Xikita nochi

Pampa tikitas okse menú

ITlaixpantijkauan Jehová

náhuatl del centro

¿Kipiaj tlanauatilmej iTlaixpantijkauan Jehová itech noviazgo?

¿Kipiaj tlanauatilmej iTlaixpantijkauan Jehová itech noviazgo?

TiiTlaixpantijkauan Jehová tikneltokaj tlen tlamachtia Biblia uan tlanauatilmej tlen kinpia techpaleuiaj kuali ma tikpejpenakan tlen tikchiuaskej uan ijkon tikyolpaktiskej toTajtsin Dios (Isaías 48:17, 18). Amo tejuan otikintlalijkej ninmej tlamachtilmej. Pero tikintlakamatij. Ma tikinmitakan sekimej tlen tlajtoaj itech noviazgo. *

  • Moneki amo keman ma moxelokan akinmej monamiktiaj (Mateo 19:6). Tikneltokaj ijkuak sekimej peua moixmatij, ijkon kichiuaj pampa kinekij monamiktiskej. Ik non, amo san tikajauilmatij nin tlamantli.

  • Tla ikaj ayamo kipia xiuitl pampa monamiktis, amo moneki ma peua ikaj ma kixmati. Ikaj uelis monamiktis tla yikipia xiuitl, kijtosneki, tla yopanok kauitl ijkuak okachi okinekiaya motekas iuan ikaj (1 Corintios 7:​36).

  • Tla ikaj kineki monamiktis, moneki yetos iselti. Tla ikaj omoxelo inmixpan tekiuajkej, ixpan toTajtsin Dios amo kijtosneki uelis oksepa monamiktis. Ikaj uelis oksepa monamiktis tla inamik omomekati (Mateo 19:9).

  • Akinmej kichiuaj ken Cristo moneki monamiktiskej san iuan akin noijki tlaneltoka ken yejuan (1 Corintios 7:​39). Akinmej iTlaixpantijkauan Jehová moneki kixmatiskej uan monamiktiskej san iuan akin noijki iTlaixpantijka Jehová tlen yomoapolakti uan amo iuan akin san kitlakaita intlaneltokilis (2 Corintios 6:​14). ToTajtsin Dios nochipa kinmiluia itekipanojkauan ma monamiktikan san iuan akin tlaneltoka ken yejuan (Génesis 24:3; Malaquías 2:​11). Noijki ixtlamatkej kijtoaj nin tlamantli kinpaleuia. *

  • Telpokamej uan ichpokamej moneki kintlakamatiskej intatajuan (Proverbios 1:8; Colosenses 3:​20). Telpokamej uan ichpokamej tlen chantij iuan intatajuan moneki kintlakamatiskej tlen kinmiluiaj itech noviazgo. Nin kijtosneki kintlakamatiskej ijkuak kinmiluiaj keman uelis kixmatiskej se telpochtli noso se ichpochtli uan tlen uelis kichiuaskej.

  • Biblia kijtoa tinochtin moneki tikitaskej tlen tikchiuaskej (Gálatas 6:5). Ik non, tla tikintlakamatij itlanauatiluan Biblia, tiiTlaixpantijkauan Jehová uelis tikpejpenaskej kox tiknekij ikaj tikixmatiskej uan akin tikixmatiskej. Miakej motlapouiaj iuan oksekimej iTlaixpantijkauan tlen kipiaj chikauak intlaneltokilis uan ixtlamatkej, yejuan intech motekipachoaj pampa kuali ma yetokan (Proverbios 1:5).

  • Miakej ijkuak mochiuaj novios ualeua sapanoa tlajtlakolchiuaj. Biblia kijtoa amo kuali ma tiauilnemikan. Nin amo san kijtosneki auilnemij ijkuak ayamo monamiktiaj, noijki ijkuak kimajmachiliaj intlakayo, kitekitiltiaj inkamak pampa kimajmachiliskej ikaj itlakayo (sexo oral) noso ijkuak motekaj kichiuaj itech intsintenko (sexo anal) noso okseki tlamantli (1 Corintios 6:​9-​11). Tla akinmej novios mopipitsoaj uan momajmachiliaj hasta kinekiskej motekaskej, maski amo motekaskej, kichiuaj itlaj pitsotik tlen kikualania toTajtsin Dios (Gálatas 5:​19-​21). Uan Biblia noijki kijtoa amo kuali titlajtoskej pitsotik (Colosenses 3:8).

  • Toyolo sapanoa tekajkayaua (Jeremías 17:9). Kichiua ikaj ma kichiua tlen amo kuali maski kimatok amo kuali. Pampa inyolo amo ma kinkajkayaua noso ma kinchiualti ma kichiuakan itlaj amo kuali, akinmej novios amo ma yetokan inselti pampa amo ma kichiuakan itlaj amo kuali. Akinmej novios amo kipiaskej ouijkayotl tla yauij iuan oksekimej ijkuak paxialotiuij noso inmiuan ikaj yaui pampa uelis kinmaluis (Proverbios 28:26). Akin kichiua ken Cristo tlen ayamo monamiktia kuali kimatok amo kuali kitemos se novio noso novia itech Internet, non uelis kichiuias ma tlajyoui pampa amo kuali kixmati (Salmo 26:4).

^ párr. 2 Itech seki altepemej amo mochiuaj novios uan satepan monamiktiaj. Biblia amo kijtoa moneki achto moixmatiskej uan satepan monamiktiskej. Noijki amo kijtoa achto moneki yetoskej novios uan satepan monamiktiskej.

^ párr. 6 Se neskayotl, se tlamachtil itech se revista tlen tlajtoa itech namiktilistli uan kalchanejke, kijtoa “eyi estudios tlen omochijkej iuan sekimej tlen yiuejkika omonamiktijkej (kanaj 25 xiuitl), kiteititiaj tla kipiaj san se tlaneltokalistli non sapanoa kinpaleuia pampa amo keman ma moxelokan” (Marriage & Family Review, volumen 38, número 1, página 88, 2005).