Xikita nochi

Pampa tikitas okse menú

ITlaixpantijkauan Jehová

náhuatl del centro

¿Okichijchijkej inBiblia iTlaixpantijkauan Jehová?

¿Okichijchijkej inBiblia iTlaixpantijkauan Jehová?

ITlaixpantijkauan Jehová yokintekitiltijkej tlatlamantli Biblias pampa momachtiskej. Pero melauak kipatioitaj Traducción del Nuevo Mundo de las Santas Escrituras —tlen onka ika miakej tlatlamantli tlajtolmej— pampa kitekitiltia itoka toTajtsin Dios, kijtoa tlen melauak uan kuali moajsikamati.

  • Kitekitiltia itoka toTajtsin Dios. Amo nochtin tlen kinchijchiuaj Biblias kitlakaitaj akin iAxka Biblia. Se neskayotl, se traducción kijtoa intoka kanaj setenta tlaltikpaktlakamej tlen otlapaleuijkej ma mochijchiua, pero amo keman kijtoa itoka akin iAxka: Jehová.

    Uan itech Traducción del Nuevo Mundo ijkuilitok itoka toTajtsin Dios ijkon ken itech tlajkuilolmej tlen yiuejkika omoijkuilojkej, uan amo kijtoa intoka akinmej okitlajtolkuepkej.

  • Melauak tlen kijtoa. Seki Biblias amo ajsitok noso amo kuali okintlajtolkuepkej ken achto omoijkuilo. Se neskayotl, se Biblia kitlajtolkuepa Mateo 7:13 ijkin: “Xikalakikan itech kaltlatsakuil pitsauak, pampa patlauak kaltlatsakuil uan ojtli tlen teuikaj ijtik tlitl”. Pero itech tlajkuilolmej tlen yiuejkika omoijkuilojkej amo kijtoa “ijtik tlitl”, kijtoa “kinmixpoloskej”. Uelis akinmej otlajtolkuepkej okineltokayaj akinmej amo yolkualmej kintlajyouiltiskiaj ijtik tlitl. Pero Biblia amo ijkon tlamachtia. Ik non, Traducción del Nuevo Mundo kijtoa “kinmixpoloskej”, ijkon ken kijtoa itech tlajkuilolmej tlen yiuejkika omoijkuilojkej.

  • Kuali moajsikamati. Tikmatij se kuali traducción moneki yetos ajsitok noso kuali motlajtolkuepas, noijki moneki kuali moajsikamatis. Ma tikitakan se neskayotl. Miakej Biblias kitlajtolkuepaj Mateo 5:3 ika tlajtolmej ken: “Ma kipiakan pakilistli akinmej amo chikauak inmiespíritu”. Pero nonmej tlajtolmej axkan amo kuali moajsikamatij. Ik non, itech Traducción del Nuevo Mundo omotlajtolkuepki nin tlaxelol ijkin: “Ma yolpakikan akinmej kimatij moneki kitemoskej toTajtsin Dios”.

Ken yotikitakej, nin kitlakaita itoka toTajtsin Dios, kijtoa tlen melauak uan kuali moajsikamati, pero onka okse tlamantli tlen kichiua okachi ipati Traducción del Nuevo Mundo: amo monemaka. Ik non, sapanoa miakej tlaltikpaktlakamej maski amo kipiaj tomin pampa kikouaskej, uelij kitlajtoltiaj Biblia ika intlajtol.