová tikneltokaj nin teokali yokipatkayotijkej.

    • Rosh Hashaná. Nin iluitl mochiua itech achto tonal ijkuak peua xiuitl judío. Yiuejkika ijkuak okichiuayaj nin iluitl okitlamaniliayaj toTajtsin Dios (Números 29:​1-6). Pero Jesucristo omochi Mesías. Ik non, ayakmo moneki ma kitlamanilikan toTajtsin Dios (Daniel 9:​26, 27). ToTajtsin Dios ayakmo kipatioita non tlamanali.

  • ¿Kinmiluiaj oksekimej tlen pouij itech okseki religiones inmiuan ma iluichiuakan?

    Principio bíblico: “¿Ueletis moyekuikaskeh se tlaneltokak iwa se non amo tlaneltokak? ¿Kox weletis sansikah yetoskeh [iteokal] n Dios iwa n diosmeh non kinmachijchiwah?” (2 Corintios 6:​15-​17).

    TiiTlaixpantijkauan Jehová timochijchikauaj timouikaskej iuan oksekimej uan tiktlakaitaj tlen kineltokaj. Pero amo tiiluichiuaj iuan oksekimej tlen pouij itech okseki religiones.

    Ijkuak kinmiluichiuiliaj oksekimej porque itlaj kuali okichijkej noso ijkuak oksekimej kijtouaj ma timonechikokan iuan okseki religiones. Yiuejkika ijkuak toTajtsin Dios okinyekanki israelitas kanin ochantitoj, okatkaj oksekimej tlen ik ompa ochantiayaj okipiayaj inreligión. Ik non, okinmilui israelitas: “Porque mitsijtlakos tla tikintekichiuilis inteotsitsiuan” (Éxodo 23:32, 33). Ik non, tiiTlaixpantijkauan Jehová amo tikchiuaj nion se iluitl tlen tlalchi moijtoua:

    • Loy Krathong. Nin iluitl kichiuaj ompa Tailandia. “Ijkuak iluichiuaj, ika amatl kinchijchiuaj chikimej tsikitsitsintin. Inmijtik kintlaliliaj ceras uan kopali uan kinkajkauaj ijtik atl. Kijtouaj nonmej ‘barquitos’ kiuikaj nochi tlen amo kuali. Noijki nin iluitl kinmilnamiktia ijkuak Buda itlaj okichi itempa atl” (Encyclopedia of Buddhism [Enciclopedia del budismo]).

    • Día Nacional de Arrepentimiento. Se tekiua okijto itech periódico itoka The National ompa Papúa Nueva Guinea, akinmej kichiuaj nin iluitl “kineltokaj seki tlamantli tlen otlamachti Jesús”. Noijki okijto non iluitl “kinpaleuia oksekimej ma kichiuakan ken okichi Cristo”.

    • Vesak. Nin iluitl sapanoua kipatioitaj akinmej kineltokaj Buda. “Non tonal kilnamikij ijkuak oneski Buda, tlen okichi uan ijkuak oixpoliuik [nirvana]” (Diccionario de religiones comparadas).

    Vesak

    Ijkuak kichiuaj se iluitl tlen amo kisa itech Biblia. Jesús okinmilui teopixkej: “Nomejwah ijkó nonkijtlakoah itlanawatil Dios porke nonkichiwah tlan yowejka okichiwayah nomotatawah”. Ik non, okinmilui amitlaj ipati okiueyichiuayaj toTajtsin Dios porque san otlamachtiayaj “intlanawatil n tlakah” (Mateo 15:​6, 9). Ik non, TiiTlaixpantijkauan Jehová amo tikchiuaj nion se iluitl tlen tlalchi moijtoua:

    • Epifanía (Timkat o Los Reyes Magos). Ijkuak kichiuaj nin iluitl kilnamikij tlen okichijkej “ixtlamatkej” ijkuak okitatoj Jesús noso ijkuak omoapolakti. Se enciclopedia kijtoua: “Miakej tlen okijtouayaj okichiuayaj ken Cristo, opejki kichiuaj non iluitl ijkuak otlaseliaya uan okinueyichiuayaj teotsitsintin tlen okimaluiayaj atl uan aueyatl” (The Christmas Encyclopedia [Enciclopedia de la Navidad]). Nin iluitl mouika iuan tlen kichiuaj akinmej chantij Etiopía tlen itoka Timkat “pero nin iluitl san se costumbre” (Encyclopedia of Society and Culture in the Ancient World [Enciclopedia de sociedades y culturas del mundo antiguo]).

    • Fiesta de la Asunción de la Virgen María. Ijkuak kichiuaj nin iluitl kijtouaj kilnamikij inantsin Jesús oyajki iluikak iuan nochi itlalnakayo. Diccionario de religiones comparadas kijtoua nin iluitl “opejki kichiuaj [...] itlamian siglo naui” uan itech “[Nuevo Testamento, NT] amo kanaj nesi non iluitl”.

    • Fiesta de la Inmaculada Concepción. La Enciclopedia Católica Online, kijtoua sekimej kineltokaj María amo oneski tlajtlakole: “Amo uelis tikijtoskej kisa itech Escrituras nin tlamantli”. San teopixkej omokuayejyekojkej ijkon kichiuaskej.

    • Cuaresma. Enciclopedia universal ilustrada europeo-americana, kijtoua ijkuak kichiuaj nin iluitl mosauaj uan opejki kichiuaj “itlamian xiuitl 325”, ijkuak yopanok doscientos xiuitl okijkuilojkej saiktlami amochtli tlen kipia Biblia. Non Enciclopedia kijtoua Miércoles de Ceniza noso ijkuak moyolkuitiaj, ijkin opanok: “Itech 1091 se teopixki itoka Urbano II otlanauati nochtin ma monechikokan ompa Benevento uan ma kimotlalilikan ceniza”.

    • Meskel. Ijkuak kichiuaj nin iluitl kilnamikij ijkuak “okajsikej Vera Cruz nin kijtosneki cruz tlen itech okipilojkej Jesús uan noijki otlatlatijkej uan ompa omijtotijkej” (Encyclopedia of Society and Culture in the Medieval World [Enciclopedia de las sociedades y culturas en el mundo medieval]). Pero tejuan tiiTlaixpantijkauan Jehová amo tiktekitiltiaj cruz ijkuak tikueyichiuaj toTajtsin Dios.

  • ¿Kiueyichiuaj se tlakatl, se organización noso se altepetl?

    Principio bíblico: “Nin tlen yokijto Jehová: ‘Kiuijuikaltiskej akin kinneltokilia tlaltikpaktlakamej, akin kineltoka tlaltikpaktlakamej kipaleuiskej uan kikaua Jehová’” (Jeremías 17:5).

    Tejuan tiiTlaixpantijkauan Jehová techtekipachoua tlen oksekimej kinpanoua uan inpatka timotlatlaujtiaj. Pero amo tikchiuaj iluitl nion se iluitl tlen tlalchi moijtoua:

    Ijkuak kiiluichiuiliaj se tekiua noso ikaj tlen sapanoua kipatioitaj. Biblia kijtoua tla tiknekij kuali tiyetoskej, amo ma tikinneltokilikan tlen oksekimej kichiuaj. Porque yejuan noijki ualixpoliuiskej (Isaías 2:​22). Ik non, tiiTlaixpantijkauan Jehová amo tikiluichiuiliaj nion se tekiua ijkuak kajxitia xiuitl.

    Ijkuak kiluichiuiliaj bandera. Tejuan tiiTlaixpantijkauan Jehová amo tikiluichiuiliaj Bandera. ¿Tleka? Biblia kijtoua: “Amo xikinmotiotikah n diosmeh tlachijchíwalteh” (1 Juan 5:​21). Sekimej kijtouaj Bandera amo se teotsin noso kijtouaj amo kiueyichiuaj. Pero se tlakatl itoka Carlton Hayes, okijto: “Axkan miakej kiueyichiuaj miak tlamantli itech se altepetl”. Noijki okijto: “Bandera okachi kipatioitaj itech inmialtepe uan noijki kiueyichiuaj”.

    Ijkuak kiueyichiuaj se santo. ¿Tlen okichi tlatitlanil Pedro ijkuak se tlakatl ixpan omotlankuaketski? Biblia kijtoua: “Pero Pedro okiketsalti, iwa okili: —Ximoketsa, porke ne noiwa san ni tlakatl kemi te” (Hechos 10:25, 26). Pedro amo okitekauili iyekapan ma motlankuaketsakan nion oksekimej ijkon okichijkej. Ik non, tiiTlaixpantijkauan Jehová amikaj tikiluichiuiliaj uan amo tikchiuaj nion se iluitl tlen tlalchi moijtoua:

    • Mikailuitl noso Todos Santos. Se amochtli itoka Año cristiano kijtoua nin tonal “kinmiluichiuiliaj mikamej”. Noijki kiyekijtoua: “Akinmej kitemouaj tleka ijkon kichiuaj, amo kajsij kanin okikixtijkej non iluitl”.

    • Ijkuak kiluichiuiliaj virgen de Guadalupe. Nin iluitl kichiuiliaj “virgen de Guadalupe” porque kineltokaj ye inantsin Jesús. Noijki kijtouaj itech 1531 okimonextili se tlakatl (Enciclopedia Guadalupana).

    • Día del santo o día onomástico. Se amochtli kiyekijtoua: “Kichiuaj non iluitl ijkuak kikuatekiaj se konetl noso ijkuak kichiua iconfirmación porque kineltokaj isanto non tonal”. Noijki non amochtli kijtoua: “Non tonal poui itech religión” (Celebrating Life Customs Around the World—From Baby Showers to Funerals [Costumbres de todo el mundo para celebrar la vida: desde baby showers hasta funerales]).

    Ijkuak kinmiluichiuiliaj políticos uan akinmej kinpatioitaj. Biblia kijtoua: “Okachi kuali ma timopaleuikan itech Jehová” noijki “amo ma tikneltokakan tlaltikpaktlakamej techpaleuiskej” (Salmo 118:​8, 9). TiiTlaixpantijkauan Jehová amo tikinpaleuiaj políticos tlamo tikteititiskej tikneltokaj tekiuajkej kiyektlaliskej ouijkayotl tlen tikixnamikij. Ik non, amo tikchiuaj iluitl Día Internacional de la Juventud noso el Día Internacional de la Mujer. Noijki amo tiiluichiuaj ijkuak kichiuaj Día de la Emancipación nion okseki iluitl. Tejuan tikneltokaj iTekiuajkayo toTajtsin Dios tlapaleuis ayakmo ikaj ma techikoita (Romanos 2:11; 8:21).

  • ¿Iluichiuaj porque kipatioitaj inmialtepe?

    Principio bíblico: “Dios amo kintlasojtla san sikimeh, iwa oksikimeh amó, yej itech nochi nin tlaltíkpaktli, Dios kinselia akimeh kitlakitah iwa kichiwah tlan kuali” (Hechos 10:34, 35).

    Tejuan techpaktia tichantiskej toaltepe pero amo tikchiuaj nion se iluitl tlen kichiuaj toaltepe.

    Ijkuak kinmiluichiuiliaj soldados. Jesús amikaj iuan omokualani. Ik non, okinmilui imachtijkauan: “Xikintlasojtlakah akimeh nomechkokoliah, iwa xiktlajtlanilikah Dios makintiochiwa” akinmej namechtlajyouiltiaj (Mateo 5:​44). Ik non, tiiTlaixpantijkauan Jehová amo tikchiuaj nion se iluitl tlen tlalchi moijtoua:

    • Día de Anzac. Se diccionario kiyekijtoua: “Anzac kijtosneki nochtin soldados tlen pouij Australia uan Nueva Zelanda” non tonal okilnamikiayaj Anzac pero satepan okitlalijkej para kinmilnamikiskej soldados tlen oixpolikej ijkuak omoteuitoj (Historical Dictionary of Australia [Diccionario histórico de Australia]).

    • Día de los Veteranos (Día para Recordar, Domingo del Recuerdo y Día de la Conmemoración de los Caídos). Enciclopedia Moderna kijtoua “kinmiluichiuiliaj akinmej miak xiuitl okatkaj soldados [...] uan oixpolikej ijkuak omoteuitoj”.

    Ijkuak iluichiuaj porque inmialtepe ayakmo kinauatia okse altepetl. Jesús okinmilui imachtijkauan: “Ne amo de nin tlaltíkpaktli, yejwah noiwa ayakmó de nin tlaltíkpaktli” (Juan 17:16). TiiTlaixpantijkauan Jehová techpaktia tikmatiskej tlen opanok toaltepe pero amo tikchiuaj nion se iluitl tlen tlalchi moijtoua:

    • Día de Australia. Se enciclopedia kiyekijtoua nin iluitl kilnamikij ijkuak “itech 1788 soldados tlen oualayaj Inglaterra okitlejkoltijkej bandera uan okijtojkej tlanauatiskiaj ompa Australia” (Worldmark Encyclopedia of Cultures and Daily Life [Enciclopedia Worldmark de las culturas y la vida diaria]).

    • Día de Guy Fawkes. Nin iluitl kichiuaj “ijkuak kilnamikij Guy Fawkes uan oksekimej católicos okinekiayaj kalakiskej Parlamento ompa [Gran Bretaña] uan okinekiayaj kimiktiskej tekiua Jacobo I uan nin opanok itech 1605” (A Dictionary of English Folklore [Diccionario de folclore inglés]).

    • Día de la Independencia. Iluichiuaj porque inmialtepe ayakmo kinauatia okse altepetl.

  • ¿Sapanoua tlakonij noso auilnemij itech non iluitl?

    Principio bíblico: “Miak xiwitl nomejwah ononkichijtinenkeh tlan kiwilitah kichiwaskeh akimeh amo kitlakitah Dios. Ononmoixpolojtinemiah iwa ononkichiwayah tlan kelewiah nomokuerpo, onontlawantinemiah, ononmopaktijtinemiah itech ilwimeh pitsotikeh. Iwa tlan okachi tetlajyalti, ononkinweyijkatlaliayah diosmeh non san kinmachijchiwah” (1 Pedro 4:3).

    Tejuan tiiTlaixpantijkauan Jehová tiktlakamatij nin principio. Ik non, amo tiiluichiuaj iuan akinmej tlauanaj. Tejuan techpaktia tiyetoskej iuan toyolikniuan. Tla ikaj kineki konis tlakonili, uelis konis san tepitsin. Timochijchikauaj tiktlakamatiskej nin principio bíblico: “Tla nontlakuah, noso nonkonih, noso itla ok se nonkichiwah, nochi xikchiwakah para nonkiweyijkachiwaskeh n Totajtsi Dios” (1 Corintios 10:31).

    TiiTlaixpantijkauan Jehová amo tikchiuaj carnavales nion okseki iluitl kanin kichiuaj miak tlamantli tlen kixnamiki Biblia. Noijki amo tikchiuaj iluitl tlen itoka Purim uan kichiuaj judíos. Yiuejkika judíos okilnamikiayaj non iluitl porque okinmakixtijkej itech siglo makuili achto ualaskia Jesús. Pero axkan kichiuaj se carnaval itech non iluitl. Se amochtli itoka Judaísmo kiyekijtoua “ijkuak kichiuaj non iluitl sapanoua tlakonij uan kinmotlaliliaj mascaras uan disfraces” uan “tlakamej motlakentiaj ken siuamej”.

 ¿Ok kintlasojtlaj akinmej inmiuan chantij maski amo kichiuaj seki iluitl?

Kema. ITlajtol toTajtsin Dios kijtoua ma tikintlasojtlakan uan ma tikintlakaitakan akinmej inmiuan tichantij maski okse tlamantli kineltokaj (1 Pedro 3:​1, 2, 7). Ijkuak se iTlaixpantijka Jehová ayakmo iluichiua, xamo sekimej tlen inmiuan chanti kualanij, moyolkokouaj uan mokuayejyekouaj ayakmo kintlasojtlaj. Ik non, tiiTlaixpantijkauan Jehová timochijchikauaj tikinmititiskej tikintlasojtlaj akinmej inmiuan tichantij uan tikinyekiluiaj tleka ayakmo tiiluichiuaj pero uelis timoyolpaktiskej okse tonal ijkuak amo iluichiuaj.

 ¿Kinmiluiaj oksekimej amo ma iluichiuakan?

Amo. TiiTlaixpantijkauan Jehová tikneltokaj sejse moneki kipejpenas tlen kichiuas (Josué 24:15). Nochtin tikintlakaitaj maski tlatlamantli kineltokaj (1 Pedro 2:​17).

^ párr. 7 Nin tlamachtil amo kijtoua nochi iluitl tlen amo kichiuaj iTlaixpantijkauan Jehová nion ijkuilitokej nochi principios bíblicos.

^ párr. 15 Mithra, Mithraism, Christmas Day & Yalda (Mitra, mitraísmo, Navidad y Yalda), de K. E. Eduljee, páginas 31 a 33.