Xikita nochi

¿ITlaixpantijkauan Jehová moneloaj iuan okseki religiones?

¿ITlaixpantijkauan Jehová moneloaj iuan okseki religiones?

ITlaixpantijkauan Jehová techpaktia timotlapouiskej iuan akinmej kipiaj okse religión. Pero amo inmiuan tikueyichiuaj toTajtsin Dios. Biblia kijtoa san sekan ma tiyetokan akinmej melauak tikchiuaj ken Cristo uan miak ipati san se tlamantli ma titlaneltokakan (Efesios 4:​16; 1 Corintios 1:​10; Filipenses 2:2). Amo san moneki titetlasojtlaskej, titeiknomatiskej uan titetlapojpoluiskej. Noijki nochi tlen tikneltokaj kisa itech Biblia. Tlamo amitlaj ipati titlaneltokaskej (Romanos 10:​2, 3).

Biblia kijtoa tla akin kichiua ken Cristo kiueyichiua toTajtsin Dios iuan akin okse tlamantli kineltoka, kijtosneki amo kintlakamati itlanauatiluan toTajtsin Dios (2 Corintios 6:​14-​17). Akin kichiua ken Cristo ayakmo kuali mouikas iuan toTajtsin Dios porque amo san se tlamantli kineltoka. Ik non, Jesús okinmilui imachtijkauan amo ma mouikakan iuan tlen tlaneltokaj okse tlamantli (Mateo 12:30; Juan 14:6). Noijki tlanauatil tlen toTajtsin Dios okimakak Moisés, okijtoaya israelitas amo uelis kiueyichiuaskiaj toTajtsin Dios iuan akinmej amo okatkaj israelitas (Éxodo 34:11-​14). Satepan israelitas amo okinekej ma kinpaleuikan tlen amo okatkaj israelitas porque okijtoayaj amo mouikaskiaj iuan akinmej kineltokaj okse tlamantli (Ezequiel 4:​1-3).

¿Kox iTlaixpantijkauan Jehová motlapouiaj iuan akinmej kipiaj okse religión?

Kema, timochijchikauaj timotlapouiskej iuan akinmej kipiaj okse religión. Itech 2017 otitetlapouijkej 2,046,000,202 horas. Tiknekij tikmatiskej ken mokuayejyekoaj uan tlen kineltokaj oksekimej ijkon ken okichi tlatitlanil Pablo (1 Corintios 9:​19-​22). Ijkuak inmiuan timotlapouiaj, tiktlakaitaj tlen kineltokaj ijkon ken kijtoa Biblia (1 Pedro 3:​15).